DAYANG RIDU
Nyadi ensera tu ditusoi berengkah ari Bujang Kerimpak Labu ke ngajih ka burit Dayang Ridu lekat ba batu, nyadi iya ti ngajih ka nya leboh iya belalai ba selepak batu, seberai indu nya ke mandi ba pendai sida.
Iya ngajih ka burit Dayang Ridu lekat ba batu lalu udah nya iya ngajih ka ai bah tunggal. Udah iya ngajih ka nya, bah tunggal pen lalu datai ga, burit indu nya pen lekat ga ba batu. Laban Bujang Kerimpak Labu tau ajih, nya alai ai pen ngenyit bah, nya ngasoh indu nya beguai-guai deka pulai ka rumah takut ka diri ampoh bah ; leboh maia iya deka ngangkat ka diri, dia iya ensepi burit diri tak lekat ba batu. Ensepi utai asai nya, iya lalu nyerarat sereta ngangau ka apai ia minta ambi.
“O, Apai ! O, Apai ! Ambi aku tu. Enda nemu kabuah burit aku tu tak lekat ba batu tu ! Jampat ka nuan, enggai ka aku rarat ditaban ka bah tunggal tu lagi,” ko indu iya rauh-rauh ngangau ka apai iya. Tang apai iya lalu enda ninga kangau iya. Meda apai iya enda ninga, nya alai lalu inggar agi ga iya ngangau baru.
“Jampat, oh apai ! Ambi aku tu ! Mati aku tu lagi ! Oh, apai !” ko iya rauh-rauh ngangau enggau sabak-sabak.
Udah nya baru apai iya ninga kangau iya. “Oh, nama utai dikangau ka Endu din,” ko apai iya. Iya lalu belanda nurun beguai-guai ka ai. Datai iya dia meda anak dara iya ngeringak dudok ba ai sirut-sirut nyabak, madah ka burit diri lekat ba batu enda ulih ngangkat ka diri agi. Lalu apai iya pan abis ga ati meda ia tau bah nadai ujan. Dia meh tudah Dayang RIdu ngeringak nyabak teki-teki.
“Jampat ka apai ! Ambi aku tu ! Peda nuan burit aku tu tak lekat ba batu lalu enda ulih tarit aku agi,” ko iya. “Amat nya Endu, enda beduan aku nuan ?” pia ko apai iya. “Enda apai,” ko iya, “Jampat ka nuan !. Ambi aku tu ! Peda ai tu nyau bah deh, enggai ka aku rarat lagi.”
Udah nya nurun meh apai iya, ngambi iya. Datai iya ba Dayang Ridu lalu ditanggong iya, peda iya tak amat lekat ba batu. Meda bakanya lalu ditanggong apai iya enggau naka ulih deka ngangkat ka iya. Dia meh indu nya seruan rauh-rauh ngangau madah ka diri pedis laban apai ke ngulih ka iya. “Akai apai ! Akai indai ! Anang tekelalu balat pedis bendar burit aku nya,” ko iya. Ai pen nyau mansang besai nyau datai ba punggong iya diatu.
Ninga iya seruran rauh-rauh bakanya apai iya pen mansang tusah ati, enda nemu chara agi, meda iya enda ulih angkat ka ari iya ke dudok mandi. Ensepi diri enda nemu chara ngulih ka anak iya lekat ba batu, laban ati iya nyau kesal, takut ka anak iya mati teruju bah, nya alai iya lalu ngangau ka Bujang Kerebau, Bujang Babi enggau Igat Riang kebisi bemain enda jauh ari nya.
“Ni kita Bujang Kerebau, Bujang Babi enggau Igat Riang ! Tulong aku tu ngulih ka endu nya lekat ba batu !” ko apai Dayang Ridu.
“
Udah nya datai ga sida tiga dia udah dikangau ka iya. Nyadi Igat Riang nya endang deka betunang enggau Dayang Ridu. Sereta sida datai dia lalu nanya Raja Ribut.
“Nama utai dikangau ka nuan deh aya ?” ko sida.
“Peda kita burit Endu nyin tak lekat ba batu, lalu enda ulih ngangkat ka diri agi ari batu nya. Aku nyau enda nemu chara, enda nemu kabuah utai nyelai nya tau nyadi ba iya, nya kabuah aku ngangau ka kita tiga,” ko Raja Ribut. “Nya alai sabarang kita tiga tambi ka Endu nyin, nya meh nyadi ka laki iya,” ko apai Dayang Ridu nampong jako ia enggau sida tiga.
Sida tiga nya tadi lalu berebut deka dulu, siko madah ka diri deka dulu, lalu siko madah ka diri ga deka dulu. Nyadi meda sida tiga nyau berebut bakanya, dia Raja Ribut lalu bejako baru.
“Barang sapa kita bisi tandok nya meh dulu,” ko iya.
Nya alai laban Kerebau bisi tandok, iya meh dulu. Ah, ninga munyi nya pedis deh ati Babi seduai Igat Riang ka Kerebau lalu ko seduai ;
“Sepi asai tandok iya lagi tanggal laban batu nya.”
Udah nya nurun meh tudah Kerebau ka ai ngagai Dayang Ridu ka lekat ba batu. Datai iya dia lalu ditandok iya batu ke alai indu nya lekat. Udah nya lalu manjong ga iya, “Em ! Em ! Em !” ko munyi panjong tudah Kerebau. Tandok, tandok iya ga batu nya. Angkat enda mukai-mukai ga lalu ngelidas tandok iya tekena ka burit Dayang Ridu.
“Akai ! Akai !” ko Dayang Ridu. “Lapa nuan nandok burit aku.” Tandok Kerebau seruran kena burit Dayang Ridu berari-ari.
“Oh ! Enti bakanya anang nuan agi,” ko Raja Ribut. “Nuan ukai ngulih ka anak aku, nuan samina rindu nandok burit iya,” ko iya. “Enda aya.” Pia ko Kerebau, “Batu ke ditandok aku.”
“Ee ! Berani endar nuan ngemanggar nya ngelaban aku,” ko Raja Ribut. “Enda nuan ninga Endu tak seruran rauh-rauh pedis kena tandok nuan.”
“Alau, uji nuan Babi ! Ambi manah-manah ka iya nya. Anang baka Kerebau radi,” ko Raja Ribai ngasoh Babi. “Au meh aya,” pia ko Babi. “Aku endang enda muai jako nuan aya,” ko iya.
Udah nya Babi pen lalu nurun ga ka ai. Endang enda chechamang lalu dipangki iya batu endor Dayang Ridu dudok. Bah diatu udah besai bendar, dia deh iya nyau deka ampoh laban ia. Moa sida empat ke dia nyau nemaram chelum meda indu nya lalu enda ulih ambi. Sida nyau abis chara abis daya ngulih ka iya.
Udah nya baru Bujang Kerimpak Labu ngayan ka diri lalu ngangkat ka Dayang Ridu. Burit iya pen terangkat ari batu, ai pen surut ga bah.
“Nadai endar ga penemu sida,” ko iya ngelesay ka sida, “Alah bendar sida kena akal aku.” Ko iya. Lepas nya iya lalu rakah-rakah katawa ka sida, ngerising ka Kerebau, Babi enggau Igat Riang ke enda tangkat ka Dayang Ridu.
“Nadai ga tulang sida tiga, alah laban aku ke gari kerimpak labu,” ko iya.
Udah nya Bujang Kerimpak Labu pen gaga bendar ga ati laban semaia apai Dayang Ridu sabarang orang tangkat ka anak iya ke lekat burit ba batu lalu jadi engau anak iya nya. Bujang Kerimpak Labu ingat ka jako nya tadi, nya alai iya lalu ngumbai nadai orang bukai bebini indu nya, taja pia, bisi ga ati iya ninding mimit laban iya nemu indu nya rindu agi ka Igat Riang.
2. DIGAYAP ORANG BUJANG
Nyadi laban Bujang Kerimpak Labu ke enda tau bejalai ko iya, nya alai iya dibinching Dayang Ridu niki pulai ka rumah nengah jalai pendai. Indu nya mimit pen nadai ga ati berunding deka belaki Bujang Kerimpak Labu laban ati iya nadai mimit dibai rindu ka utai ngenyai nya, laban betati ka iya endang kerimpak labu bendar.
Leboh Dayang Ridu minching iya pulai ka rumah, dia iya berunding dalam ati iya din ;
“Enda aku nemu belaki utai bansa tu, tang ti nadai chara bukai, kati ko enda jadi enggau iya, laban iya bangat udah besai bendar tulong enggau aku, ngidup ka nyawa aku,” ko ati Dayang Ridu din. “Enti enda ditulong iya tentu aku udah mati laban bah tadi. Tambah mega apai udah besemaia, barang sapa tambi ka aku lalu jadi enggau aku,” ko iya berunding dalam ati diri.
Laban Dayang Ridu nadai berunding mimit ka Bujang Kerimpak Labu nya patut ka laki iya leboh iya minching iya ari ai, nya alai datai ba pala tangga, dia iya ngait ka kerimpak labu nya ba puting lalau, enggai mai iya tama ka rumah, laban iya enda nemu guna enggau utai bakanya gamal, nadai tau dikena apa-apa. Dayang Ridu seduai apai iya lalu tama ka rumah, lalu enda ingat ka tudah Bujang Kerimpak Labu ke udah nulong seduai. Dia meh seduai tembu gaga ati, gaga berunding ka utai ti udah nyelai nya nyadi ba iya dulu tadi.
Nyadi tudah Bujang Kerimpak Labu tak diau enda iboh, enda bemunyi leboh iya dikait ka Dayang Ridu ba lalau tangga, tang iya endang udah berunding ngaga ulah kena beduan sida. Diketup ka iya ngeli : “Sepi asai sida nya malam tu lagi,” ko ati iya din.
Au, ah, nyadi samalam-malam nya begitang meh tudah Bujang Kerimpak Labu ba lalau tangga enda dikiboh ka sida bini enggau kaban mentua iya, anang ka orang bukai deh bisi iboh ka iya, deh mentua iya empu enda iboh ka iya.
Nyau lama malam udah orang sarumah nya tindok magang, utai bukai nadai agi bemunyi, samina munyi seput enggau derut kuroh orang ke tindok dalam rumah nya enggau munyi dengut anak ngut ke baka dengut nusu ba indai iya di baroh rumah, enggau munyi indu burong malam agi bisi bemunyi didinga Bujang Kerimpak Labu, leboh iya agi dani ngipa orang ke ngayap ngagai Dayang Ridu. Nyadi orang ti di ipa iya ngayap nya Igat Riang laban iya ke udah betunang enggau indu nya. Igat Riang endang nadai mimit arap ka indu nya deka jadi enggau Bujang Kerimpak Labu.
Ah, dia meh Bujang Kerimpak Labu nya tadi endang enda engkeretik, enda tindok gitang-gitang ba lalau tangga, ngipa orang ke bisi ngayap ngagai Dayang Ridu. Em, enda lama udah nya, iya lalu bisi tepeda ka kenaya orang dua iko bejalai dalam petang di tengah laman mansang ngagai kaki tangga. Seduai nya dipeda iya tak bejalai enda bapi, tang alai ulih endor bejalai laban betenggau ka senawah bulan.
Dia meh Bujang Kerimpak Labu berunding. “Sapa seduai nya lagi ?” ko ati iya. Udah nya seduai iya niki tangga betunda udi, tak jimat bendar gamal seduai niki. Leboh seduai datai ba senentang iya ke dikait ka ba lalau tangga, peda iya tak Bujang Bunsu Pelandok seduai Bujang Bunsu Kijang.
“Eh ! Ngumba endar ga gamal seduai nya,” ko ati iya meda Pelandok seduai Kijang junok-junok niki tangga.
Seduai nya pen sama ngayap ngagai Dayang Ridu. Em, datai seduai ba pintu pala tangga lalu dibuka seduai begadai-gadai ga pintu nya enggai ka inggar. Pintu nya pen lalu tebuka, seduai pen lalu ritit-ritit bejalai nengah tempuan ngiga pintu sida Dayang Ridu.
Enda jauh udah ngelebus ari pala tangga, dia seduai pen lalu betelai ga enggau pangan diri enggai ka didinga orang.
“Jimat ka nuan lagi unggal Kijang. Anang ngasoh kaki nuan setak-setak enggai ka tua didinga orang. Enti orang ninga tua lagi, dani sida, apin tua datai ba panggau indu dara,” ko Pelandok ngajar Kijang.
“Au, enda iya bemunyi, lalu enti iya bemunyi lagi tan ka aku ulih nuan,” ko Kijang nyaut Pelandok. “Lalu nuan pen pia ga bejalai jimat-jimat enggai ka kaki uan tepurok lalu enselit ba gelegar,” ko iya.
“Eh, tak anang tusah mimit nuan ka aku, tentu enda kaki aku enselit ngapa,” ko Pelandok. “Nya keba manah enti iya enda,” ko Kijang.
Lepas nya seduai lalu mupok bejalai niti rumah. Rumah nadai utai metang-metang nya nyau enda dipeda achok mata. Dia seduai bejalai nyubok gadai-gadai nengah tempuan. Nyadi leboh seduai nengah tempuan nya, dia deh kaki Kijang tak setak-setak, makin iya begadai agi, makin balat agi ga setak gelegar kena indik iya.
“Eh, lapa kaki nuan nya makin balat agi setak-setak ?” ko Pelandok. “Takut nuan ?” ko iya. “Enda aku takut deh,” ko Kijang. “Tang aku enda nemu kabuah alai kaki aku tu deka bendar setak-setak. Sial bendar kaki aku tu, enti bakanya ni enda dani orang laban aku lagi,” ko iya betelai enggau Pelandok.
Tang seninjik bendar, siko pen nadai ga orang ninga ritit kaki seduai ke bejalai. Samina Bujang Kerimpak Labu meda gamal seduai, laban iya enda tindok, ngipa Igat Riang, tang iya nadai datai ngayap malam nya. Iya endang enda irau ka Pelandok seduai Kijang laban iya nemu seduai nya enda berapa bulih iga ngayap.
Nyau lama seduai udah besagam enda bapi ngiga pintu sida Dayang Ridu, seduai pen lalu datai ga ba pintu sida. Tang malam nya seninjik bendar pintu sida enda ditambit samina ditikup ka pia aja. Pintu sida Dayang Ridu tu inggar bendar tak kiak-kiak enti iya disilak ka kitai begadai, lalu ngasoh iya inggar agi enti disilak ka kitai beguai. Pintu nya lalu dikebak ka seduai begadai awak ka enda inggar, tang makin seduai begadai makin inggar agi ga kiak iya bemunyi.
“Hee ! Banggar endar pintu tu,” ko seduai iya gut-gut bejako ka diri. “Uji tak kenyit sakali enggau nya,” ko Kijang nelai Pelandok.
Udah nya lalu buka Pelandok tak kenyit iya sakali. Pintu pen tebuka ga, tang kiak iya inggar bendar. Laban pintu ke udah engkiak bakanya lalu dani deh Raja Ribut, apai Dayang Ridu, lalu nyada, ko iya ;
“Sis ! Es ! Bah ! Lalu dittempik iya tikai. “Lapa ukoi nya ngachau orang ka tindok!” ko iya. Dikumbai iya ukoi deka tama ka bilik deh orang ke bemunyi nya. Enda iya belaba ka nya orang mansang ngayap. Pelandok seduai Kijang lalu engketut enda bemunyi enda engkebut nat ka diri dalam petang.
“Anang inggar tua,” ko seduai iya betelai enggau diri sama diri.
Seninjik bendar apai Dayang Ridu enda lalu angkat. Udah tembu iya nyada seduai nya tadi, iya lalu tindok baru.
Pelandok seduai Kijang nyau penat ga nat ka diri enda engkeretik nganti apai Dayang Ridu tindok baru. Nyau kira seduai iya udah jenak, iya ke tindok, nya baru seduai mupok baru tama ka bilik.
Nyadi orang ke dara nya tindok ba bilik atas, lalu apai seduai indai iya tindok ba bilik baroh endang selalu kena pansa orang ke ngayap ngagai anak dara seduai iya.
Udah nya lalu mupok seduai iya begadai-gadai nengah bilik mansa kibong apai seduai indai indu ke tindok ba bilik baroh. Nya ga munyi ritit kaki Kijang tak seruran setak-setak sekumbang seduai nengah bilik, lalu nya ga baka enggi tudah Pelandok nyau getar-getar betis iya laban takut ka apai indu nya dani.
Ng, kenu ko jerita nyau puas seduai iya ke ngerayap nengah bilik enggai ka apai indu dani, seduai pen datai ga ba panggau endor orang ka dara tindok. Seduai iya lalu niki ngagai panggau nya meda indu tak ngenjing garing-garing empa penyenak iya tindok. Datai seduai iya dia lalu diberap Pelandok tudah Dayang Ridu, endang enda kakang lalu disengkauk iya ba rusok.
“Dani nuan Endu burong pagi, dudok nuan Endu burong kubok, berandau meh kitai tu Endu burong semalau,” ko jako Pelandok ngerak Dayang Ridu.
Dayang Ridu pen lalu ensugau angkat tedani, tekenyit ninga leka gerak Pelandok munyi nya. Iya enda nemu sapa-sapa orang tak ngerak iya munyi nya.
“Sapa kita tu ke berani nyagam aku maia tu malam ? Sapa kita tu ke berani nyengkauk aku tindok di retok papan ban, ke berani ngama aku ngena tapa jari kanan ?” ko Dayang Ridu.
“Eh, angkat dulu meh Endu. Nya baru nuan nemu bagi sapa-sapa,” ko Pelandok. Udah nya angkat meh tudah Dayang Ridu, lalu ambi iya machis. Kechis ka iya machis peda iya tak segenda moa Pelandok seduai Kijang.
“Ee,” ko Dayang Ridu, “perut buntas mati dibebas, perut peruti mati digerami seduai tu ke ngeregau aku maia tu malam. Ngipak ka gamal ga seduai tu, ngelulu ka diri baka ikan deka ngaban di kaki lubok, ngeriu diri baka tubu tumboh bulan tujoh, samina muntau mata diri ngapa ngambi ka enda tindok,” ko iya.
“Em,” ko Pelandok, “ukai kami duai datai nyaru ngapa. Kami duai ga datai napat ka sibau mansau enggi kita ditu ka bebuah naka pengelebat. Kati kita ngasoh kami niki iya ?” ko iya.
“Em, ngasoh ga aku,” ko Dayang Ridu, “nadai penyalah enti seduai berani ati mutus tajam, tang pun iya di ibun jelu remaung, lalu pun dan iya di wan pesiri ular tedong ka taja rengong-rengong munyi indu renyuan madu bungkong,” ko iya madah ka diri empu.
“Ng, ti ubat penawar ular, penurun jelu pasun, bisi ga kami duai mai,” ko seduai nyaut Dayang Ridu.
“Oh, kada seduai bisi mai penyulok chukop ganggam kena seduai nyulok sibau mansau kami ditu ?”ko Dayang Ridu nyaut.
“Em, bisi kami duai mai penyulok tirok kena nirok gumba lelabi ngereman enggau ratai buloh bala kena nyulok pesadan bulan peranama,” ko seduai nyaut.
“Enti seduai ngena penyulok nya, apin seduai tejulok ka sibau mansau kami ditu, bebuah naka pengelebat, ditanam sida berada karong menyimat di tanah pemanah entap,” ko Dayang Ridu nganu seduai iya.
“Ni gaya penyulok ti tau kena nyulok sibau kita ditu deh ?” ko Pelandok. “Kami duai ga nadai mai penyulok bukai, ka nya meh penyulok kami duai,” ko iya.
“Enti seduai bisi ngembuan penyulok Pating Aur Gangging, ditikam ka langit kuning, di ambi Keling ka penyelinting pengerurus jari, Pating Aur Tulang ditikam ka langit nyang di ambi Kumang ka pemandang penampak lelaki. Nya baru seduai tejulok ka sibau kami ditu,” ko Dayang Ridu nyaut Pelandok.
Angkat deh Pelandok seduai Kijang enda nemu reti jako sempama Dayang Ridu nya tadi, seduai iya nyau malu lalu enda nemu nyaut agi.
“Em, begah endar indu tu,” ko seduai. “Nama reti jako sempama iya nya ?” ko Pelandok nelai Kijang. “Aku pan enda meh nemu reti utai munyi nya,” ko Kijang.
“Aku enda madah ka seduai reti silup leka jako nya tadi, awak ka seduai empu ngiga reti iya,” ko Dayang Ridu. “Ah, malu endar tua tu deh unggal Pelandok,” ko Kijang. “Au, ah,” ko Pelandok.
“Amat malu endar meh seduai ga enda nemu reti Aur Gangging enggau Aur Tulang. Nya alai enti seduai nadai ngembuan penyulok nya tadi, pulai seduai, dulu giga penyulok Aur Gangging enggau Aur Tulang nya, ila enti seduai udah bulih, nya baru napat ka sibau mansau kami ditu. Tang ingat, enti seduai laun nyangka orang bukai bisi datai mai penyulok ke udah disebut aku tadi, tentu seduai alah laban orang nya,” ko Dayang Ridu bejako bebendar enggau seduai.
Udah nya lama sida tiga enda bemunyi. Laban sida ka lama tegenong bakanya, nyau baka pasang menoh, enda kili enda kulu, endang tak ngenjing nadai engkeretik. Kijang pen lalu bejako, ko iya;
“Nama tu deh, nginti empelasi, sakalika nginti enseluai? Nama tu deh ka mai gali, sakali ka ngasoh pulai ?” ko iya nganu Dayang Ridu.
“Em, nuan tu tak mapap,” ko Pelandok, “orang udah ngasoh tua pulai, nama tua nadai ngembuan penyulok Aur Gangging enggau Aur Tulang kena nyulok sibau mansau sida ditu,” ko iya.
“Nya pulai meh, enti nya reti jako iya tadi, aku endang enda nemu reti utai munyi nya,” ko Kijang. “Nuan ke nemu reti ka ngelap ka diri baka aku ti enda nemu ga,” ko iya.
“Oh,” ko Dayang Ridu, “Enda meh kitai tu tau nginti empelasi ngapa, enda tau enda nginti enseluai. Enda meh seduai tau gali ngapa, enda tau enda pulai. Em, pulai seduai unggal, mupok nyurut ka diri dulu,” ko iya.
Kijang lalu merejok angkat, lalu engkechit ga Pelandok pulai mai ati malu laban enda tesagam ka reti jako sempama Dayang Ridu nya tadi. Pansut seduai ari kibong nya tadi, kaki seduai pen endang di entak ka seduai, endang enda bejimat agi nengah bilik. Laban seduai tekelalu inggar bakanya, dani deh Raja Ribut, apai Dayang Ridu ninga rejat seduai. Apai iya lalu nanya ngagai orang ka indu, nanya ka sapa orang ngayap iya.
“Sapa orang ke ngayap nya tadi Endu ?” ko iya. “Sapa orang bukai, Pelandok seduai Kijang,” ko Dayang Ridu nyaut. “O, patut nya enda nemu bebasa ka orang ke tindok, ngipak ka gamal ga kaparat seduai nya tak jelar-jelar ngapa,” ko apai iya.
Nyadi Pelandok seduai Kijang nya tadi lalu terus pansut ka ruai. Datai seduai di ruai, siko nganu siko ga seduai meda pangan diri enda nemu nyaut jako sempama Dayang Ridu.
“Sapa orang nemu reti sempama munyi nya, utai disebut iya munyi jako sabayan,” ko Kijang nganu Pelandok.
Hari pen tnyau ka rerak tawas ga, seduai pen lalu ngejang ka rumah sida Dayang Ridu. Manok pen udah ga mengkukok, sandah pen udah ga baka duah madah ka hari teringkas siang. Seduai ke pulai nya mai ati kawa dipanggong enggau malu kategal seduai iya udah alah jako laban orang ka indu.
“Mar endar meh Dayang Ridu nya di gayap, tak enda ulih dikelakar ngapa,” ko Kijang bejako enggau Pelandok leboh seduai di rantau jalai. “Dini orang deka dikelakar kitai ngapa, ukai iya beli. Dinga penemu iya bejako deh,” ko Pelandok.
Datai seduai ba rumah sida empu lalu madah ka diri jera ngayap ngagai Dayang Ridu agi.
3. NURUN MANDI
Mata panas pen nyau tumboh ga, Dayang Ridu pen nurun ga mandi ka ai lalu mansa tudah Bujang Kerimpak Labu ti dikait ka iya ba lalau tangga. Nyadi leboh iya mansa, dia deh Kerimpak Labu lalu nyapa iya.
“Maioh endar orang ngayap ngagai nuan demalam,” ko iya. “Kati alai nuan nemu ? Nuan tak nadai mata nadai moa, nadai kaki, nadai jari, nemu ngelulu ka orang. Ngipak ka gamal diri ga nuan nya,” ko Dayang Ridu nyaut iya, enda tentu lantang ati, ka malu-malu.
“Eh, kati ka aku enda nemu,” ko sut Bujang Kerimpak Labu. “Aku ga meda kuyu asam nuan tak lenggam bekau keramak orang ke bujang demalam,” ko iya. “Dini nya bisi, aku ga bisi nuan ka laki,” ko Dayang Ridu nyaut. Lepas nya iya lalu nyau ga nurun mandi. Leboh iya pulai mandi lalu mansa Bujang Kerimpak Labu agi, dia deh iya madah ka diri enggai agi dengkah ba lalau tangga nya.
“Enggai aku agi dikait ka nuan ditu, nyau puas aku enda masok tindok kena pansa orang ke ngayap ngagai nuan,” ko iya nganu Dayang Ridu. “Nya alai aku minta gitang nuan ba moa pintu bilik kita,” ko iya.
Udah nya lalu dibai Dayang Ridu meh iya, lalu gitang iya ba moa pintu bilik munyi ke diasoh Bujang Kerimpak Labu. Sahari-hari nya iya agi nat ka diri begitang dia, iya seruran tayun-tayun kena puput ka ribut.
Nyau kira pukol sabelas pagi nya dia Dayang Ridu berapi ba dapor, lalu tudah Bujang Kerimpak Labu pen nyapa ga ari iya ke begitang ba moa pintu.
“Aku dua hari tu udah nadai makai laban nuan tak enda ati meri aku, enda nemu utai asai tu pengelapar perut. Nyangka enda ati bendar nuan deka belaki aku,” ko iya nganu Dayang Ridu ke berapi.
“Em,” ko Dayang Ridu, “nyangka nuan tak enda nemu makai, meda nuan ke nadai mulut nadai perut, nadai mata nadai moa, nya alai enda meh aku meri nuan makai dua hari ke udah tu,” ko iya. “Eh, Dayang Ridu,” ko Bujang Kerimpak Labu, “nadai orang tau idup enda makai.” Ko iya.
“Kati ko meri nuan makai deh ?” ko Dayang Ridu. “Yeh,” ko Bujang Kerimpak Labu, “nadai utai nya mar. Enti kita makai lagi sintak chapak lalu sungkit nuan asi, engkah ka dalam chapak nya tadi. Lalu kauk ka nuan ga lauk engkah dalam mangkok, sama-sama sedia ka enggau enggi kita, lalu engkah ka sama begulai enggau enggi kita dia, ba antara enggi nuan enggau enggi apai nuan. Udah nya teju ka dia. Anang ngachau, lagi aku datai makai sama-sama enggau kita.” Ko iya.
“Au meh,” ko Dayang Ridu, “tang nuan anang beduan aku.” “Dini aku deka beduan nuan deh Endu. Ila aku makai sama-sama enggau kita,” ko iya.
Udah samoa utai nya mansau di pandok Dayang Ridu, iya pen lalu nyendia ka pemakai sida sabilik. Lalu disedia ka iya asi engkah dalam chapak munyi ke udah dipadah ka Bujang Kerimpak Labu, lalu kauk iya ga lauk. Em, udah samoa pemakai nya sedia magang, iya lalu ngumbai sida apai, sida indai iya makai, lalu ngangau ka Bujang Kerimpak Labu ga sama mai iya makai.
“Sama makai enggau kami Kerimpak Labu,” ko Dayang Ridu. “Au,” ko iya, “sama makai meh kitai.” Tang iya dipeda Dayang Ridu enda ga mindah seruran agi begitang ba moa pintu. Enda ga Dayang Ridu iboh ka nya, barang ko iya.
Udah nya tama apai seduai indai Dayang Ridu mansang makai. Datai seduai di bilik baik enggi sida iya empu ke besai penaik bengat lantang, endang nadai kala bisi uras mesai remias rampang pinang, dia seduai meda pemakai udah disendia ka iya. Apin nudok ka diri apai iya Raja Ribut endang udah irau ati, irau meda pemakai tak lebih ari tuboh ka selama.
“Nama kabuah Endu tu tak nyendia ka pemakai lebih ?” ko ati iya din. Enda liat agi ati iya lalu ngangau ka Dayang Ridu. “Oh Endu !” ko iya, “Sapa temuai di sendia ka nuan enggau pemakai tak lebih, chapak lebih, mangkok lebih ga ari tuboh kitai ?” ko iya
“Sapa orang bukai deh apai,” ko iya, “disendia aku ka tudah Bujang Kerimpak Labu. Ninga iya madah ka diri dua hari tu udah enda makai, laban kitai enda iboh ka iya, ko iya madah ngagai aku pagi tadi,” pia ko jako Dayang Ridu.
Em, kitai ga nadai nemu iya tau makai, meda iya tak nadai mulut, nadai perut, nadai mata, nadai nyawa,” ko Raja Ribut nyaut endu Dayang Ridu.
Nya alai tu Endu, enti iya nemu makai, nya beri makai meh iya, ga endang ka baka kitai. Lebih agi baka nuan ga belaki iya, tentu nuan enda tau enda ngadu ka pemakai iya,” ko apai iya nampong jako iya nya tadi.
Lepas nya makai meh sida Dayang Ridu dia. Tudah Bujang Kerimpak Labu enda enggau sida sama dudok dia, iya ga kerimpak labu enda tau mindah ngapa nama orang enda mai. Dia meh iya bedau begitang ba moa pintu nya leboh orang ke makai. Sida nadai meda iya mindah.
Ah, nyau udah tembu ga sida Dayang Ridu sabilik makai, sida pen sama malik ngagai asi ba chapak enggau lauk ba mangkok ke udah disendia ka Dayang Ridu. Dia sida meda asi enggau lauk tak abis, kuah iya pen silik, tang sida nadai meda orang bukai makai dia. Sida lalu tegenong meda utai tak nyelai bakanya.
“O, tau makai iya tu tadi,” ko ati sida tiga. “Kitai tak nadai meda iya datai makai, asi enggau lauk iya sama silik,” ko sida tiga bejako diri sama diri. Angkat deh tudah Bujang Kerimpak Labu ninga sida tiga ke berandau diri sama diri, iya lalu nyapa sida ari iya ke begantong ba moa pintu.
“Bisi aku sama enggau kita dudok makai dia tadi deh, kita ke enda meda aku, laban kita endang enda rindu ka aku, nya alai kita ngumbai diri enda meda aku; dini kita rindu ka aku, aku ga jai gamal dipeda kita,” ko Bujang Kerimpak Labu.
Nyau maia makai lemai, lalu nyendia ka pemakai baru ga tudah Dayang Ridu, tang iya enda ingat ka Bujang Kerimpak Labu agi, laban asai ka ukai laki iya, meda tak kerimpak labu, nadai ngasai ka iya nya tau ka laki iya mimit. Nadai guna enggau iya, nya alai selalu enda tingat ka iya.
Sida pen berengkah ga makai, lalu di ambi Dayang Ridu asi lalu deka disuap iya. Iya pen ka datai ba mulut asi pen lesap nadai temu tunga. Lalu kauk iya ga lauk, iya pen ka datai ba mulut, lauk nya pen lesap ga nadai temu tunga. Iya endang enda bemunyi, laban tingat ka penyalah diri, enda nyendia pemakai ka Bujang Kerimpak Labu. Kabuah sida iya bakanya tadi laban dikeduan Bujang Kerimpak Labu. Udah nya diambi mentua lelaki iya raja Ribut asi lalu deka disuap iya. Iya pen datai ba mulut, asi pen lesap enda temu tunga. Lalu kauk iya ga lauk, bakanya ga lesap enda temu tunga. Ensepi diri asai nya, iya lalu malik ngagai enggi indai Dayang Ridu. Iya pen baru deka nyuap asi, lalu di ila ka iya bini iya nyuap asi. Peda iya tak bakanya ga, asi pan datai ba mulut iya, lalu lesap enda temu tunga, lalu pia ga lauk dikauk iya lesap samoa.
Mentua indu enggau mentua lelaki iya sama enda bemunyi lalu beperening diri sama diri. Nyau beli-beli gamal seduai enda nemu kabuah utai nyelai nya tau nyadi ba sida. Nyadi Dayang Ridu nemu, laban iya ngasai ka nya penyalah iya empu ti enda ingat nyendia ka pemakai Bujang Kerimpak Labu.
“Tentu iya nya ngachau, alai pemakai tau lesap bakanya,” ko ati Dayang Ridu. Lepas nya, lalu beguai-guai meh iya nyendia ka pemakai Bujang Kerimpak Labu.
Udah Dayang Ridu nyendia ka pemakai nya tadi, nadai agi ga orang ngachau sida makai. Mentua indu enggau mentua lelaki iya enda tentu rindu meda Dayang Ridu ngadu ka pemakai iya. Seduai lalu bejako diri sama diri;
“Enda Bujang Kerimpak Labu nya tau ka menantu tua, tak lain asai berunding ka iya nya. Nyangkai iya ila tau nyadi antu rua, nyadi antu rangka kitai menyanak,” ko seduai.
Nyadi Bujang Kerimpak Labu nya tau samina beduan sida aja nyangka sida tau mupok nemu iya, tang iya empu endang apin deka ngayan ka diri segenda anak mensia. Iya ga endang anak Kumang seduai Keling, tang iya ngarong diri ba Kerimpak Labu.
4. IGAT RIANG
Udah sida makai, hari pen nyau malam tegayam petang nyau pemanah iya endor nindok ka diri. Sida Dayang Ridu tu tadi pen lalu tindok ga di retok papan ban, lalu ngali ka diri atas tilam. Tudah Bujang Kerimpak Labu agi ga begitang atas moa pintu enda mindah ari endor nya, nganti hari tawas teringkas siang. Dia meh iya nat ka diri, tawas hari dia, malam hari dia laban enda tau mindah.
“O, ko ati Bujang Kerimpak Labu, “enti samoa orang udah tindok magang lagi tentu bisi Igat Riang datai ngayap ngagai Dayang Ridu.”
Kabuah alai iya sangka ka lelaki nya bisi datai ngayap laban iya sigi irau ka indu nya bisi ati rindu ka Igat Riang, lalu ngalah ka iya. Dia meh iya seruran irau ati lalu ngipa Igat Riang datai, laban iya deka meda ka pengamat ati indu nya sakalika iya deka tauka enggai ka lelaki nya.
Ah, dia meh iya nganti enda bemunyi begitang ba moa pintu ngemata ka Igat Riang nyangka iya bisi datai. Hari udah jauh malam, lalu samoa orang sarumah-rumah nya udah tindok magang, tang Bujang Kerimpak Labu seruran agi ngipa Igat Riang ke datai ngayap. Lama bendar iya enda kebut-kebut, lalu enda ngenyap ka bulu mata, enda tindok begitang alam petang laban samoa api orang sarumah-rumah nya udah padam magang.
Benong orang sarumah nya udah tegeram magang tindok, utai pan nadai ga agi bemunyi ka samina seput enggau kuroh orang agi bisi didinga Bujang Kerimpak Labu ti agi nengkilun ka Igat Riang mansang ngayap ngagai Dayang Ridu. Leboh nya orang ka indu udah jenak bendar tindok ka samina seput enggau kuroh iya seruran derut-derut didinga Kerimpak Labu ari iya ke begitang ba moa pintu. Nyau puas iya nganti, ati iya pan bisi ga ka mansang ngayap ngagai Dayang Ridu dulu ari Igat Riang.
Tang ko ati iya berunding dalam nyin, “Enti aku mansang dulu, tentu aku enda nemu resia seduai iya, nya alai manah ga aku nganti ditu, lalu neju ka iya dulu.”
Nyau kalama iya nganti, dia iya tepeda ka orang siko bejalai junok-junok niki ari tangga puting setak bejalai gadai-gadai masok ngagai endor petang dalam rumah nya. Dinga iya orang nya ritit-ritit bejalai niti arong tempuan. Udah nya datai iya ba moa pintu ke endor Bujang Kerimpak Labu begitang nya tadi, endang enda kakang mimit lalu dipaut iya pintu tak mengkiak sakali aja laban iya, lalu tetukang. Oang pan nadai ga dani ninga iya. Tudah Bujang Kerimpak Labu ke begitang dia nyau deka laboh laban guyat orang nya nyilak ka pintu.
“O,” ko ati Bujang Kerimpak Labu, “tentu nya Igat Riang. Nadai orang bukai bakanya. Banggar-banggar ngapa ga iya. Kitai begitang atas moa pintu tu nyau deka laboh kena guyat iya,” ko iya bejako kadiri.
Igat Riang nya tadi lalu tama gadai-gadai napat ka kibong indu dara ke tindok malai-alai ba panggau penindok iya di retok papan lekai. Peda tak enda chechamang Igat Riang lalu disimbak ka iya kibong, lalu nyau iya tama ka dalam nyin.
Bujang Kerimpak Labu ngenjing enda engkeretik ninga ka jako iya ngerak orang ka indu, sereta lalu deka ninga ka jako randau seduai ke betelai. Lama bendar iya nganti sedai bisi bejako. Anti-anti iya munyi lalu nadai ga bejako.
“Oh,” ko Bujang Kerimpak Labu berunding dalam ati diri, “salah pengawa seduai nya.” Lepas iya pen lalu tusah ga nyangka nya amat meh Dayang Ridu deka betunang enggau Igat Riang.
Dia meh Bujang Kerimpak Labu mending ka seduai ari iya begitang ba moa pintu deka ninga ka pemutus jako seduai ke deka betunang. Nyau pengelama iya udah nganti dia lalu nadai ga seduai bemunyi didinga iya. Balat agi ga ati iya tusah meda utai bakanya.
“Oh,” ko iya “tentu Igat Riang nya lalu tindok dia enda ngerak orang ke indu. Sepi asai iya lagi,” ko iya. Iya nyau ringat meda pengawa Igat Riang bakanya.
Udah nya enda liat agi ati iya, lalu ngesai ka diri ari karong iya empu, tak lalu segenda nyadi mensia. Nadai utai manah-manah nya gamal. Raras tuboh iya laur-laur mimit, moa iya pelu-pelu baka bulan peranama. Kulit iya ngenjing burak kuning. Nadai kala orang di menoa nya udah meda gamal bujang bengat sigat baka iya nya. Iya ga lalu chukop enggau ngepan enggau pekayan endang dikena orang bujang. Enti kitai merening gamal iya leboh ke segenda nyadi mensia bakanya endang amat anak Keling seduai Kumang. Sayau bendar Dayang Ridu enda meda iya leboh siang hari. Tang leboh iya ngesai ka diri pansut ari karong iya kerimpak labu nya tadi, nadai siko orang meda iya, laban sida sarumah udah tindok magang.
Nyadi leboh Igat Riang tama ka dalam kibong, iya lalu ngali ka diri enda ngerak Dayang Ridu
Dia meh iya nindok ka diri ba tisau kibong, ni orang ka dara nemu iya bisi datai. Nya alai nadai meh seduai bisi danti Bujang Kerimpak Labu bejako, iya ga ngenchuri diri gali enda ngerak orang ka dara.
Udah Bujang Kerimpak Labu bebali nyadi mensia iya lalu beradu ba tempuan ruai sida Dayang Ridu, ngadu ka penyigat gamal diri empu. Iya lalu berunding dalam ati diri ;
“Enti Dayang Ridu nya tak begah-begah ngapa, sepi asai iya lagi,” ko iya. “Enti sema seduai iya sama udah jenak tindok, siko ditanggong ka tisau awak ka enda nemu aku bisi datai,” ko iya.
Udah nya lalu mupok iya tama ka bilik lalu terus ngagai kibong Dayang Ridu deka ngabas pengawa Igat Riang nya tadi. Leboh iya datai dia, peda iya kaparat Igat Riang ngenjing derut-derut bekuroh tindok gali ba tisau kibong. Tindok nadai utai nyenak nya ngenjing enda dani, enda entuwi.
“Sepi asai Igat tu,” ko iya, “ajih ka jenak agi tindok awak ka iya enda nemu aku bisi ngayap.”
Ah, udah nya lalu diajih ka iya meh tudah Igat Riang ngasoh iya jenak agi tindok. Kuroh iya lalu mansang inggar agi sereta iya udah diajih ka Bunajg Kerimpak Labu jenak agi tindok, ngenjing enda dani, enda entuwi hari. Iya lalu nadai nemu orang bukai bisi datai dia.
“Ah deh !” ko Bujang Kerimpak Labu. “Nama iya tu bengat ngemanggar nya,” ko iya.
Iya lalu nyurok ka jari ba baroh tuboh Igat Riang ke tindok lalu ditanggong iya ngagai telok tempuan bilik sida Dayang Ridu lalu digali ka iya begulai enggau tugong buah janggat dia. Tudah Igat Riang endang enda nemu diri kena tanggong lalu dipegulai ka orang tindok enggau buah janggat. Enda nemu diri diasoh orang ngimbit buah janggat di telok tempuan. Anang ka iya nemu diri, ngasoh iya makin jenak sajenak agi tindok. Nyau ngasoh iya derut-derut bekuroh ngimbit buah janggat nya tadi.
“Nya asai iya,” ko ati Bujang Kerimpak Labu, “ngarap ka diri tak bedau tindok dalam kibong orang ka dara, enda iya nemu diri ngeringak gali ngimbit buah janggat,” ko iya.
Dia meh Bujang Kerimpak Labu lekik-lekik katawa dalam ati diri, katawa ka Igat Riang nya tak ngamat ka diri ngimbit buah janggat, kumbai iya Dayang Ridu. “Kasih-kasih tudah Igat nya,” ko iya ga ngelesay ka Igat Riang.
Udah Bujang Kerimpak Labu nangong iya ngagai telok tempuan, lalu dipegulai ka iya enggau buah janggat, udah kuroh Igat Riang ngenjing serintak tindok dia, nya baru iya empu mansang ngayap ngagai Dayang Ridu.
Pengengkah iya leboh datai ba kibong indu tak jauh bida ari enggi sida bukai, laban iya endang anak orang besai nama di Panggau Libau ; orang endang ngembuan basa enggau chukop penemu. Datai iya dia lalu nudok ka diri ba kaki kibong, dia iya negu tunjok kaki indu.
Ensepi orang bisi negu iya bakanya indu lalu ngeliat, enda angkat, tang samina bekalih ka sapiak. Bujang Kerimpak Labu lalu betelai ngasoh orang ka indu angkat dulu.
Dayang Ridu lalu ensugau angkat, lalu ngechis ka machis. Tak tekenyit iya meda moa orang bujang nadai utai nyigat nya gamal dudok nyandar ba kaki kibong iya. Udah bekau iya tekenyit, lama iya enda bemunyi, udah nya baru iya tepansut ka jako. Orang bujang nya lalu enda bemunyi nganti indu nya nanya iya dulu.
“Ng,” ko Dayang Ridu, “endang baka aku tak galak lubah nanya orang. Tang ka tu enggai ka tua tak bejako ngapa enda nemu pangan, enggai nyadi ga aku enda nanya nuan dulu. Tak sanggu ga mulut aku mansut ka jako, tang iya enggai nyadi enda dipansut. Ari ni penatai nuan, lalu dini endor menoa nuan ?” ko iya nanya orang bujang nya tadi. Ati iya agi lain asai bekau tekenyit meda gamal lelaki nya, laban nadai kala umor iya udah meda gamal orang bengat nyigat nya ; di menoa sida dia nadai, di menoa bukai pan nadai ga iya kala meda.
Tak lantang munyi Bujang Kerimpak Labu nyaut iya. “Tanah endor aku berumah ka mesai dunggok belakang raung ; ai endor aku mandi ka mesai belungkin burit jalong. Menoa endor aku diau di baroh rampu randau ka bedaun nyelabumbun balat begulong,” ko iya nyaut Dayang Ridu.
Dayang Ridu lalu nanya ka nama iya. “Sapa nama nuan deh unggal ?” ko iya. “Aku ga apin kala udah bepeda enggau nuan, nya alai apin ga nemu nama pangan.”
“Tedong aku tu Indu Kacha.” Ko Bujang Kerimpak Labu.
“Oh, enti nuan Tedong Indu Kacha, nama aku nadai kala ninga nuan beterumbu ba baroh pun kayu kempas,” ko Dayang Ridu nyaut.
“Enti nuan nadai kala ninga aku beterumbu ba baroh pun kayu kempas ; Remaung aku tu datai ari Tuchong Bukit Bangat,” ko lelaki nya ga madah ka diri empu.
“Oh, enti nuan Remaung datai ari Tuchong Bukit Bangat, nama aku nadai kala ninga nuan nyerumba sedap bulan kembong ngempuru ka pantong kerubong kerang,” ko Dayang Ridu.
“Oh,” ko lelaki nya,” enti nuan nadai ga kala ninga nya ; Wok Empeliau Arang aku tu datai ari Tuchong Bukit Batu.” Ko iya.
“Oh,” ko Dayang Ridu, “enti nuan Wok Empeliau Arang datai ari Tuchong Bukit Batu, nama aku nadai kala ninga nuan napat ka buah kubal tusu,” ko iya.
Lama bendar seduai belaban ka jako lalu nadai tentu talah ka pangan, laban seduai iya endang orang ke sama landik bejako.
Maioh bendar macham jako kena iya beduan Dayang Ridu. Samalam-malam nya seduai berandau ka macham utai. Nyau keleju seduai udah betundi, nya baru iya mantang ka jako ngagai orang indu.
“Lama bendar tua udah berandau ka samoa macham utai,” ko Bujang Kerimpak Labu, “ nya alai dilah enggi tua sama enda betulang, lalu lengka ka dia samoa jako tundi, jako belit tua enggau pangan. Diatu aku bisi jako saleka deka ditanya ka ngagai nuan,” ko iya.
“Ng, pansut ka dia awak ka aku ninga,” ko Dayang Ridu.
“Ng, sanggu ga mulut aku mansut ka jako nya,” ko iya. “Tang utai enda tau enda disebut. Nya alai ka tu, enti besai dipeda nuan tau disempiar, lalu enti tinggi dipeda nuan, manah ga dipapal,” ko iya.
Lama Dayang Ridu ngenong enda bemunyi ninga jako iya munyi nya. Udah nya baru iya nyaut.
“Tak tekenyit meh ati aku meda pemanah gamal nuan,” ko Dayang Ridu. “Ka udah tu, apin aku kala meda orang baka nuan, ka agi tu ila enda nemu. Nya alai ka tu, abis meh ati aku meda gamal nuan,” ko iya. Tak lalu diputus ka iya jako ngagai Bujang Kerimpak Labu.
Tang iya ke bejako nya tadi endang nadai mimit sangka ka lelaki nya kerimpak labu ke di gantong iya ba moa pintu. Orang nya endang disangka iya bujang datai ari menoa bukai ti nadai kala dipeda iya. Amat nadai jalai enda saru iya meda pemanah gamal bujang nya.
Ninga jako Dayang Ridu munyi nya Bujang Kerimpak Labu lalu nat ka diri dia nyentok ngagai maia orang ke indu nyau deka angkat berapi. Dinga iya manok pan megkukok ka dua kali, iya lalu mupok gadai-gadai ngelulu ka diri pansut ka ruai, tang leboh iya datai ba moa pintu lalu pulai baru tama ngagai karong iya kerimpak labu. Iya lalu nyengkau karong iya baru, lalu masok ka nya. Dia meh iya begitang baru ba moa pintu pulai baka ke dulu tadi.
Nyadi Igat Riang tindok samalam-malam nya merap buah janggat. Nyau deka ngadau, alah nyau deka angkat berapi indai Dayang Ridu, nya baru iya dani nemu diri dikeduan orang. Dipenchelak ka iya mata, ensepi diri tak begulai enggau tugong buah janggat ba telok tempuan. Iya lalu terus ensugau angkat pulai ngebu ka pintu mai ati malu, ati pedis. Iya nemu diri udah kena keduan orang, tang iya enda nemu bagi sapa-sapa orang nya, semina iya sangka ka Dayang Ridu empu. Nya alai ati iya berasai malu, lalu enda berani bejako enggau orang ka indu empu dalam kibong takut ka iya nganu.
Agi urap hari alai Dayang Ridu lalu nurun mandi deka meresa tunga pemulai bujang ke ngayap iya demalam. Leboh iya mansa Bujang Kerimpak Labu ke begitang ba moa pintu, dia utai nya lalu nanya iya.
“Chapoh endar munyi sida Endu samalam tu, maioh endat orang ngayap,” ko iya. “Kati alai nuan bisi nemu orang ngayap ngagai aku ?” ko Dayang Ridu.
“Buah rian ti iya mansau bebau. Na alai utai bukai pen bakanya ga jarang bendar nadai tanda. Enda aku iboh madah ka tanda nya ngagai nuan diatu, nganti nuan pulai mandi lagi tau nilik moa diri empu ba cheremin,” ko iya.
“Nadai orang berani ngayap ngagai aku, aku ga bisi nuan ka laki,” ko Dayang Ridu enchabar ka diri nyaut iya. Iya pan lalu nurun ga mandi.
Leboh iya pulai mandi mansa nya baru, dia deh Bujang Kerimpak Labu madah ka diri enggai agi diengkah ba moa pintu.
“Pedis bendar aku diau ditu, digitang ba moa pintu tu. Aku endang enda masok tindok laban kena guyat orang ke ngayap nuan. Demalam sakali aku deka laboh kena kejut orang ke nyilak ka pintu mansang ngayap ngagai nuan. Aku minta kasih ngagai nuan malam tu lagi, minta nuan ngengkah ka aku manah-manah ba semak kaki kibong nuan din, awak ka aku lantang agi nadai orang mansa,” ko Bujang Kerimpak Labu bejako enggau Dayang Ridu ba moa pintu.
5. NGAYAP
Ninga iya madah ka diri minta pindah ka ngagai semak kaki kibong, Dayang Ridu lalu ngasi ka jako iya, lalu ngengkah iya dia malam nya. Orang sarumah-rumah nya pen udah ga tegeram tindok, apai enggau indai Dayang Ridu pan nadai ga gut-gut bejako enggau diri sama diri dalam kibong seduai, dia meh tudah Bujang Kerimpak Labu ngeringak garing-garing ba kaki kibong. Dinga iya derut kuroh Dayang Ridu udah seranyut, iya lalu bebali nyadi mensia baru. Penyigat gamal iya lebih agi ari malam dulu kamari. Nyadi orang ka indu laban udah jenak bendar tindok enda nemu pengawa iya ke mali diri nyadi mensia. Sereta udah iya bebali nyadi mensia, iya lalu begadai-gadai nyilak ka kibong lalu dudok ba semak kaki kibong. Dia iya lalu negu tunjok kaki, lalu ngerak iya awak ka dani.
Nyadi Bujang Kerimpak Labu nya endang agi megai basa orang ka tuai, ti leboh datai ngayap enda lejah-lejah, enda lalu nandan ba bau orang ka indu. Iya ke negu tunjok kaki orang ka dara nya tadi begadai, takut ka orang ka indu tak ensugau angkat lalu ngebu ka iya, ngasoh pulai.
Ensepi orang bisi negu tunjok kaki iya bakanya, Dayang Ridu pen lalu dani, iya lalu ningkoh ka merirang machis kedai, peda iya tak segenda gamal moa bujang ke udah datai ngayap ngagai iya malam dulu kamari. “Oh,” ko ati iya, “datai baru ga iya tu.”
Udah nya seduai lalu berandau samalam-malam nya, berandau ka maioh macham utai ti menyana agi, nadai tentu mai jako tundi baka malam dulu. Samina siti aja utai enda dipadah ka Bujang Kerimpak Labu ngagai Dayang Ridu, iya nya menoa enggau nama bendar iya. Iya agi belalai ka diri nya amat kerimpak labu ka digitang ba moa pintu. Ati Dayang Ridu bisi bendar deka ngator pendiau diri begulai enggau bujang nya, laban iya enda nemu iya nya endang amat laki iya empu. Iya enda nemu nya kerimpak labu ti udah nulong iya angkat ari batu, leboh burit iya lekat ba batu sereta diteruju bah dulu suba.
Nyau puas seduai berandau samalam-malam nya, kira maia manok udah mengkukok kadua kali, dia Dayang Ridu ngasoh lelaki nya nyurut ka diri.
Lelaki nya ngaga diri munyi ke pansut ka ruai. Tang iya empu enda pansut ka ruai, iya semina ngeluah ari kibong, lalu masok baru ngagai karong iya ke ditinggal ka iya ba semak kaki kibong.
Ah, nyau udah bulih niki matapanas, dia Bujang Kerimpak Labu madah ka diri enda masok tindok laban orang ke ngayap ngagai Dayang Ridu demalam.
“Puas bendar aku demalam abis jempit, kena tinggang orang ka bujang ngayap nuan, abis tepelanting kena sangkut orang nya ke pulai ngayap. Pedis bendar aku buntau ngenjing enda ngenyap ka bulu mata,” ko iya.
“Meda nuan enda muru orang nya enti nuan bisi nemu orang ngayap ngagai aku. Aku endang tentu bini nuan. Nama kabuah nuan rindu alah laban iya ?” ko Dayang Ridu nganu Bujang Kerimpak Labu.
“Ng, nadai jalai aku jai enggau orang nya. Nuan baru patut muru iya pulai. Nuan baru patut anang mai iya tindok enggau nuan,” ko Bujang Kerimpak Labu nimbal Dayang Ridu. Nya tadi samina jako dikena iya beduan indu nya, laban nya endang tentu iya empu ke ngayap, tang iya mansut ka jako nya awak ka indu nya balat agi saru ka iya.
6. GAWAI BUJANG KEREBAU
Nyadi hari siti datai Bujang Kerebau ngambi ngabang ngagai rumah sida Raja Ribut, apai Dayang Ridu.
Hari siti lalu nurun meh sida sarumah enggau apai Dayang Ridu ngabang ngagai rumah Bujang Kerebau. Nyadi Dayang Ridu diasoh Bujang Kerimpak Labu enggau orang ngabang.
“Nuan enggau orang ngabang Endu,” ko iya. “Aku empu tu enda enggau orang ngabang. Aku enda tau bejalai, lalu malu ka diri enda sabaka gamal enggau orang bukai,” ko iya.
Ah, tinggal meh iya ko iya madah ngagai Dayang Ridu, lalu samoa sida sabilik enggau sida sarumah arap ka iya amat tinggal dia. Nyadi iya bisi mentua indu dua iko agi tinggal dalam bilik sida din enda enggau orang ngabang laban seduai nya sama enda pengerai. Siko seduai nya kait, lalu enda tau bejalai ; siko seduai nya buta, lalu enda lansik meda utai. Seduai nya tinggal diasoh menyadi seduai iya Raja Ribut ngibun rumah.
Nyadi dikira Bujang Kerimpak Labu bala sida sarumah ke mansang ngabang udah datai ba pendai sida Bujang Kerebau ke begawai, iya lalu mansut ka diri ari karong iya lalu nyadi mensia baru.
Udah iya pansut ari karong iya, lalu nyadi mensia, dia gamal iya nadai utai nyigat nya. Iya ga chukop enggau ngepan enggau pekayan endang deka dikena mansang ngabang. Udah nya iya lalu ngangau ka mentua iya ke kait enda tau bejalai. Ko iya ;
“Ni nuan ibu ke enda tau bejalai, uji angkat nuan ibu lalu bejalai.” Disaut ibu iya ke kait, “Dini aku tau bejalai, aku ga kait.” Ko Bujang Kerimpak Labu, “ Uji angkat meh nuan lalu bejalai.”
Ibu iya nya tadi lalu ngesai ka diri angkat lalu bejalai. Nama agi pengaga ati iya ensepi diri nyau tau bejalai.
Lalu dikangau ka iya ga ibu iya ke enda tau meda. Ko iya “Ni nuan ibu ke enda tau meda. Uji penchelak ka mata nuan.” Disaut ibu iya, “Dini aku tau meda deh anak, mata aku ga buta.” “Enda pia ibu,” ko Bujang Kerimpak Labu.” Uji penchelak ka mata nuan.”
Ninga munyi nya, ibu iya lalu ngasi ka jako iya lalu menchelak ka mata. Mata ibu iya nya tadi lalu lansik meda utai. Nama enda pengaga ati iya ensepi diri lansik tau meda utai.
Udah lepas nya baru Bujang Kerimpak Labu bejako baru enggau ibu iya dua iko nya tadi ;
“Kitai tiga tu ibu nitih ka orang ti udah nurun ngabang ngagai rumah Bujang Kerebau,” ko iya. “Oh, kati ko kami duai ibu nuan tu enggau orang ngabang tak nadai ngepan, tak nadai perengka dikena ?” ko seduai.
“Pasal ngepan nya anang tusah seduai ibu,” ko iya. “Uji kitu ka seduai, lalu nitih ka aku ka sadau kin, lagi aku ngari ka seduai, lalu ngubah gamal seduai awak ka manah.”
Datai sida tiga di sadau, dia Bujang Kerimpak Labu lalu nyepoh mentua iya dalam dulang mas. Pansut seduai iya ari nya, nadai utai ngemanah nya gamal baka ka baru ngangkat ka diri dara. Orang ke bujang ti baru meda pemajik gamal seduai tentu talinga-lilih. Sida tiga pan lalu deka mupok ga nitih ka sida Dayang Ridu ke udah nyau nurun ngabang.
“Aram kitai tiga mupok nitih ka orang ke udah nurun ngabang,” ko iya.
Mentua iya dua iko nya tadi pen deka ga ensepi gamal diri udah pulai bajik baru, nyau baka seduai ti agi biak kalia. Bujang Kerimpak Labu lalu ngajar mentua iya dua iko nya, ko iya ;
“Enti sida Dayang Ridu tauka sabarang orang bukai nanya kitai, seduai madah ka kitai tiga diri menyadi.” “Barang iya meh,” ko mentua iya dua iko nya tadi nyaut iya.
Tembu nya sida tiga lalu nurun ga nitih ka orang ngabang. Leboh sida datai ba pendai sida Bujang Kerebau, dia sida nemu bala sida Dayang Ridu ke dulu tadi agi dia, lalu apin niki ngagai rumah orang ke ngambi ngabang.
Datai sida ba tugong bala orang ke agi begari di pendai, dia sida ngaga diri enda ngetu tak samina pansa lalu ba bala maioh. Tang deh orang lalu ngangau ka sida tiga, lalu nan ka sida mai sama-sama beranti, enda ngasoh beguai dulu ari pangan niki ngagai rumah orang ke begawai. Nyadi mentua indu iya dua iko nya tadi ngelulu ka diri enggai ngetu. Tang Bujang Kerimpak Labu lalu ngau ka jako orang ti nan ka sida ; mentua iya dua iko nya pen lalu nurut ka jako iya ga. Sida tiga ngelulu ka diri baka orang ke datai ari menoa jauh, ngaga diri baka orang ke datai ari menoa ti enda samakai gawai enggau Bujang Kerebau.
Siko pan nadai meh orang ngelala sida tiga, sereta lalu nadai nanya ke penatai sida, rindang kiroh begari ngadu ka diri ti deka niki ngabang. Dayang Ridu empu enda ga ngelala nya laki iya Bujang Kerimpak Labu enggau ibu iya dua iko ke buta enggau ke kait, laban sida tiga udah bebali gamal nyadi manah.
Sida tiga sama-sama bebalut enggau orang maioh. Orang samina ngenong malik ngagai sida tiga laban enda ngelala, tang nadai ga berani nanya ka ari ni penatai sida. Nyadi sida tiga naka ulih ngelalai ka diri, ngaga diri enda ngelala orang ngambi ka orang enda nemu sida iya ga.
Udah tembu mandi lalu beradu meh sida tiga dia bekena ka ngepan enggau pekayan baka orang bukai. Sida endang tak bisi aja ngepan, nama sida deka ngena. Enti sida deka masok, tau datai kadiri sekumbang sida begari ba pendai nya ; lalu bakanya ga pemanah gamal mentua iya dua iko ti indu nya tadi, ngenjing lingut-lingut niki jalai pendai sida Bujang Kerebau mansang ngabang.
Nyadi Bujang Kerimpak Labu pen beradu ga iya lalu dipasok ka iya pekayan chukop magang, lalu pasok ka iya labong surabaya, nadai utai ngumba nya dipeda mata. Samoa orang ka dia lalu ngenong magang meda penyigat gamal iya, lalu ngenong ga sida meda pemajik mentua iya dua iko ka indu. Udah nya sida tiga lalu niki ka rumah Bujang Kerebau sama sereta enggau bala maioh.
Datai di rumah lalu diambat orang ke empu rumah bala sida enggau ai arak, ai tuak, lalu dibantai ka orang penganan penoh chapak. Lepas nya orang lalu nyendia ka pemakai meda sida baka ke lapar, laban orang dia enda nemu penatai sida tiga, disangka orang datai ari menoa jauh. Orang ke empu ruai nya lalu enda nanya ka penatai sida, tak tembu kiroh nyendia ka pemakai enggau utai di irup ka sida tiga.
Udah nya tadi Bujang Kerimpak Labu lalu didudok ka orang begulai enggau bala pengabang bukai ba ruai Bujang Kerebau. Nyadi seduai ka indu endang udah tama ba bilik sida Bujang Kerebau ga begulai enggau bala indu bukai.
Udah tembu orang niki ka pengabang lalu ngelanggar sida bejalai siti rumah, diatu nyau maia orang bebuti meri ngirup disebut kitai masu pengabang ; dia orang lalu ngasoh sida ka indu pansut ari bilik lalu bejalai niti rumah diumba enggau gendang, bejalai tiga kali besundang. Udah nya baru sida nyambut samoa pengabang maioh. Dia deh Dayang Ridu pen lalu pansut ga enggau orang numi pengabang. Nyadi mentua iya dua iko nya tadi pen kena bai orang ke empu rumah sama enggau orang masu pengabang. Maia nya orang balat bendar bebuti enggau pengabang lalu orang ke endang masok agi ngirup maioh bendar ai tuak di irup sida.
Nyadi Dayang Ridu lalu mupok irau ati meda penyigat gamal bujang siko nya tadi, lalu mansang meri iya ngirup. Dia kenu iya mai labu kendi, ke dikumbai ‘Labu kendi aji enchekok tandok, balang jebong tujoh lubok’. Nya nama labu kendi nya tadi. Labu kendi nya endang udah penoh ai tuak deka dikena Dayang Ridu numi Bujang Kerimpak Labu. Ai tuak nya endang udah dichampor iya enggau macham pengaroh sereta digulai enggau rachun ke pemadu bisa seka dikena iya nguji bujang nya, enti iya amat anak orang besai sereta peturun orang berani. Nya kabuah iya deka nguji iya.
“Enti iya tan kena tubai enggau rachun enggau pengaroh, nyangka amat meh iya nya anak orang besai, tentu iya nya uchu orang berani,” ko ati Dayang Ridu din.
Dayang Ridu seruran agi saru, lalu apin nemu Bujang Kerimpak Labu nya tadi laki iya empu. Udah nya mansang iya mai ai tuak ke udah dichampor iya enggau pengaroh, sereta digulai iya enggau rachun dalam labu kendi. Datai iya ba Bujang Kerimpak Labu lalu disua ka iya ngagai bujang nya ai tuak dalam kendi nya tadi. Tang deh Bujang Kerimpak Labu meda Dayang Ridu ngaga iya bakanya ngelulu ka diri enggai ngirup. Nyau kalama Dayang Ridu nimang iya enggau jako bungah, nya baru iya deka ngirup.
“Tang aku minta nuan empu nuntum ka labu kendi nya ngagai mulut aku,” ko iya bejako enggau Dayang Ridu.
Udah nya Dayang Ridu lalu nuntum ka labu kendi nya tadi ba mulut iya ; lalu di irup iya ai nya, peda tak engkeching ai pansut ari nya nyau mesai lengan. Udah nya di irup lalu di insap iya ai ari labu kkendi nya tadi. Peda pansut ai nyau mesai batang tapang. Dia meh Dayang Ridu, kenu ko ensera, nan ka labu kendi enggau naka tulang sekumbang Bujang Kerimpak Labu ke ngirup.
Bujang Kerimpak Labu pan naka ulih ga ngirup ai nya baka ke ukai ngirup ai rachun enggau ai pengaroh, laban iya endang nemu indu nya tadi ati nguji ka penan bulu iya. Ati Dayang Ridu lalu mupo berunding ka bujang nya amat uchu orang berani, enda ulih rachun, enda ulih diberi makai pengaroh. Bujang Kerimpak Labu tuchom malik ngagai Dayang Ridu meda iya udah berani nguji iya.
“Laban iya enda nemu, nya alai iya deka nguji aku,” ko ati Bujang Kerimpak Labu.
Dayang Ridu amat enda nemu iya nya laki diri empu, ke udah ngangkat ka iya ari batu suba. Enti iya nemu tentu enggai iya ngerachun lalaki nya.
“Aku endang nemu samoa utai ti dikereja Dayang Ridu. Tang aku sigi rindu beduan iya. Nya alai aku ngirup ai tuak nya abis-abis, lalu labu kendi nya ditelan aku sama sereta enggau ai tuak,” ko Bujang Kerimpak Labu bejako dalam ati diri udah bekau iya ngirup nya tadi.
Nyadi leboh bujang nya tadi ngirup, dia Dayang Ridu ngeringak nan ka labu kendi. Sereta udah abis ai tuak dalam nya, labu kendi lalu ditelan iya, sereta ngelebus labu kendi ka dalam mulut iya, dia jari Dayang Ridu ke nan ka nya lalu diketup iya.
Enda lama udah bekau iya ngirup ai tuak sereta nelan labu kendi nya taid, peda tak pansut deh labu nya ari tapa kaki iya. Labu kendi ke pansut nya udah puang, nadai agi tuak nadai agi rachun endang udah lichin magang dijamah iya. Nyadi samoa pengabang maioh ke meda utai nyelai nya ngenong magang.
“Sapa orang nya ?” ko sida bejako diri sama diri. Tang siko pen nadai ga orang ngelala iya. Nyadi Dayang Ridu nya tadi mupok balat agi ga irau ati ka bujang nya ; lalu bisi ati deka ngumbai nya bujang ke udah ngayap ngagai iya.
Udah Dayang Ridu meda iya ngirup pengaroh begulai enggau rachun, sereta lalu nelan labu kendi, lalu labu kendi nya udah ga pansut baru ari tapa kaki iya, nya ngasoh iya balat agi irau ati.
“Tentu iya nya amat anak orang berani enggau orang besai pangkat, laban iya tak nadai nya-nya udah ngirup ai pengaroh begulai enggau ai rachun ke diberi ngagai iya,” ko iya.
Nyau puas sida udah bungah enggau bala pengabang, dia mentua iya dua iko nya lalu madah ka diri deka pulai.
“Kami tiga tu pulai, enda ulih bemalam, laban nadai orang ngibun bilik, lalu rumah kami puang bendar, laban orang bukai abis bemalam di umai,” ko jako sida tiga madah ka diri pulai ngagai Bujang Kerebau ke empu gawai sahari nya. Ninga sida bejako munyi nya, nadai ga orang tentu nan ka sida bemalam. Sida tiga lalu nyau nurun ari rumah Bujang Kerebau mulai ka diri ngagai rumah sida empu.
Udah nya tadi iya enggau mentua iya dua iko nya lalu ngaga diri baka ke beguai-guai pulai enggai ka orang ngelala sida. Leboh sida tiga di rantau jalai, dia Bujang Kerimpak Labu lalu madah ngagai mentua iya dua iko nya tadi. Ko iya ;
“Nya alai enggai ka sida Dayang Ridu ngelala kitai enti sida pulai ngabang ila, kitai enda tau enda pulai jai baru baka selama. Aku pulai nyadi kerimpak labu baru, lalu barang seduai kait, pulai kait baru, lalu barang seduai buta, pulai buta baru,” ko iya bejako enggau mentua iya dua iko nya. Lama bendar seduai betalat ka jako madah ka diri enggai agi bebali nyadi jai baru.
Dia iya lalu bejako enggau seduai, ko iya; “:Seduai anang tusah ati, laban aku tau ngaga seduai pulai manah baru baka seduai ke diatu, barang maia seduai deka,” ko iya.
Ninga jako iya munyi nya, baru mentua iya dua iko nya tadi deka nurut ka jako iya. “Barang iya meh Jang,” ko seduai, “enti nuan tak besemaia ngaga kami duai manah baru bakatu, deka ga kami duai dibai nuan jai baru diatu,”
Sereta sida tiga udah datai di rumah, iya lalu ngajih ka ibu iya dua iko nya pulai jai baru. Iya ke kait lalu pulai kait baru ; Lalu iya ke buta pen pulai ga buta baru. Udah nya iya empu mali diri, lalu masok kerimpak labu baru. Lalu dia meh iya baka selama diau ba karong iya kerimpak labu.
Lepas nya sida tiga nat ka diri sekumbang ke nganti orang pulai ngabang. Bujang Kerimpak Labu endang udah meri pesan ngagai mentua iya dua iko nya enda ngasoh seduai nusoi utai ti udah dipeda seduai.
“Seduai anang sekali-kali maioh mulut lalu nusoi utai ti udah dipeda seduai ; anang mega seduai sabarang utai tusoi enggai ka orang jampat nemu aku sigi endang mensia,” ko iya ngajar seduai nya tadi.
Hari siti nya baru sida Dayang Ridu enggau sida sarumah pulai ngabang. Udah tembu sida Dayang Ridu begari pulai ngabang nya tadi, dia Bujang Kerimpak Labu lalu bejako enggau iya.
“Gamal dipeda aku tak balat endar sida Endu nya ngemuas ka diri ngabang sahari samalam tu, tak bisi bendar tanda iya sebelah kuyu, sebelah moa,” ko iya.
Ibu iya dua iko nya tadi tuchom dalam ati seduai din ninga Bujang Kerimpak Labu beduan Dayang Ridu, laban seduai iya nemu ulah sida ke beduan iya leboh ngabang. Seduai endang meda sida betundi. Tang ibu iya dua iko nya enda berani bemunyi takut ka Kerimpak Labu nganu seduai.
“Labu tu nemu bendar ngelulu ka utai. Dini nuan nemu kereja kami ? Ukai nuan meda, mata deh nuan nadai, dini nuan nemu kereja kami,” ko iya nimbal jako Bujang Kerimpak Labu, laban iya enda nemu iya nya beduan iya.
“Sabarang ko nuan, enti nuan deka bula ka aku,” ko Bujang Kerimpak Labu nyaut Dayang Ridu nya tadi.
7. GAWAI BUJANG BABI
Dalam dua tiga hari udah nya datai baru ga orang ngagai rumah Raja Ribut ngambi ngabang. Lalu sakali tu Bujang Babi niri ka gawai burong, nya alai samoa orang ti samakai enggau iya kena ambi iya magang ngagai gawai nya. Ninga orang bisi ngambi ngabang bakanya, dia Dayang Ridu lalu beguai madah ngagai Bujang Kerimpak Labu madah ka diri deka enggau Bujang Kerimpak Labu.
“Aku tu bisi ati deka enggau orang ngabang ngagai orang ke begawai,” ko iya bejako enggau Bujang Kerimpak Labu.
“Nya enggau meh, enti diri bisi ati,” ko Bujang Kerimpak Labu nyaut iya, “tang aku enggai enda meri pesan ngagai nuan mimit. Leboh nuan datai ba orang ka begawai din ila anang enda ngetak diri betundi enggau sida ka biak enggai ka kulit abis rajai, enggai ka ati bisi enda nyamai,” ko iya satengah beduan satengah ngelalau Dayang Ridu enggau jako.
Dayang Ridu lalu nyaut, ko iya, “Dini aku deka betundi enggau orang bukai. Aku ga bisi nuan ka laki,” ko iya. “Nya keba manah enti nuan nemu rindu ka aku,” ko iya.
Ngabang meh Dayang Ridu tu tadi, ko iya madah ngagai Bujang Kerimpak Labu sama-sama nurun enggau orang maioh. Enda lama udah orang nurun ngabang, kira maia sida Dayang Ridu udah datai ba pendai orang ke begawai, dia Bujang Kerimpak Labu lalu ngangau ka mentua iya dua iko ke kait enggau ke buta.
“Aram kitai tiga nitih ka orang nurun ngabang baru,” ko iya.
Udah nya iya lalu ngajih ka dulang mas endor nyepoh seduai awak ka pulai manah baru.
“Kitu ke seduai aku ngaga seduai pulai manah baru baka ke dulu,” ko iya. Seduai lalu beguai-guai ga mansang ngagai iya. Iya lalu nyepoh seduai baru ba dulang mas. Pansut seduai ari nya lalu bebali manah baru baka ka angkat dara. Seduai lalu lekik-lekik katawa gaga ka diri udah bebali manah bakanya. Seduai lalu megau sida sarumah nya, orang pen lalu datai ga kia meda ka sida tiga. Datai sida sarumah dia meda gamal sida tiga enda nemu utai ngemanah nya agi. Ngenong magang sida sarumah meda utai nyelai bakanya tau nyadi dia. Orang lalu beguai nanya ka berita ngagai Bujang Kerimpak Labu nanya ka gaya penatai iya ba rumah sida. Ditusoi iya ga beria ngagai orang, lalu sakeda alit ati, bisi enda arap ka rita iya ke ngumbai diri bekarong ba kerimpak labu.
Nyadi leboh maia nya, Dayang Ridu nyau bisi ati sangka ka akal enggau kereja Bujang Kerimpak Labu ti udah beduan iya, leboh sida ngabang ngagai gawai sida Bujang Kerebau. Nyadi diatu iya nyau nemu dalam ati diri, nemu ulah siko nya beduan iya. Nya alai iya lalu bula ka bujang nya madah ka diri deka enggau orang ngabang baru sakalitu, tang iya enda nurun. Iya ke nurun ngabang ko iya nya tadi, lalu niki ka sadau. Nadai siko sida sabilik meda iya belalai di sadau, mentua iya dua iko enggau Bujang Kerimpak Labu pan enda ga nemu. Nya alai sida tiga endang amat sangka ka iya udah enggau orang nurun ngabang.
Ari iya ke belalai di sadau nya tadi, dia iya tepeda ka samoa kereja Bujang Kerimpak Labu ti bebali nyadi mensia, lalu pansut ari karong iya. Gamal iya leboh udah nyadi mensia nadai utai ngemanah nya dipeda Dayang Ridu. Nadai kala iya meda bujang sida di menoa nya, bisi tau endor nyema ka iya. Lalu chara iya ngaga ibu dua iko nya tadi bebali enda sakit agi, lalu pulai biak, baka ka baru angkat dara dipeda iya magang ari sadau.
Udah Dayang Ridu nemu diri kena keduan Bujang Kerimpak Labu bakanya, iya lalu bejako ngeransi diri empu.
“Naka meh aku tu udah dikeduan perut buntas, perut bebas iya nya deh ! Patut iya nemu samoa kereja aku ngelama tu, ga iya empu ke ngereja nya,” ko iya gut-gut bejako ka diri tinggal sida udah nyau nurun ngabang.
Lepas nya tadi lalu nurun iya ari sadau, lalu ngambi karong Bujang Kerimpak Labu ke tinggal ba semak moa pintu, lalu di pechah ka iya, lalu ditunu iya ba api dapor, awak ka nadai agi ditapat ka iya pulai ngabang.
“Nya, nyah, angus meh nuanlabu awak ka nadai endor bujang nya belalai agi !” ko puchau Dayang Ridu leboh iya nunu karong bujang nya tadi. “Udah tu ila tau iya pulai bebali nyadi mensia belama-lama,” ko iya.
Nyadi Bujang Kerimpak Labu enggau mentua iya dua iko nya tadi udah nyau nurun nitih ka orang ngabang. Datai sida ba pendai Bujang Babi, dia deh Bujang Kerimpak Labu nadai tepeda ka Dayang Ridu enggau sida apai iya dia begulai enggau pengabang bukai ke udah datai dulu. Iya pen lalu sangka ka Dayang Ridu bisi nemu pengawa ke udah digaga iya leboh gawai ke dulu, iya nya gawai Bujang Kerebau. Iya lalu beguai-guai mai mentua iya dua iko nya tadi nikal baru pulai ka rumah. Seninjik bendar seduai nya tak deka ga nurut ka jako iya.
Udah Dayang Ridu ke nunu karong bujang nya, iya lalu nyuman ka diri di rumah nganti pemulai sida ke ngabang. Iya lalu ngayan ka diri ngipa sida datai. Enda lama udah iya nunu karong Bujang Kerimpak Labu nya tadi, sida pen datai ga nikal dibai iya pulai, meda Dayang Ridu nadai enggau orang ngabang. Datai sida tiga di rumah nemu iya bisi dia nganti sida. Bujang Kerimpak Labu lalu bejako enggau iya, ko iya ;
“Nuan tu beduan. Nuan tu bula ka aku,” ko iya. “Iya ga nuan balat agi beduan aku dulu, nya alai aku malas nuan,” ko Dayang Ridu.
Udah nya Bujang Kerimpak Labu deka pulai baru ngagai karong iya, lalu nemu baju diri nadai agi ba endor iya ke engkah. Iya lalu nanya ngagai Dayang Ridu nya tadi.
“Ni baju aku, engkah aku ditu tadi ?” ko iya.
“Gari kerimpak labu ke dia tadi udah aku tunu ; nuan ga beduan aku. Kabuah alai aku nunu iya awak ka nuan enda agi pulai ngagai nya baka ngelama tu,” ko Dayang Ridu.
8. ANAK TEMUAI
Nya alai nadai meh chara Bujang Kerimpak Labu nya tau pulai ngagai karong iya agi, iya ga udah ditunu Dayang Ridu. Diatu iya udah terus nyadi mensia laban utai nadai agi ka karong iya. Iya nya tadi nama agi penyigat gamal iya ; iya ga anak Kumang seduai Keling, endang nadai penyalah, nadai endor mantah ; moa mata iya manah. Lalu mentua iya dua iko tadi pen nyadi manah, nyau pulai biak baru laban udah disepoh ka iya ba dulang mas.
Nyadi hari siti baru sida sarumah enggau apai Dayang Ridu pulai ngabang. Leboh Raja Ribut datai di rumah, dia iya tepeda ka bisi anak temuai nadai utai nyigat nya gamal dudok di ruai iya, tak ngena endar gamal endang baka ka nganti iya pulai ngabang. Laban iya ke enda ngelala orang nya, iya lalu nanya anak temuai nya.
”Kamaia nuan datai Igat ?” ko iya. Tang Bujang Kerimpak Labu bula ka iya madah ka diri baru datai pagi nya.
Ninga saut orang bujang nunyi nya, lalu beguai-guai meh Raja Ribut tama ka bilik deka nanya ngagai Dayang Ridu, nanya ka sapa temuai nya. Datai iya di bilik lalu meda dua iko ga indu dara nadai utai ngemajik-majik nya gamal udah dudok dunga-dunga ba bilik atas sida. Iya lalu alit ati, enda nemu sapa temuai ke datai ngagai sida. Nya alai iya lalu beguai-guai nanya ngagai Dayang Ridu.
“Sapa temuai ke bisi dudok ba ruai enggau ba bilik kitai nya Endu ? Lalu kini ka tunga ibu nuan dua iko ke sama enda dapat nadai dipeda ditu ? ko iya.
Dayang Ridu pen lalu madah ka samoa utai ti udah nyadi dikereja Bujang Kerimpak Labu, lalu madah ka temuai ke dudok changok-angok di ruai, nya Bujang Kerimpak Labu. Nyadi dara dua iko nya ibu iya ke kait enggau iya ke buta, tang udah diajih ka Bujang Kerimpak Labu nyadi biak baru. Ninga utai ditusoi Dayang Ridu nya tadi, apai iya lalu betempap pah gaga ka diri bemenantu ka bujang nya mua penyigat gamal.
Udah Bujang Kerimpak Labu bebali nyadi mensia, nya baru ati iya nadai kia-kia ka agi. Dayang Ridu lalu ngaku iya nya ka laki iya. Lalu pia ga Raja Ribut apai Dayang Ridu lalu ngaku iya ka menantu endang nadai agi ati nyanya, enda baka asai ati iya leboh ke meda iya dulu suba.
Nyadi Raja Ribut enggau sida sarumah enda ngelala iya, lalu enda nemu apai indai iya. Laban sida meda penyelai iya tak bekarong ka kerimpak labu. Nya alai sida lalu nanya ngagai iya, laban ngelamatu sida enda ngelala iya, lalu enda iboh ka iya,laban iya enda baka gamal iya ke diatu. Diatu baru sida nemu lalu alit ati meda iya udah nyadi mensia.
Lepas nya Bujang Kerimpak Labu pen nyau deka ga nusoi samoa utai ke udah nyadi ba iya, kenyau ari iya ada, endang ada baka kerimpak labu.
“Nyadi leboh aku agi mit,” ko iya, “dibai indai aku Kumang mandi ka ai, di engkah iya ba atas batang. Dia aku kena pangka ka umbak lalu rarat leboh indai aku enda malik,” ko iya. “Aku ke rarat nya tadi dikumbai apai seduai indai ditangkap baya. Nya alai aku diulit ka kami sarumah di Panggau Libau, laban sida din ngumbai aku udah mati,” ko iya nusoi jerita diri empu ngagai sida mentua iya dia.
Nya alai nampong jeria aku nya tadi,” ko iya. “Nasit bendar Dayang Ridu bisi mandi maia aku ka rarat leboh nya, baka ka nemu aku rarat ga iya. Nyangka nya endang udah diator petara, enti enda pia tentu aku lalu mati rarat nadai orang ngambi. Tentu aku enda nyadi mensia baka aku ti diatu. Nya alai aku meri besai terima kasih ka apai nuan enggau nuan empu Dayang Ridu, ti nemu rindu lalu beguna ka aku, laban aku udah nulong ngangkat ka nuan ari batu leboh nuan mandi suba,” ko iya.
“Nambah ka nya,” ko iya ga nampong jerita iya nya tadi,” aku gaga bendar meda Dayang Ridu nemu nunu karong aku awak ka aku lalu nyadi mensia baka ka diatu. Laban nitih ka sumpah antu enti karong aku nya enda ditunu anak dara orang, aku enda tau nyadi mensia. Lalu pia mega sabarang sapa indu dara ke nunu karong aku, nya meh jadi ka bini aku,” ko Bujang Kerimpak Labu.
9. RAJA RIBUT
Udah Raja Ribut ninga samoa berita ke ditusoi Bujang Kerimpak Labu pasal iya empu nya tadi, sereta lalu nemu iya nya anak Keling seduai Kumang, ati iya lalu andal bendar laban nemu diri ulih berisan enggau seduai iya. Lepas nya iya lalu mai sida sarumah baum berunding deka beselamat, kena madah ka pengaga ati diri ngagai Keling seduai Kumang, lalu kena madah ka anak seduai bisi ba sida dia. Nya alai iya lalu deka ngambi sida di Panggau Libau ngabang ngagai sida ke beselamat.
Udah tembu baun sida sarumah lalu berengkah nyendia ka diri deka beselamat. Tiga hari terit sida nyendia ka pengerami nya, nyendia ka macham utai dikena nganti pengabang, nganti bala orang ari Panggau Libau. Udah tembu sida nengkira gawai, nya baru orang lalu nurun ga ngambi ngabang ngagai sida di Panggau Libau.
Nyadi sida ngambi ngabang lalu diasoh nusoi kabuah alai sida beselamat ngagai Keling seduai Kumang. Sida di asoh nusoi ngagai seduai madah ka anak seduai benama Kerimpak Labu ke disangka seduai udah ditangkap baya, diatu udah bebini ngambi Dayang Ridu anak Raja Ribut. Diatu iya udah terang nyadi mensia, enda agi bekarong dalam kerimpak labu.
Lalu ditamppong sida ke ngambi ngabang nya tadi ga jako leboh sida datai ba rumah orang di Panggau Libau, nusoi ngagai Keling seduai Kumang madah ka anak seduai ke benama Kerimpak Labu enda mati. Ninga nya nadai meh utai ngaga nya ati seduai, lalu mai sida sarumah nya sama-sama ngabang ngagai sida Raja Ribut ti beselamat ka anak iya jadi enggau Bujang Kerimpak Labu. Lalu gaga mega seduai ka diri bulih menantu, lebih agi gaga ka anak seduai ke disangka nyau udah temu baru.
Nyau datai ba maia hari ke beselamat, lalu ngabang samoa-moa meh sida di Panggau Libau ngagai sida Raja Ribut ke beselamat. Leboh penatai sida ke ngabang ba rumah Raja Ribut, sida lalu disambut orang enggau naka pemanah-manah. Naka ulih sida, nyambut bala pengabang ari Panggau Libau. Tuak pen maioh endar kena orang nyambut bala pengabang. Nyadi Kumang seduai Keling naka pengaga ati, laban betemu enggau anak seduai ka udah bebali nyadi mensia, lalu gaga mega ka diri udah bulih Dayang Ridu ka menantu.
Sereta udah tembu orang merarau, dia Raja Ribut lalu ngempuru ka samoa pengabang, mai orang mending ka jako iya ke nusoi kabuah sida rami sahari nya.
“Nya alai bakanya ko kabuah kitai ka berami sahari tu,” ko iya, “ukai tegal laban aku chukop pemisi, tang aku udah chukop pengaga ati ka Endu Dayang Ridu seduai Bujang Kerimpak Labu udah jadi diri melaki-bini, udah begulai udah sajalai. Enti nitih ka pengaga ati aku ka seduai ke begulai, lalu aku udah berisan enggau Kumang seduai Keling ari Panggau Libau lebih agi ari tu utai disendia ka aku ka kitai maioh ditu, tang pemisi aku bengat tekelalu kurang, nya alai ka tu semina dikena aku mantup ka pengaga ati,” ko iya.
Ninga Raja Ribut udah bejako munyi nya, Keling lalu nimbal iya .
“Ukai nama agi meh jako nuan nya isan Raja Ribut,” ko iya. “Kami duai Kumang balat bendar udah kesal, udah tusah ka Kerimpak Labu nya ngelama tu. Kenyau ari iya dikandong ka indai iya datai ka sahari tu baru aku bisi pengelantang. Iya dikandong ka indai iya lama agi ari sida bukai. Udah nya diperanak ka iya, peda tak ada kerimpak labu. Udah besai iya nya tadi dibai indai iya mandi. Datai di ai tak lesap nadai temu tunga, nadai temu berita, nya alai disangka kami duai udah mati ditangkap baya.
Nya alai sahari tu iya udah ngator diri jadi enggau Dayang Ridu, lalu kami duai indai iya enggau kami sarumah di Panggau Libau abis pengaga, abis pengerindu ati. Gaga ka iya udah nyadi mensia, lalu rindu ka iya udah nyadi menantu nuan,” ko iya.
Nyadi Pandak Sagatak seduai Bunga Nuing sida ari Panggau Libau sama bisi enggau orang ngabang. Sereta tembu orang ke bejako nya tadi, orang lalu berami ngirup, bebuti enggau diri sama diri. Dia Pandak Sagatak laban iya endang manchal agi, lalu mansang murus belakang Dayang Ridu.
“Akai-rai, bajik endar gamal menantu aku,” ko iya.
Meda iya manchal bakanya lalu dirara Bunga Nuing. “Anang nuan bakanya, anang nuan tekelalu ngayah ka orang bakanya,” ko iya.
Lalu disaut Pandak Sagatak, “Eh, ukai aku ngayah ka iya, aku ga samina murus iya aja,” ko iya. Udah nya agi ga iya manchal laban udah ngelu pala, puas ngirup tuak, lalu dipurus iya baru.
Agi ga Bunga Nuing ngerara iya munyi ke dulu tadi. Disaut iya baru ga, laban iya ke jampat ringat, lalu deka dibai iya bepantap Bunga Nuing.
“Ukai aku lap alai nuan tak ngemalu aku, enti nuan deka pansut ka tanju ka tua, bepantap enggau pedang, enti nuan berani,” ko iya nganu Bunga Nuing.
“Enggai aku bepantap,” ko Bunga Nuing, “enda aku berani ngelaban nuan,” ko iya. “Nya alai anang bemunyi enti nuan enda berani. Nama guna nuan kiroh ka aku. Aku gaga ka menantu kitai,” ko iya. “Au meh,” ko Bunga Nuing, “enti nuan enda tau dirara, barang ko nuan dia meh.”
Udah nya enda ga iya manchal megai Dayang Ridu. Lepas nya Bunga Nuing seduai pandak Sagatak sama mabok, lalu samalam-malam nya seduai dipegulai ka orang tindok abis kamah dibalut mutah.
Tumu pagi hari siti sida Keling lalu pulai ga ngabang enggau ati gaga, gaga ka anak ke udah dikumbai mati, tang agi idup, lalu gaga ka diri udah bulih menantu. Nya alai dua bengkah utai ngasoh gaga.
Pandak Sagatak seduai Bunga Nuing ke mabok nya tadi lalu ditinggal ka sida ba rumah Raja Ribut. Dani seduai nemu diri udah ditinggal ka orang pulai. Lalu ensugau meh seduai angkat, agi tebimbing, agi tesudu neruju pun kayu, abis terap, nyau tetingkap, abis bebaring ba tebiang. Bejalai meh seduai samalam-malam nya, nyau dinihari pagi siti baru datai di rumah sida di Panggau Libau.
Tiada ulasan:
Catat Ulasan