Jerita Encharang Betundi Enggau Rentap ba Ulu Skrang

Jerita Encharang Betundi Enggau Rentap ba Ulu Skrang.

Ditulis Mary Tinggom maia taun 1915 pengudah anak Encharang ti benama Seligie ti nusi jerita tu agai Mary,indu iban nemu nulis jako abjad pengudah beguru nulis enggau sister Floren.Penama Mary ia ke asal benama Manyie.Asal ia orang Skrang.

To jerita ia..

Maianya kira malam ari,kami sabuat bisi penyampau seratus iku ari Batang Saribas ngelawa ke Ulu Skrang ninga unggal Libau madah diri begawai pengaruh alu betesau ambis menua skrang nya nemu jerita ia begawai pengaruh.Maianya malamnya kami sabuat nurun maia malam ari ngena api perin.(buluh nya dibalut enggau kain ba ujung alu ditanjah minyak ai pajek,enti kain ka ambis diganti,alu dibalut baru enggau kain tadi.Menya beguna amai ai pajik)..Udahnya kami sabuat alu nurun,peda aku unggal Bikong tetayun dulu alu nadai dipeda,pama ga bakih nya sigi orang enda tau ninga pengerami sigi dulu ia atai,pia mega enti ngelaban munsuh baka nyumbuh punggal nya ia sigi dulu engkecit nabak kediri empu ba tengah munsuh nunda penama ia empu.Nyadi kami sabuat belubah meh mina unggal Luat engkecit enda berapi laban ka betapat pengelaju enggau Bikong.Luat tu endang sikal sigi ia belama mecah ke mua munsuh ngena kapak.

P/s.Kapak ia besai sereta kediato udah ba KP laban bala purih takut ke kapak nya ti merengung maia malam ari kediato laban lama dah enda nyepi untak mensia semadi dah di intu nyau begik ga.Tndok belama kapak nya,kapak Luat tu enda ibuh dijampi sigi unsut ngena untak jani sigi tedani alu alu dipiring ading sigi tau dipegai,dah megai kapak Luat,baru kitak ngasai aliran tenaga melebihi tenaga kitak empu.Keresa bala purih KP dambi pulai suba maia purih pantih sida tu dah tama pengarap baru....

Pulai agai jerita tadi..

Diak tudah Encharang alu engkecit alu nadai dipeda,meda bakanya diak sida kabukai alu engkecit memagang,enyau kerebak tawas ari dinga pangkong tawak rumah panjai sida Libau madah diri bisi pengerami.Nyadi maia nya sida Encharang tu baka temuai bukai enda dikelala Libau(Rentap) alu niki meh ke rumah panjai.Cukup panjai rumah sida Libau maianya,orang ba ujung setak rapas dipeda mata alu maia nya rumah maia agi bekakup(bersambung beantara tanju aja)pen baka nya meh.Maia endang maioh kitai iban ari skrang,batang layar,saribas,Lubuk Antu,Batang Rajang,ari Debak,ari Batang Lupar,Katibas,Batang Kanowit,enggau maioh sigi naka ulih datai maianya laban maia genap kitai iban maia bisi mimpi,bisi nabau Kampung Mali betesau ngasuh sida iban begerempuru ba Ulu Skrang enti enda sida ka tulah ka mati sakit ka mati lengit.Maia tu pengangkat Libau nyadi katuai serang katuai kota pengempu tongkat begetar tempa.Kelai Rentap ngentak ke tongkat ia ke tanah sigi berenyang sitek bukit,alu ia mega beseumbar Nabau Emperaja Ngempu Menua.Maia taun nya mina unggal Encharang enggau Mering aja ulih telaban ke Rentap enti saduai ia besatu nyadi sitik penusuk ti ulih munuh Rentap tang enda dasuh Kemping Padi saduai Sempulang Gana laban saduai enda buya bermunsuh enggau Rentap tauka Libau.Sigi disumpah enda berekak sida tiga ia.Maia nya endang maioh sida katuai kitai iban datai,berintai naka pemaioh duduk ba ruai.Maianya angkat manuk sabung Libau benama Minggat alu ngasuh bala anang richah laban piring pengalu ka dipiring Pangkalima Berandah katuai iban ari Sungai Engkarie ti beberita enggau penemu ngasal ke jelu jinak nyadi pemunuh sereta katuai iban ti cukup dikenangi bansa iban maia nya.Tuai endar tudah ia maianya.Tudah Seligie duduk ngimbai apai ia Encharang ba tisi,Seligie maia nya udah ka bujang tang endang sikal baka apai ia mega.Sida KP duduk ba tisi sereta ba setak din aja laban enda dikelala penama enggau mua.Diak Mering ti ngimbai Encharang nguis kaki tudah Encharang nunjuk ke ba depan mua saduai ia nya tak kah raja berani kitai iban niang Simpie Pala enggau bala.Tuai ga ia dipeda ari dijerita Seligie.Dasuh Libau ke tengah ruai ia tadi tang tudah madah ngelak ke bala bukai ko ia ga.Kebatang amai tudah tuai pedis isik meh nya laban jauh pejalai mina agi pen bebasa ke Pangkalima Berandah ti ka miring pengalu.Dah dipiring alu diadu alu bala bepun berandau.Randau Libau cukup manah ngemai bansa kitai iban ngaga kuta ba Ulu Skrang.Semua kitai iban maianya setuju memagang.Alu randau bukai nyentuk ke bepadah betesau enti Rajah ka nyerang sitek sitek menua sida dasuh betesau ngica bala ba menua nya ngadang alu ulih kaduak ari menua bukai ulih jejampat beguai ngesah nulung.Udah ambis utai dikerandau diak meh ai tuak alu dibantai memagang karuai ari sitik sitik bilik genap rumah panjai,peda meniga tajau singaraja ti kebesai amai dibantai.Tumpek Penganan enda ibuh ditusi sigi nya dibantai sereta asi pulut kasam jani ikan,salai,enggau maioh agi.Endang richah...Nyadi maia mensia sama bebungah tak maioh katuai tauka manuk sabung katuai sigi bebantai penemu diri ngujung tak temepik aja ilang ba tubuh diri,ambi ilang dik punggal,uji pantap agai aku ko kaduak ba diak nundi pangan diri,rindu meda utai bakanya laban sama kebal,udah palau peda engkecit siko iban ti benama Jetik alu muka kajat nyumbuh,peda tesepar sida ke indu lari,bala ke lelaki nyau nguing ke tisi,pama kajat nyumbuh tu.

p/s

Pama kajat nyumbuh tu dibantai cukup meri ati ketawa,orang ke ngajat tadi muka kajat nya alu ia ngaru ciak tauka ngunsut jari ia arok alu dipalit diunsut ia ba kena tegu ia enti ia negu orang nya,ahkai..Naka penatau orang menya begagai uwai.Nie ke tatau tauka lucu agi,belalai ia nyabut bulu utai alu dipegai ia.Ahkaiiii..ambis sida ke indu tesepar lari.Begik nya..Ni ke mancal agi ambi sida daun bau kentut tadi alu digusuk kasak amai ba jari alu dipampul ba idung kitai ti duduk.Ambis tekuak kuak kaduak ia nyium pemau nya.Maioh ulah utek gagai orang kelia enda sebaka kediato.

Pulai gai jerita ku tadi.

Udah Jetik muka kajat nyumbuh bepun meh ruai tacoh kulu kili alu engkecit inek Nanti alu muka kajat burung,peda sida kelaki berumban nguing ke tisi enggai kena tegu jari inek Nanti ti kena tegu sigi tau nyedia diri mua muyur laban sirih pinang.Peda tak kunyah inek nya sirih pinang alu alu unsut gai kasam ti paling bau amai.Bau but,hahhhh jaga kitai ko kaduak ba ruai.Dulu unggal Entalai kena unsut damping kami sabuat.Tak engkakah ketawa tudah Bikong,empai ketawa peda temapik mua ia kena tuku ngena kasam.Alu puas tudah engkecit ke tanju alu mandi ke ai sungai,capuh aja orang ketawa maianya.Tudah Mering enggau Encharang enda memunyi laban Simpi Pala majak merening saduai ia.Simpi Pala ka nenemu saduai ia tu ari meda gaya saduai ati diri nadai enggau orang ketawa mina tucum aja.Simpi Pala mega kala betemu enggau saduai ia ba Panggau Libau din alu ia nemu jerita dua iku dambu Keling diri menyadik laban Kemping Padi udah ngambu saduai ia nyadi ke anak sereta Sempulang Gana tu mega beambu diri menyanak enggau saduai.Nyadi Entalai tu pen bala KP mega ti ditulung Petara Biku dikumbai petara pengaya,Entalai tu meh kaya padi kaya reta tengkira,nama utai ka diulih ia sigi ulih dempu ia.Ia madik Mering kabiak amai.Entalai tu ka gegemuk mimit laban kuat mmakai tang ia bisi penemu nemu ngasal utai nyadi nyelai laban berajar ari akak ia Mering.Purih ia nyentuk kediato nemu ngasal utai bakanya.Entalai mega udah betapa kala betemu ngau sembilan iku menyadi petapa tuai bansa kitai ba Batang mandai.Ia mina ulih betemu 5 iku aja petapa dahnya nikal pulai laban enda tan ati diuji bala petapa nya tadi.

Nyadi jerita tu ku sambung baru ke pagila.
Jerita tu disalin aku ba bup Mary empu ti diambi DDS ba peturun Mary empu ba London din.Purih Mary tu dah pindah ke London maia Rajah Brooke badu merintah menua kitai.Diato peturun Mary tu enda nemu asal ia empu laban enggai kiruh agi ke purih pantih diri ari inek ia Manyie.