Ensera Tichin Ajih Uging

Ensera Tichin Ajih Uging.

Agi mit ka amai ninga ensera Uging tu.Sapa kala ninga ensera tu tau ngangkat jari dulu.

Bisi dulu kelia bisi siku orang ke benama Uging. Iya diau kediri nadai orang enggau begulai. Laban iya nadai bini, nadai apai indai enggau begulai ketegal udah lesie dikayau munsuh.Uging mega baka orang bukai rambau nya kelia. Ngidup kediri bumai betaun mega.

Nyadi bisi sekali Uging di rumah nadai gawa ke tanah. Iya diau di rumah ngaga bila bubu. Kira nyau tinggi hari diak iya bisi ninga orang ngangau nanya ke penyadi rumah. Ninga orang bisi ngangau ari tanah, diak Uging lalu nilik ari rumah iya. Diak Uging bisi meda orang bediri ba tengah laman semak kaki tangga.

Uging madah ke rumah iya tau ditiki. Tang Uging enda ngelala orangnya. Gamal orangnya besai sereta tinggi. Ninga Uging madah ka rumah iya tau ditiki, orangnya pan lalu niki. Sereta datai dalam rumah, orangnya nadai bejaku, tak nadai bebah-bah tak lalu ngerekak Uging nadai bepadah. Nama agi deh tudah Uging tak lalu diinsah ka orangnya meh enggau penapat inat. Iya meh tudah Uging nyau ambis tekemi-kemi, tebira-bira. Nyau ambis deka luput tudah Uging nya baru orangnya badu nginsa Uging. Orangnya pan lalu mulai kediri.

Udahnya baru meh tudah Uging nemu orang ke udah nginsah iya nya tadi ukai kitai mensia tang nya Antu ranggau. Udah antunya pulai diak tudah Uging bejaku kediri.
“Parai meh diinsah antunya tadi” pia ku tudah Uging.

Kedua hari udahnya, datai baru mega antunya. Datai iya ba tengah laman rumah Uging, diak antunya pan nganggau ka Uging. Tang Uging enda nyaut semina tak duduk dalam rumah enda memunyi. Ninga Uging nadai memunyi, antu pan lalu niki.
Sereta lalu tama ke bilik Uging, dia iya meda Uging bisi duduk dalam bilik. Antunya pan nadai chechamang tak lalu berengkah nginsah Uging baru. Insah iya Uging sampai Uging nyau ka luput baru iya badu nginsah Uging. Udahnya antu tadi pan lalu mulai ka diri ke kampung baru.

Udah antunya pulai, Uging pan bejaku kediri.
“Ah… merinsa endar ditundi antunya neh” ku Uging bejaku kediri. Uging pan berunding. “Dini alai aku tu belalai pagila” ku ati Uging.
“Manah aku belalai di sadau” ko ati Uging.
Iya meh malam udah makai, tinduk mega tudah Uging. Iya meh hari tawas Uging lalu niki ke sadau. Lalu belalai di sadau din. Kira nyau tinggi mata panas, dinga Uging datai baru ga antunya. Dinga antunya pan nyau datai semak rumah Uging. Dinga udahnya pan lalu ngangau ka Uging. Tang Uging sigi enda nyaut. Ninga Uging nadai nyaut, antu pan lalu niki. Datai di dalam bilik Uging, peda iya nadai ga Uging ayan. Giga iya nadai ga Uging. Kanggau ke iya pan nadai mega Uging nyaut.

“Uji aku niki ke sadau” kenu ko antunya bejaku.
Datai iya di sadau, peda iya Uging bisi di sadau. Nama agi deh. Nadai chechamang baka dua hari ke udah, iya lalu berengkah nginsah tudah Uging baru. Insah iya amat-amat tudah Uging sampai tudah tuai nyau ka luput baru iya badu nginsah Uging. Antu pan lalu mulai ke diri baru.

Uging pan berunding. “Amat merinsa aku diayah ke antunya neh” ku Uging. Sepengudah ke tembu makai lemainya Uging pan ninduk Kediri nat ka bekau udah lelak diinsah antunya tadi. Enda berasai tinduk, hari pan tawas. Paginya Uging berunding ke endur iya ulih ngelalai kediri saharinya laban iya segi nemu antu nya segi datai baru. Puas ke berunding, diak Uging deka belalai dalam giling tikai ba pemanggai.

Iya meh nyau tinggi hari, diak Uging lalu niki ke pemanggai serta lalu tama dalam giling tikai. Bedau lama Uging udah ngelalai kediri dalam giling tikai, diak iya ninga antunya bisi nganggau ke iya ari tanah. Tang Uging enda nyaut. Semina engketut nat ke ati ti takut dalam giling tikai. Ninga Uging nadai nyaut, antu pan lalu niki ke rumah.

Datai di bilik diak antunya lalu gining-gining ngiga penungga Uging. Nyau kepuas, diak antu lalu bejaku dinga Uging ari giling tikai endur iya belalai.
“Eh… ka tinduk mata tu” ku antunya dinga Uging.
“Manah aku nganchau tikai Ugingnya” ku antunya bejaku baru.

Antunya pan lalu narit ari pemanggai sereta lalu dianchau. Peda iya Uging bisi dalam giling tikainya. Nama agi deh tak enda kakang meh iya lalu berengkah nginsah Uging baru. Uging diinsah iya sampai tudah Uging nyau ka luput. Nya baru antunya badu nginsah Uging. Udahnya antu pan lalu mulai kediri baru. Udah antunya pulai, Uging pan bejaku Kediri berandau nengali. “Ah… merinsa bendar meh aku tu diayah ke antunya” kenu ku mutap Uging mucau kediri empu.

“Dini meh aku tu naruh diri pagila” ku Uging. Enda berasai berunding hari pan malam. Sepengudah makai Uging pan tinduk. Iya meh pagi, Uging lalu berunding deka naruh diri dalam tajau sarang beras.

Iya meh hari nyau tinggi Uging pan lalu tama tajau sarang beras. Diak meh tudah Uging nat kediri dalam tajau sarang beras. Enda lama udahnya, diak Uging bisi ninga antunya datai baru. Datai semak rumah diak antunya lalu nganggau ke Uging baru. Baka hari ke udah-udah. Tang Uging sigi enda nyaut tang semina nat ke pemuyan diri dalam tajau sarang berau din.

Ninga Uging nadai nyaut, antunya pan lalu niki ke rumah. Datai di bilik iya lalu ngiga Uging baru. Kanggau ke iya Uging nadai ga nyaut. Nyau kepuas antu pan bejaku dinga Uging.
“Eh… lapar endar perut tu. Manah agi aku berapi manduk beras Ugingnya” pia ku antu nya. Iya lalu ngerebak ke tudung tajau sarang berau Uging. Peda iya Uging bisi diak.

Nama agi deh. Tak lalu ditarit iya tudah Uging ari tajau sarang berau nya. Iya meh Uging udah pansut ari tajau sarang berau nya, Uging lalu diinsah antunya baru baka ke dulu-dulu. Iya meh Uging nyau ka luput baru antu ngelengka ke Uging. Antu pan lalu pulai kediri baru.

Udah antunya pulai, dia Uging pan bejaku kediri lalu berunding bakani chara iya ulih munuh antunya. Nyau kepuas-puas ke berunding. Diak Uging lalu tulih ke akal siti.
“Manah aku nguji ngaga bubu” ku ati tudah Uging. Udah putus runding dia Uging lalu nurun ngiga perin ke bilak bubu. Uging mega lalu ngiga rutan dikena iya ngelalin bubu. Udah Uging bulih semua rengka ke dikena ngaga bubu, Uging pan lalu mai semuanya pulai ke rumah.

Datai iya di rumah, Uging pan lalu berengkah melah perin ke lambar bubu. Udah semua tembu. Uging pan lalu berengkah ngaga bubu. Lalu gaga Uging selemai-lemai tamping ngagai malam. Iya meh hari ka tawas. Bubu Uging pan tembu. Bubu Uging besai bendar gaga iya bela enggau mua pintu. Peninggi iya umbas bendar endur bediri. Bubunya lalu ditan ke Uging ba mua pintu iya diak.

Udah Uging tembu nan bubu, Uging lalu nuduk kediri dalam bilik. Kiri nyau tinggi mata panas antu pan datai baru. Ari jauh dia iya lalu ngaggau ke Uging.
“Ni nuan Uging. Bisi di rumah nuan” ku antunya dinga Uging. Uging lalu nyaut. “Tu aku. Bisi ditu meh aku nadai mindah. Niki meh” ku Uging.
Antu pan lalu berumban niki ke rumah Uging laban ke berumban niki diak antunya nadai merati ka utai bukai. Datai iya ba pala tangga diak iya lalu ketawa engkakah lebuh iya meda Uging bisi duduk dugau-dugau ba tengah bilik. Enda berasai antunya pan lalu tama bubu Uging. Ka iya pansut enda ulih laban bubunya chukup tegap di gaga Uging. Meda antunya kusil-kusil ngiga jalai pansut, diak Uging lalu mantai ke sangkuh iya ari pemanggai. Sereta udahnya diak uging lalu ngerejang antunya. Peda antunya nyau burak mata sangkuh Uging ngerejang ia. Ensepi diri ngena rusuk iya ba encawit diak alu bejako.
“Apu…Anang munuh aku meh Uging. Kasih ke aku” Ko antu bejaku nuju Uging.

“Aku enda kasih ke nuan. Sigi deka munuh nuan, merinsa bendar aku berapahari tu ke udah diinsah nuannya. Nya alai saharitu, tu idar aku mega medis nuan” Ku Uging.

Lalu rejang ka Uging baru sangkuh iya ngagai antu ke benung dalam bubu.
“Anang munuh aku Uging” Ku antu bejaku baru.
“Lagi aku meri nuan tajau” Ko antu.
“Ehhhh…aku enda beguna tajau. Aku bisi tajau” ku Uging bejaku baru.
“Kati enti aku meri nuan tawak deh Uging?”
“Tawak enggai” Ku Uging nimbal.
“Kati enti gong deh Uging?”.
“Nya enggai mh aku” Ku Uging nyaut antunya baru.
“Nama utai kedeka nuan deh Uging?”
“Aku sigi nadai utai kedeka. Semina deka munuh nuan aja. Laban pedis endar aku jamah nuan berapa hari ke udah” Ku Uging.
“Anang bakanya meh Uging. Lagi meh aku meri nuan tinchin ajih” Ku antu madah ka Uging.
“Eh… bula nuan” Ku timbal Uging.
“Amat Uging Enda aku bula ke nuan”.ko antunya agai ia.

Udahnya antu pan lalu nyua ke tinchin ajih ngagai Uging.
Uging pan lalu nguji ke tinchin ajih ke diberi antu rayanya.
“Enti nuan tinchin ajih ti amat bisa. Aku saharitu deka minta semua pemakai ke nyamai-nyamai” Ku Uging.

Enda lama udahnya peda datai semua pemakai ke dipinta Uging. Nya baru Uging pechaya ke tinchin ajihnya. Udahnya Uging pan lalu ngelepas ke antunya ari dalam bubu. Antu nya pan lalu mulai kediri ke dalam kampong puang. Uging pan nyau kaya-raya mega laban tinchin pengajihnya.Uging bulih bini naka pemajik.

Ambis.Ensera aja tu kaban.Ensera ditusi orang tuai.