CHEMEGI CHARUT LAKI

1. Genteran – CHEMEGI JADI ENGGAU DELI

Ba Batang Ai ari ulu Simanggang dalam menoa sitak kedua bisi menoa ti dikumbai orang Tapang Emparaja Lubok Baya, Batang Ai Bila Sedi. Dia meh bansa Iban terengkah laban tasah ari pulau Jawa, Pulau Sumatra. Samoa bansa Iban ti angkat ari Pulau Jawa enggau Pulau Sumatra tepanggai telempai ba menoa dalamSarawak.

Nyadi laban bansa Iban ti dulu bendar datai di menoa Sarawak, dia sida diau di ulu sungai, laban nya nyamai endor sida ngidup ka diri. Nya meh datai ka kemaia tu kitai Iban selalu rindu diau di ulu sungai, laban nya sigi endang udah gaya pendiau tuai kitai dulu menya.

Nyau lama udah nya, baru bisi bansa bukai ti datai ari luar menoa tu lalu diau di Sarawak. Baka bansa China, bansa Melayu, sida nya datai dudi. Lalu sida iya diau di nanga ai baka di Kuching enggau di Lingga. Nya alai datai ka diatu kitai bisi meda bansa China diau di nengeri, lalu bansa Melayu pen bisi mega diau semak nengeri, lalu sida iya diau bekampong ari ulu tauka ari ili nengeri. Sida enda berumah panjai baka kitai Iban.

Nyadi leboh maia kitai Iban ti mangkang Tapang Emperaja Lubok Baya, Batang Ai Bila Sedi, dia pansut cherita siti.

Leboh maia nya kalia bisi orang lelaki siko benama Deli bebini ngambi Chemegi, indu sida serumah empu. Deli tu orang sigat gamal lalu Chemegi pan bajik. Nya alai patut bendar mega seduai iya jadi melaki bini.

Tang enda mukai-mukai bisi penanggol mimit leboh maia seduai deka nikah. Apai indai seduai sama enda ngasoh seduai iya nguai ka pangan diri, laban seduai iya sama anak tunggal orang, nya kabuah apai indai seduai sama nan ka seduai jadi.

Tang laban seduai sama keras ka pangan diri, lalu enda ulih tagang apai indai seduai, dia seduai diasoh jadi, tang sama enda ngibun apai indai diri. Seduai iya di asoh kediri. Apai indai seduai sama bisi mega meri seduai iya keresa, meri tengkira, meri seduai pinggai mangkok, timpa raga, periok genok, umbas kena seduai ngidup ka diri.

Seduai iya ngaga rumah nampong setak sepiak muak ari sida apai Deli. Seduai iya lantang bendar ati begulai enggau pangan diri. Seduai mega bebasa ka apai indai seduai. Deli tu bagas bendar ngiga ikan ngiga jelu, enti iya manjok enda kala iya pulai luchok, bulih pelandok chungkir kaki , enti iya meti enda kala iya enda mai jani betaring nyadi, enti iya nyala enda kala iya lebu nyawa, bulih jeliu betutu ikan padi.

Samoa sida sekayu rumah landu enda ulih kelayang kuku burong terebang, sekayu rumah panjai ludai-ludai ngakar tengang, sama rindu begulai sejalai enggau iya. Maia ngasu maia beburu, leboh mansai leboh nubai, maia nginti maia meti, sida serumah nya rindu bendar begulai engau iya. Nambah ka nya mega, Chemegi bidik bendar ngulu ka orang mansai nubai, ngiga tubu, ngiga paku.

2. Genteran – NGUNDANG PANGGUL

Leboh nyau maia bumai sida rindu bedurok enggau pangan. Nyadi laban Deli tegar bendar nebas, samoa orang deka magang bedurok enggau iya. Chemegi mega pantas bendar ngetau, nya mai indu sida sarumah deka bendar bedurok enggau iya.

Sida turun ari pagi datai ka malam, hari enda berasai apus, laban sida rindu bejako, gaga becherita enggau panan diri. Mulut bejako kimut-kimut, jari bekerja kebut-kebut. Samoa pengawa ti berat nyadi lempong, laban tuboh maioh sama begempong.

Nyadi sekali leboh maia orang nyau deka nebas, orang maioh pen sama terudus mansang turun ka umai. Nyadi tudah Deli hari siti baru nurun deka ngundang panggul iya. Leboh iya datai di tengah jalai mansang kumai dia iya ninga Ketupong bemunyi. Iya pen lalu pulai ka rumah, laban orang tuai menya agi bendar beguna ka burong.

Datai di rumah, dia bini iya nanya. “Lapa nuan tumu bendar pulai deh Deli ?” ko bini iya nanya iya. “Eh !” ko Deli, “aku ga lalu enda gawa, laban aku bisi ninga burong di rantau jalai.” “Enti kitai bisi ninga burong sebelah jalai kiai enda tau turun ?” ko bini iya nanya Deli. “Enda meh tau,” ko Deli nyaut iya,”Laban enti kitai enda peduli ka iya, tentu bisi penusah ninggang kitai.” “Enti baka nya anang meh ngelaban padah burong,” ko bini iya nganu Deli.

Hari siti tumu-tumu pagi nyau ga bala orang sekayu rumah nya nurun. Deli pen nyau ga mupok deka ngundang panggul iya baru. Leboh iya datai ba  setengan jalai iya mansang ke umai, dia iya ninga munyi burong Embuas.

“Nama meh penyadi aku tu dikeduan burong baka nya” ko Deli bejako kediri. “Nama utai dipadah ka burong nya ?” ko iya. “ka aku bedurok engau orang, panggul aku tu lalu apin diundang. Aku tu lalu bedau nebas, sekali mantap pen bedau meh aku tu bisi,” ko Deli gut-gut bejako kediri niti jalai. “Ka enda pulai enggai ka bisi penusah ga.” Tusah meh ati iya ngenang diri lalu bedau turun.

Datai iya di rumah, dia bini iya nanya Deli. “Lapa nuan tumu pulai seharitu deh Deli ? kati nuan bisi ninga burong baka kemari ?” ko bini iya nanya. “Eh !, bisi meh,” ko Deli nyaut bini iya. “Nadai meh penunga tua tu deh Deli,” ko bini iya nganu Deli. “Orang nyau nebas-menebas, nyau besai meh umai orang. Tua tu lalu bedau nebas, sekali mantap pen nadai meh tua tu. Mati meh tua tu dikeduan burong baka nya,” ko bini iya. “Nya meh,” ko Deli. “Ka tak ngelaban padah iya enggai ke kena penusah ga.” Deli enda mindah sahari nya.

Nyau hari siti, dia deh iya deka nurun baru ga ngundang panggul iya. Iya pen nyau ka datai ba tanah ti endor iya bumai, dia deh iya ninga munyi burong Pangkas. Nyau chaie-chaie munyi pangkas nya. “Oh “ ko Deli. “Nadai meh penunga aku tu deh. Orang nyau nebas-menebas aku tu lalu enda. Mati meh tu ila enda bumai,” ko Deli gut-gut niti jalai.

Datai iya di rumah, iya lalu bebungkor enggau pua. Bini iya nadai dia leboh nya, nyau mandi ka ai. Datai bini iya di rumah, iya meda Deli endang udah garing-garing bebungkor enggau pua. Bini iya lalu ngerak iya. “Lapa nuan deh Deli ? Kati nuan sakit tauka nuan bisi ninga burong baka kemari ?” ko bini iya nanya Deli.

“Au, bisi meh aku ninga burong,” ko Deli. Nyadi sekali tu bini iya lalu nanya ka nama burong ti didinga iya tiga hari ke udah nya. Ko iya “burong nama ti didinga nuan alai nuan pulai ngelamatu deh Deli ?” “Terubah iya aku ninga Ketupong, udah nya kadua hari, dia aku ninga Embuas. Udah nya tadi leboh aku baru datai ba tanah ka endor aku manggul, dia aku ninga Pangkas ngenjing chaie-chaie. Aku pen lalu pulai enda nyadi nebas,” pia ko saut Deli.

3. Genteran – SAMA NGUNDANG PANGGUL

“Nama reti burong nya deh ?” ko bini iya nanya. “Eh,” ko Deli “enti nitih ka padah orang ketuai, enti kitai enda pulai, tentu bisi penusah ninggang kitai.” “Enti munyi nya Deli,” ko bini iya, “aku deka enggau nuan turun pagila.” “Enti nuan deka enggau aku nya ke lebih agi manah,” ko Deli. “Tang meh aku enda kala nebas,” ko bini iya nganu Deli. “Nya meh, nguji, indah deh leboh kitai agi mit enda meh kitai nemu makai, samoa pengawa enti enda di pelajar ka kitai, tentu kitai enda nemu,” ko Deli.

Nyadi hari siti, iya nya hari ti ka empat, Deli pen lalu nurun ke umai, dia deh seduai bini iya tumu-tumu ngansah duku, deka kena seduai nebas sahari nya. Hari pen tampak tapa kaki seduai pen lalu mupok nurun ke umai. Nyau kalama seduai bejalai, dia deh bini Deli nanya iya. “Dini alai nuan ninga burong deh Deli ? ko iya. “Nya, di belakang mungu nya aku ninga Ketupong,” ko saut Deli.

Seduai pen datai ba endor alai Deli ke ninga Ketupong, da deh iya meda Ketupong duduk nyerungkong ka tisi jalai nganti Deli ti mansa nurun kumai. Agi jauh, bedau alai Deli ulih ngelala sapa orang nya, dia iya ninga orang nya ngangau ka iya. “Oh Deli ! Sampal seduai turun saharitu ?” “Au, sampal,” ko saut Deli. “Manah meh nya,” ko orang nya, aku tu Ketupong, aku deka enggau seduai turun,” ko iya. Orang nya pen lalu nitih ka Deli seduai bini iya, lalu entudi seduai bejalai.

Enda lama udah nya Deli lalu malik ka belakang, peda iya nadai orang agi nunda udi seduai. Nya baru iya nemu nya ukai mensia. “Oh, sapa meh orang nya tadi ?” ko Deli nganu bini iya. “Eh ! Nyangka iya nya Ketupong ti didinga nuan suba,” ko bini iya. Seduai pen lalu mupok mega bejalai.

Enda lama udah nya bini iya lalu nanya Deli baru. Ko iya nanya Deli, “Dini alai nuan ninga Embuas deh Deli ?” “Nya dia ba emperan nya,” ko Deli. Datai seduai ba emperan entap nyapan dia seduai iya meda orang siko, enda kebut-kebut nyandar dudok datas batang ba tisi jalai. Sebedau sempat alai iya ngangau, dinga iya orang nya nyapa iya. “Oh Deli !” ko orang nya, “kati seduai deka turun ?” “Au,” ko Deli, “ka turun meh kami duai tu,” ko iya. “Manah meh nya,” ko orang nya tadi,”aku deka enggau seduai turun,” ko iya. Sebedau sempat alai Deli nanya ka nama iya, dia orang nya madah ka nama diri. “Aku tu Embuas burong pantas tau ayas baka remang. Embuas aku tu burong bisa changka di nyawa pun rang.”

Iya pen lalu mupok nunda udi seduai. Mupok ga sida tiga bejalai. Enda lama udah nya Deli malik ka belakang, peda iya orang nya nadai agi. “Nyau kini ka orang nya tadi deh Chemegi ?” ko Deli nganu bini iya. “Sapa orang nya tadi ?” ko Deli. “Nyangka nya meh Embuas ti didinga nuan suba.” Ko bini iya. “Nyangka iya meh nya kini, laban ti enda ngelala,” ko Deli.

Udah nya, mupok ga seduai iya ari nya. Enda lama udah nya, dia deh bini iya nanya Deli baru. “Dini alai nuan ninga Pangkas deh Deli ?” ko bini iya. “Nya ba munggu nya,” ko saut Deli. Seduai pen datai ba munggu madang seru, dudi di batak dulu salidak nyadi sana, perepah madang ubah dudi ditebang dulu seluntang ninggang menoa. Dia deh seduai meda orang endang udah nganti ba tisi jalai. Sebedau sempat alai Deli nanya, dia orang nya nganggau ka iya.

“Oh Deli, tumu bendar seduai saharitu ?” ko orang nya nganu seduai melaki bini. “Tumu meh tu,” ko Deli nyaut iya, “laban kami duai tu lalu bedau turun, sekali mantap pen nadai meh kami duai tu udah nebas. Nya alai kami duai tu sampal, lalu tumu nurun saharitu, ngambi ka mupok mimit pama meh,” ko Deli. “Eh ! Deli,” ko orang nya,”nadai nya dipeguai ka seduai.” “Oh ! Orang nyau bulih bendar turun,” ko Deli. “Lagi aku nyaup seduai turun, aku tu Pangkas ti didinga nuan kemari, lalu orang bukai pen bisi mega deka nyaup nuan, iya nya Ketupong enggau Embuas. Kami tiga tu meh nyaup nuan lagi,” pia ko orang nya. Orang nya pen lalu ayas nadai dipeda seduai agi. Seduai pen lalu bejalai berari. Enda lama udah nya seduai lalu datai ba tanah alai Deli manggul.

Datai seduai dia, peda seduai bisi orang tiga iko, endang udah nganti ba endor Deli ke manggul. “Nama nyin bisi orang deh Chemegi ?” ko Deli, “siko nya baka gamal orang ke madah ka diri Ketupong, lalu siko nyin baka gamal orang ke madah ka diri Embuas, lalu siko nya muak ari kanan nya baka gamal orang ke madah ka diri Pangkas.”“Nyangka iya meh nya Deli,” ko bini iya.

Datai seduai ba orang nya, sebedau sempat alai Deli nanya, siko ari sida tiga lalu bejako nanya Deli. “Ditu alai nuan deka bumai ?” ko iya. “Au, ditu meh,” ko saut Deli. “Manah endar tanah ditu, puas nuan ngangkut padi ari umai nuan tu ila,” ko orang nya. “Manah bendar meh nya, enti Petara deka meri baka nya,” ko Deli.

Sida pen sama dudok berandau. “Nyadi kami tiga tu deka nyaup nuan nebas; aku tu Embuas, iya nya Ketupong, lalu siko nya Pangkas. Kami tiga tu meh ti udah didinga nuan leboh nuan ti deka ngundang panggul nuan suba. Mupok meh kitai nebas Deli, enti nuan udah ngansah,” pia ko orang nya. “Udah aku ngansah,” ko Deli, “aku udah ngansah di rumah din tadi.” Orang nya lalu nanya Deli baru, “ni naka nuan deka bumai tu Deli ?” pia ko iya. “Tu, samoa munggu tu lalu ngagai lengkap nyin, lalu ngerampit munggu nyin.” “Enti pia ari tu meh kitai belaboh nebas Deli,” ko orang nya nganu iya.

Sida empat pen lalu belaboh mega nebas. Nama deh tebas sida empat dia, nyau munyi empas pasang mangka, pantap sida empat nyau munyi auh pangka angin bua. Abis munggu siti ngerampit munggu siti. Abis meh samoa ambu Deli ditebas sida dia,  kayu ti mesai betis, mesai pala, mesai kisar, tajar sekali. Nama deh nyau sedandang umai Deli laban sida dia. Deli empu enda tentu nebas, iya semina ngerintis tisi babas aja. Tang sida tiga nya bendar agi nebas, lalu apin tengah hari, alai umai Deli pen tembu ga ditebas.

Udah umai Deli tembu tebas, sida tiga nya lalu mai seduai melaki bini nya pulai. “Qh Deli,” ko orang nya, “pulai kitai, umai nuan ga udah tembu tebas.” “Pulai meh, “ ko Deli nganu sida tiga nya. Sereta Deli mai sida tiga pulai, dia sida tiga nya tadi tak ayas nadai dipeda seduai agi. “Antu meh nya tadi,” ko Deli nganu bini iya.

Seduai pen lalu mupok mulai ka diri ka rumah. “Besai meh umai tua tu Chemegi,” ko Deli, “enti tu ulih intu tua pama meh,” ko iya. “Ukai enda meh nya Deli, mantun iya ti puas, tang nyangka ditu enda tentu berumput,” ko Chemegi. “Dulu suba, leboh sida aya Apai Buda bumai ditu enda ga tentu maioh rumput,” ko Deli.

Nyau kelama seduai bejalai dia enda berasai seduai nyau datai ba pendai sida iya empu, laban ti tembu bekelakar sebelah rantau jalai. Datai ba pendai seduai pen lalu mandi. Benong seduai mandi dia Apai Deli pen datai ari rumah mansang deka mandi. Iya lalu nanya Deli, “Kini ka seduai tadi Deli ?” “Eh !” ko Deli, “nebas dia, ba Munggu Ruan.” “Ni naka pumai seduai deh ?” ko Apai iya nanya. “Nya meh samoa Munggu Ruan lalu nerampit Emperan Baling lalu datai di tinting ari baroh tapang tesat, Aki Ngali,” ko Deli. “Pemesai udah ditebas seduai ?” ko apai iya nanya Deli. “Abis tebas kami duai tadi laban bisi orang nyaup,” ko saut Deli. “Sapa orang nyaup seduai deh ?” “Entah enda ngelala orang nya ; tiga iko sida iya, tang meh orang nya kering bendar nebas. Kayu ti mesai pala, mesai kisar abis ditajar sekali. Nya alai kami duai Chemegi enda apus hari saharitu.”

Udah sida mandi, sida tiga pen sama pulai ka rumah. Lemai nya maioh bendar orang nunga Deli nanya ka berita nagai iya. Iya pen lalu nusoi berita pasal orang tiga iko nyaup iya nebas. Samoa orang bela rindu ninga berita nya.

Nyadi orang sakayu rumah landu, enda ulih kelayang kuku burong terbang, sakayu rumah panjai lelundai-lundai ngakar tengang, pagi hari nyau ga nurun nebas. Tang Deli seduai bini iya nadai agi pengawa di umai, laban udah abis ditebas. Nyau ga maia nebang. Udah samoa orang sarumah nya tembu nebang, sida pen lalu berunding ka nubai mansai, ngambi ka bisi ka lauk sekumbang nugal.

Sida sarumah nya sama bela kisok begiga ka lauk, laban nganti nunu. Barang ke manjok nyau begiga ka pendok, barang ke mansai nyau begiga ka tubai. Samoa sida ke begiga ka jelu, begiga ka ikan bela bulih magang, laban ikan enggau jelu agi bisi, lalu myamai alai begiga. Tambah mega Deli endang orang ke bidik ngulu ka orang begiga jelu; bini iya pen bidik ngulu ka orang mansai nubai.

Reban sida iya pen nyau ga chukup rangkai, umbas endor nunu. Sida sarumah pen lalu belaboh nunu. Taja umai sida iya enda begulai, tang sida sama bebai sereta nunu. Deli pen enggau orang nunu sahari nya. Nyadi reban Deli endang sigi rangkai ari reban sida bukai, nya alai umai iya angus bendar ditunu, lalu samoa umai sida sarumah pen sama bela angus magang, laban kamarau pan bisi.

Udah samoa sida sarunah sama tembu nunu, sida pen belaboh nugal. Sida sakayu rumah nya sama bedurok magang. Sida iya nugal sama enggau indu lelaki, lalu laban rumah panjai, tuboh sida pen maioh enda berasai umai abis tugal sida; datai ka umai dua-tiga pintu abis ditugal sida dalam sahari. Semina umai Deli aja ti enda abis ditugal sida dalam sahari, laban umai iya bengat besai ari enggi orang bukai.

Udah tembu nugal, sida lalu mupok begaga ka langkau umai. Deli empu ngaga langkau besai bendar, laban ngadang diri bemalam ari maia mantun datai ka ngetau. Udah langkau iya tembu, seduai melaki bini pen lalu bemalam di umai.

4. Genteran - MANJOK

Seduai melaki bini bagas bendar turun. Leboh maia mantun seduai mantun ari pagi datai ka lemai, lalu padi pen manah bendar laban nadai maioh rumput. Nyadi sekumbang mantun tu, Deli nadai hari limpang begia ka jelu enggau ikan ka lauk seduai. Udah seduai iya tembu mantun, padi pen nyau galak bendar, lalu seduai iya nadai tentu pengawa maia nya, laban semina nganti maia ke ngetau.

Nyadi hari siti, leboh seduai iya dudok makai, dia deh bini Deli bejako, ko iya. “Kati kampong ti ari atas umai tua nya bisi enda kini jelu takua burong dia, Deli ?” “Eh, enti bisi jelu dia, bruong pen bisi meh,” Ko Deli. “Lapa nuan enda manjok ka tua deh, tua tu nadai utai ka lauk,” pia ko bini iya nganu Deli. “Bisi meh ati aku deka manjok, tang ngelamatu tua ga mantun, ila deka aku ngiga pendok,” ko Deli.

Pagi siti Deli pen lalu nurun ngiga pendok. Udah iya bulih pendok, iya pen lalu pulai ka langkau. Lemai nya iya lalu belaboh nali pendok nya tadi ka panjok iya. Pendok pen uah ditali iya, lalu samoa utai udah kemas magang semina nganti ka nurun manjok.

Dua hari udah nya, iya pen lalu nurun manjok ngagai kampong ti ba tisi umai iya. Iya nyabar panjok iya sahari nya. Hari pen kira pukul enam lemai panjok iya pen abis ga ditan iya. Iya pen lalu mulai ka diri ka langkau. “Nama nuan laun bendar pulai deh Deli ?” ko bini iya nanya. “Dini enda laun peda meh pemaioh panjok ti ditan aku, nyau ka dua ratus mata,” ko saut Deli.

Dua hari udah nya Deli lalu ngabas panjok. Datai iya ba panjok, peda udah teberingkas magang; abas iya kia, peda nadai ga bulih; abas siti nadai ga bulih. Nyau kapuas iya bejalai niti sabar panjok, dia iya bisi ninga utai bemunyi kerus-kerus. Iya lalu ngetu, enda inggar, deka meda nama utai ti engkerus nya. Peda iya deh tudah Pelandok.

Pelandok nya tdi tak bejalai ngagai panjok ia. Datai iya ba panjok, iya lalu ngenong meda amba endang udah ngipa di tengah jalai, baur panjok endang udah ngendok nganti ka ngesai. Asor ka Pelandok ga pala iya ngagai amba panjok, batak iya baru ga. Asor ka iya baru, nyau ga dibatak iya. Nyau kapuas iya ti baka nya, enda liat agi ati Deli lalu diambi iya rangas lalu di tikam ka iya ngagai Pelandok. Ninga utai tak semerap semak iya, Pelandok pen merejok lalu disintak panjok.

“Nya, nuan disintak panjok aku,” ko Deli nganu Pelandok. Deli pen lalu mansang ga kia, ambi iya randau lalu ditanchang iya meh Pelandok nya tadi. Udah nya iya lalu mansang baru ngagai ujong panjok. Peda iya mangka ga siti, bejalai ga iya ngagai siti, peda iya mangka ga. Maioh bendar ulih Deli sahari nya, bisi meh nya burong, lalu bisi meh nya jelu. Udah nya Deli lalu pulai ka langkau. Datai iya di langkau, dia bini iya nanya.

“Bisi bulih panjok nuan Deli ?” ko iya. “Bisi,” ko Deli, “nya deh, aku engkah ba baroh langkau.” Bini iya pen lalu nurun ka baroh langkau, lalu meda utai ke ulih Deli manjok. Udah nya seduai sama betunu ka burong enggau jelu ti ulih Deli manjok. Kenyang bendar meh seduai iya makai pagi nya belauk burong enggau jelu.

Hari siti nyau ga Deli ngabas panjok iya, lalu bulih ga burong enggau jelu. Genap hari iya ngabas panjok , lalu genap hari ga bulih burong enggau jelu. Nyadi pagi siti hari baka ti ka ujan, Chemegi pen lalu nanya Deli. “Lapa nuan enda nabas panjok pagi tu deh Deli ?” ko bini iya nanya dia. “Hari tu tak baka ti ka ujan, lembau bendar aku bejalai dalam kampong,” ko Deli. “Enti enda diabas nuan, tentu jelu enggau burong ka pangka panjok nyau buot,” ko bini iya nganu Deli. “Nya meh,” ko Deli, “ka ga aku ngabas lagi, tang diatu agi lembau bendar.


5. Genteran – CHARUT LAKI

Matahari pen nyau manchar, lalu babas pen rangkai, Deli lalu nurun ga ngabas panjok. Enda lama udah iya nurun, kira bisi satengah jam pia, bisi orang siko datai niki ka langkau seduai bini iya. Bini Deli benong kisok besapu ka bilik, ngemas dapor, lalu nyendia ka diri ka nyumai nganti Deli pulai ngabas panjok. Orang nya pen lalu niki ka langkau, lalu nanya Chemegi.

“Udah berapi nuan Chemegi,” ko iya. Chemegi lalu malik, peda iya nya tak Deli, laban pendiau orang nya sigi sabaka bendar enggau laki iya Deli, pemesai sama bela, moa mata iya pen sama sabaka enggau enggi Deli. Nya alai iya ngumbai nya sigi amat Deli, iya lalu nanya. “Bisi bulih panjok nuan Deli ?” ko Chemegi nanya. “Eh,” ko orang nya nyaut, aku enda nyadi ngabas panjok, laban hari enda tentu manah, lalu lembau bendar bejalai sebelah kampong,” ko saut iya. Udah nya seduai berandau lalu betundi enggau pangan diri.

Nyau kapuas seduai dudok berandau, seduai iya pen nyau gali belanggar kaki, bepaut jari. Nyau kalama seduai ke baka nya, dia Deli ke endang amat laki Chemegi pen pulai ga ngabas panjok. Leboh Deli nyau semak langkau dinga iya bisi orang berandau enggau bini iya dalam langkau. “Nyangka sida Apai datai ari rumah,” ko ati iya bejako kediri.

Leboh Deli nyau datai tama dalam langkau, dia iya meda Chemegi enggau lelaki siko ke sebaka gamal enggau iya tak naka pengerindu benong betundi enggau pangan diri. Chemegi tekenyit bendar ati leboh iya meda Deli pulai ngabas panjok. Orang nya pen lalu angkat ngesai ka diri. Lelaki nya enggau Deli pen lalu berekak. Langkau nyau guyat-guyat laban seduai berekak, ama nya Deli ari baroh, ama nya orang nya ga ari baroh iya.

Nyau kapuas seduai iya berekak dia seduai pen lalu laboh ka tanah. Datai di tanah dia seduai iya bendar agi berekak. Rumput abis tusut, babas abis tawas, kena jabang, jabang tumbang laban seduai ke belaban dia.

Meda seduai enda badu baka nya, dia bini Deli lalu belanda ka rumah lalu madah ka orang di rumah, pasal Deli ke berekak enggau temuai siko ke sebaka gamal enggau iya nya. Ninga berita munyi nya tak nyelai bendar, dia sida sekayu rumah landu enda ulih kelayang kuku burong terebang, sekayu rumah panjai lundai-lundai ngakar tenang, sama angkat lalu belanda ngabas Deli ke ngelaban orang ti sama sebaka gamal enggau iya.

Leboh orang datai ba umai, peda padi abis mati kena duju seduai ke berekak dia. Orang pen lalu ngerara seduai ke belaya. Seduai iya pen sama enda tentu dapat agi, laban nyau puas belaban sahari nya. Dia orang sama alit ati meda seduai sabaka gamal. Orang pen lalu mai seduai iya pulai ka rumah. Datai di rumah, dia orang sama tekenyit magang meda pendiau seduai bengat sabaka bendar.

Malam nya apai Deli lalu ngempuru ka samoa sida sarumah, lalu ngasoh Tuai Rumah sida ngator laya Deli enggau temuai nya. Tuai Rumah sida lalu nanya seduai iya; “Sapa nama nuan ?” ko iya nanya Deli. “Aku tu Deli laki Chemegi,” ko saut Deli. “Sapa nama nuan deh ?” ko Tuai Rumah nanya orang nya. “Aku tu meh Deli laki Chemegi,’ ko saut orang nya.

Nya alai Tuai Rumah sida meda gamal seduai sabaka, enda nemu bagi ni iya ke Deli enggau ni iya ke ukai. Ensepi diri baka nya, iya lalu ngasoh Chemegi milih ka diri. Tang Chemegi enda nemu milih ka diri laban seduai nya sama sabaka.

Meda Chemegi enda nemu milih ka diri, dia Tuai Rumah lalu ngasoh sida bechara ngagai Penghulu. Leboh Penghulu meda gamal seduai nya sama sabaka bendar, nadai nyelai ari pangan diri, dia iya alit bendar ati. Nya alai iya lalu ngasoh Chemegi milih seduai nya ka diri empu, sapa ke sigi laki iya. Tang Chemegi madah ka diri enda nemu milih, lalu minta ator Penghulu.

“Sapa ti kadeka nuan ?” ko Penghulu nanya Chemegi. “Enda aku nemu bagi ti di kadeka aku, laban seduai nya sama sabaka," pia ko saut Chemegi ngagai Penghulu sida. “Enti nuan enda nemu,” ko Penghulu, “manah kita ngagai Dato.” Sida pen lalu bechara ngagai Dato. Datai ba Dato, dia iya lalu nanya Penghulu. “Kati pasal pemutus pechara sida tu ?” ko iya. “Aku ngasoh Chemegi empu milih ka diri ni ke amat laki iya. Tang Chemegi enda nemu milih ka diri laban seduai nya sama sabaka. Nya alai aku ngasoh sida tu nunga nuan,” pia ko saut Penghulu madah ngagai Dato.

Udah nya Dato pen lalu bejako ngagai seduai ke lelaki nya. Ko iya : “Seduai tu diatu bisi dua iko sama ngumbai diri laki indu nya. Lalu seduai mega endang patut bempu ka indu nya. Tang dalam adat kami enda tau lelaki dua bempu indu siko. Dulu suba, indu tu endang bisi laki ke semina siko aja., tang diatu seduai nyau dua iko ke sama sebaka gamal ka bempu iya. Nya alai aku nanya seduai, sapa seduai ti laki dulu indu tu, lalu nikah enggau iya ?” pia deh ko Dato. Seduai nya pen sama nyebut , “Aku tu laki dulu iya, lalu aku meh enggau iya nikah.”

Dato pen lalu ngenong ninga seduai sama ngumbai diri laki Chemegi. Iya pen lalu bejako baru, ko iya : “Nyadi seduai sama ngumbai diri laki indu tu, nya alai enti seduai ngambu, nyaru diri laki iya, tauka laki datai, laki sangkai, barang sapa datai dudi lalu deka ngalah ka laki dulu indu tu, seduai tentu kena tinggang penyalah. Nambah ka nya mega, nya tentu salah laban udah butang,” pia deh ko jako Dato nganu seduai iya nya tadi.

Seduai iya pen sama sereta nyaut, “Aku nyanggup samoa utai nya.” “Nyadi laban seduai udah sama nyangup samoa utai tu, nya alai aku ngasoh seduai belaban tama ke dalam butol,” pia ko jako Dato. Dato pen lalu ngambi butol ti endang sigi udah disedia ka enggau tensang iya. Ko Dato bejako enggau seduai iya. “Sapa seduai ti sigi laki Chemegi bendar, iya tentu ulih tama dalam butol tu, tang enti iya ukai laki bendar, semina ngambu aja, iya tentu enda ulih tama butol tu.”

Nya alai Dato lalu ngasoh Deli dulu tama ka dalam butol nya. Deli pen lalu nguji ka diri tama, tang dini iya ulih, laban lubang butol nya semina teman tunjok aja. Bendar meh tudah Deli nguji deka nama ka diri ngagai lubang butol nya, laban takut ka diri alah laban lelaki siko nya tadi. Bangku abis tekebu, dumbak abis tebabak, meja abis belah dua, dinding abis tepelanting laban iya mengkasak deka nama ka diri dalam butol. Tuboh iya pen nyau basah laban peloh empa pemendar iya nguji deka tama butol.

Udah nya Dato pen lalu ngasoh lelaki siko nya tama dalam lubang butol nya. Orang nya pen lalu muchau munyi Melanau nimbau bangkong, lalu bejeluka munyi China dalam bandong, lalu bejako munyi Sabaru dulu ujong.

“Ni kita ribut bepuput bebuli nyadi, ni kita biau balai datai ari telasai tisi langit lati. Asoh aku tu mit mesai geraji, asoh aku tu pandak enda bulih sasuku satu inchi,” pia ko sampi lelaki nya.

Ribut pen lalu betiup pulas uchong, angin pen lalu bepusin inggar berengong. Dinga sida utai berauh, nyau munyi ti ruboh rumah nya. Pending ka langit munyi ti ba tanah, pending ka tanah munyi ti ka langit. Orang nya tadi lalu ngepal diri. Iya lalu engketut nyau enda bulih sajeput genggam meranggang, iya lalu ngetak ka diri pandak mit ari sintak indu gerinang. Iya pen lalo tama ka dalam butol nya tadi.

Udah lelaki nya ulih tama dalam butol nya, dia deh Dato pen lalu bejako ngagai orang maioh. “Nuan tu ke sigi empu bini,” ko iya nganu Deli,”laban nuan enda ulih tama lubang butol nya. Laban lelaki siko nya tadi ulih tama ke dalam butol, nya nunjok ka iya tu ukai kitai mensia, tang iya nya antu jai, deka ngachau kitai mensia. Nya alai laban iya ngembuan runding ti enda manah baka nya, iya patut bendar nerima ukom ke berat.”

Dato pen lalu ngeletak ukom bunoh ngagai antu nya. “Iya tu patut dibuai ka dalam ai, lalu butol tu tating enggau batu awak ka iya enda melepong,” ko iya. Udah nya samoa orang dia lalu manjong gaga ati. Sida pen lalu nurun ka ai, lalu muai butol nya ka dalam ai. Enda lama udah nya, bala sida Deli pen lalu mulai ka diri ngagai rumah sida empu. Deli seduai Chemegi lalu begulai baka selama, nadai utai nama-nama.