Jerita Kara Unggie

Nyadi bisi bukit sigi ti dikumbai Bukit Entawa tu dalam Sg. Udau, pati Batang Paku, dalam Saribas. Bukit Entawa tu enda berapa bangat tinggi, lalu di pulau leboh rambau sida Iba laki Inchuk ke berumpang menoa nya menya. Kabuah mulau bukit nya laban Bukitan siko benama Unggie ke peramaan nyumpit ditemu mati dia. Lalu nampong tu lagi kitai ninga ka kabuah alai bukit nya di bali baru nama ngagai Bukit Kara Unggie. Lagi mega kitai ninga ka cherita pasal Entawa dua kayu tumboh dia ke tau alai minta panas enti hari kelalu berenggu ujan, lalu tau mega endor minta ujan enti hari kelalu lama panas.Rambau ke mulau Bukit Entawa nya menya endang udah meda Entawa dua kayu tumboh dia. Sakayu kuing ari matahari idup lalu sakayu kuing ari matahari mati. Laban ari mimpi Ingging, siko ari orang ke pun diau di menoa nya, dia orang nemu Entawa nya tau alai minta panas enggau ujan. Ingging ke bemimpi tu dudi ari Unggie ke ditemu mati ba Bukit nya.
Nyadi Unggie tu bansa Bukitan raban Entingi tuai Paku ke berumah di Bukit Saban tinggi kediri nadai nenjang, tebing kiba mudik Batang Paku. Unggie tu endang dikarap ka Entingi ka tuai nembiak iya ngikup ka munsoh ngelingi menoa sida, laban iya tu landik bendar bejalai sebelah babas, lalu rajin nitih ka ator tuai sida. Lemai siti, udah bekau sida ngikup, Unggie bejalai ngagai Entingi.
“Aku, tuai, pagila deka nyumpit ngiga lauk, lama bendar udah nadai lauk,” ko Unggie bejako enggau Entingi.“Sapa enggau nuan deh?” ko Entingi, lalu nanya ka tunga iya ke deka bejalai.“Kediri aku, deka bejalai ngulu Batang Anyut, tang enti naka dua malam kita anang ngiga aku,” ko Unggie nyaut Entingi.

“Nyadi nuan tu bejalai kediri, nya alai enti utai bisi lain asai tau ka lain gamal anang majak ka diri,” ko Entingi.

“Pia meh, enda aku majak ka diri,” ko Unggie.

Hari siti dia Unggi lalu besikap perengka, sumpit, temilah, duku enggau bekal. Udah nya iya lalu mupok. Tang leboh iya nurun tangga dia mata kiba enggi iya tak rapas enda tepeda ka laka belabong jarang, tak enda mukai-mukai lalu tekelinchir kaki iya serta lalu teraap. Sumpit ke disaan iya lalu ngelantar kabaroh serta lalu numbok babi. Laban ke bisi sangkoh dikebat ka ba ujong, babi nya tadi lalu mati. Dia deh Unggi lalu nikal ngagai Entingi. Babi ke kena tumbok sangkoh Unggie nya tadi endang babi Entingi empu.“Baka nya aku tu Entingi, babi nuan kena banchak sangkuh aku leboh aku ke teraap ba kaki tangga tadi. Kati ko baka adat ba senetang utai ti baka tu, deh?” ko Unggie.
“Nadai adat, laban ukai ati nuan deka munoh tang kategal nuan teraap. Babi nya emperu olih nuan, anang guai nurun. Tu ukai tungkal aku, tungkal nuan empu.” Ko Entingi.“Pia pen Unggal, aku enggai enda nurun saharitu, laban panjok aku di Nanga Sungai Perin lama udah enda diabas,” saut Unggie.Iya lalu bekuing nurun. Entingi lalu ngila ka iya ari pala tangga. Datai Unggie ba kaki tangga lama iya tebalenga baka baya mabok keroh, tak lama ngenong bala empelekong mabok amboh. Udah nya iya lalu bekejang majak jaoh, malik ka rumah ai mata tak nyaia semampai laboh dipeda Entingi. Belakang Unggie nadai agi dipeda, Entingi pen lalu mulai ka diri ari pala tangga nya.
Tiga malam Unggi udah nurun nyumpit, lalu nadai udah pulai. Kaempat lemai lepas nya Entingi lalu ngepuru ka samoa sida sarumah. Orang bela udah datai magang ba ruai Entingi, dia Enting lalu bejako.
“Aku ke ngempuru ka kitai sarumah tu baka nya ga, nyadi Unggie tu udah bejalai nyumpit ko iya madah ngagai aku enti lebih ari dua malam tau digiga. Tu iya nyau ka tiga, tu ka empat malam lemai tu lalu nadai ga iya, lalu apin pulai.”“Sebarang ko ator kita ke tuai,” pia ko saut orang maioh. “Kati ko penyaoh kitai ngiga deh?” ko bala sakeda.“Kitai enda tau abis ngiga iya,” ko saut Entingi. Manah kitai bebagi tiga. Dua bagi tinggal dirumah lalu sabagi ngiga, tang kitai enda tau enda mai ngepan manah laban menoa kitai tu semampai siga. Kita ke indu pagila brapi nyangkong ke bekal.

Nyau tawas hari siti bala Entingi pen lalu beradu. Entingi laban ke endang kering ati, iya pen endang tuai tajam mutus berani, perengka udah sedia mengkang nyeruran, ubat udah sikap teruba ngenggam, batu chi udah dibai kena melesit kampong dalam, nyabur udah di ukur bermata tajam, sangkoh nuju udah di intu san di genteran, lalu pisa udah mega sedi biru di anyam. Bini Entingi ke benama Dayun pen lalu pansut ka ruai ari bilik nganjong bekal ngagai Entingi ti baru deka nurun.”Kami baka nya Dayun, enti kami enda pulai dua malam nuan ngator orang nitih ka kami. Tang anang ngator orang abis ninggal ka rumah,” ko Entingi. Bala Entingi pen lalu nurun bala duapuloh iko sama ngering ati diri nadai kala ngelanjor ka pangan. “Ti mati sama mati, anak di rumah bisi ka ganti,” ko jako semaia sida kejang nurun.

Serta sida nurun ari rumah, sida lalu nyemerai Batang Paku, lalu ngulu ka Anyut nyidi bekau Unggie, ngulu ka Batang Jitu sampai apus. Bekau Unggie, seruran bisi temu sida, lalu niki Bukit Bediga antara Jitu enggau Udau. Dia iya belangkau, dijangka ka sida endor iya bemalam. Angkat ari nya sida Entingi lalu bemalam di Batang Udau. Leboh hari lalu sida lalu bejalai baru ngili ka Udau. Bekau Unggie seruran agi ditemu sida. Datai sida Entingi ba Nanga Sungai Pelandok sida ngetu merarau. Dia sida ninga ukoi seruran nekus-nekus serta besirat iko.“Ukoi aku tu,” ko Entingi, “nama baka tu enti ukai munsoh, bisi antu, nya alai kitai anang enda ngadang, anang jauh ngepan,” ko iya.
Tembu sida merarau lalu mupok niki ngagai Bukit Entawa laban dia bisi burong didinga richah makai buah kara. Leboh nyau semak dia sida bisi ensium bau buot.“Salah tu,” pia ko Entingi.Sida lalu majak bejalai begadai-gadai. Datai ba semak pun kara dia deh sida lalu meda bangkai Unggie tingkap, sangkuh bedau mengkang numbok belakang iya, lalu peresa sida meda nya sangkuh sumpit iya empu. Malik ke atas peda sida pisa iya bedau dikait ka ba puchok kara. Ruas buloh siti bedau garing-garing semak iya dia. Nya alai dijangka ka sida leboh iya nurun deka nyauk ai, sangkuh ke dienggaran ka iya ba dan kara, lalu laboh laban guyat iya ke benong nurun lalu numbok iya empu. Baka nya ko jerita pasal pemati Unggie dijangka ka sida Entingi. Nya alai bangkai Unggie enda dibai sida pulai, tang lalu ditumbak ka ba pun kara nya, lalu kategal laban Unggie ka mati dia nya alai Bukit Entawa dibali nama ngagai Bukit Kara Unggie sampai ka saharitu.

Bala Entingi mulai ka diri ngili Udau, lalu ngili Anyut terus ka nanga ba Batang Paku. Datai di rumah, Entingi lalu ngempuru ka sida sarumah baru lalu nusoi berita ngagai samoa sida sarumah.
“Nyadi Unggie tu mati. Aku endang enda ngasoh iya majak ka pejalai laban iya traap ba kaki tangga. Endang enda tau, nya mali besai, baik ka kini-kini tunga kitai endang anang majak pejalai agi. Kadua agi iya lalu ngemati ka anak babi. Nya pulai ke tungkal kitai empu. Enti traap ba kaki tangga baik ka kitai mansang ngagai rumah orang tau ka pulai, nya mali, dikumbai sangajang. Pengawa tu nadai jalai betunggu. Tang enti orang pulai ari rumah kitai datai ba kaki tangga kitai orang nya manjong tau ka ngentak ka kaki, besipak ka utai tau ka najar sabang, najar tebu, najar pisang, numbok ka sangkuh, baik ka nama utai di rusak ba kaki tangga dalam kandang menalan, tu tungkal nama iya, nganu rumah kitai. Nya baru bisi jalai dawa tunggu. Adat tunggu tungkal nitih ka pemesai utai ti di rusak,” ko Entingi nerang ka reti utai nya ngagai sida sarumah.

Iya lalu bejako baru. “Anang enda ingat ka pasal nya kita ka anak uchu dudi hari ila. Dalam kandang menalan nadai tunggu tangkal baroh ari sigi alas, manok siko enggau kering samengat siti. Ari luar menalan naka samada ari rumah nadai baroh ari sigi jabir, manok siko, kering samengat siti, tang ukai tangkal agi, nya dikumbai nyakap rumah nama penyalah nya.” Pia ko Entingi nerang ke nama jalai adat ngagai samoa sida ke begempuru ninga ka pasal pemati Unggie ke mati nyumpit ba Bukit Entawa. Nya alai nya naka cherita Bukit Entawa ke dibali baru nama ngagai Bukit Kara Unggie, nama ke lalu dikena datai ka kemaia haritu.

APAI SALI PARAI BINI

Sebulan nadan di langit lalu setahun nampun di bukit kenu ko sepengelama sida Apai Sali menyanak udah di tinggang penusah udah ti di kelakar tudah Apai Seumang Umang dibai besilih rumah dia sida menyanak pan nyau berasai nyamai serta lantang ngidup kediri baka orang maioh. Sida pan nyau bumai betahun baka orang maioh lalu bulih amat padi kena ngidup kediri.

Nyadi hari siti serta iya tekerebak tawas, dia Indai Sali seduai Sali lalu nurun ke umai laban umai sida ke numbas iya penyauh pejalai ari rumah sida. Nyadi penyauh umai sida ari rumah iya nya kira ke pejalai kitai setengah hari mantar. Seduai iya mupok ngejang ke rumah tumu bendar kira ke baru tumbuh mata panas, nyau betangkan tangkan meh seduai menyanak betunda tunda udi ngerumban ngelaban embun pagi nya laban beguai enggai ke hari majak panas.

Iya meh nyau datai seduai iya ba umai hari pan nyau tengah hari. Sali enggau indai iya lalu beguai guai ga mantun laban umai sida tiga menyanak tak numbas iya pemesai laban nangi enggai kediri enda chukup empa tauka enggai kediri enda bulih padi ke tahun nya. Leboh seduai iya mantun sehari nya dia deh enda mukai mukai Indai Sali lalu madah kediri ngenyit pedis perut. Lalu ngujong ke iya luput ba tengah umai sida dia. Serta meda indai iya luput baka nya dia tudah Sali tak nyau temati kutu serta tussah hati nadai nemu runding agi.

Laban Sali tu ke besai gamal serta kering tubuh laban ke baru ngangkat kediri bujang dia iya lalu enda berasai nyan indai iya, mai indai iya pulai ke dalam langkau umai sida ba tisi serarai. Datai meh ba langkau umai nya dia Indai Sali pan nyau ngeleda ari luput. Tedani iya ari luput nya dia iya lau bejako enggau Sali.

“Oh anak parai meh aku nama nyau asai tu. Alai nuan mupok mulai kediri ke rumah lalu madah ke apai nuan, iya nya aku tu parai kena pansa utai ba perut.” pia ko Indai Sali madah ke Sali.

Tudah Sali pan nyau temati kutu enda nemu daya ninga jako indai iya tak nyelai bendar munyi nya. Iya pan enda mega kempang ati ka ninggal ke indai iya nya kediri meda gaya iya tak ngumbai diri balat pedis. Tambah mega laban umai sida iya nya tak numbas iya penyauh ari rumah. Deka ati iya tak mai indai iya nya enggau pulai ke rumah, laban enda ga tak tentu alah di ema iya kediri, kaling nengali. Hari pan nyau ga majak lemai selemai, nyau maia lindap mata panas.

Udah nya enda mukai mukai ga Indai Sali pan lalu luput baru, ti lalu ngujong ka iya parai ngenyit. Sali pan lalu nyabak enggau naka ulih laban ti kasih ke pemarai indai iya nya. Meda indai iya udah parai nya ke ngasoh tudah Sali balat agi tussah ati. Ka ati iya pulai ke rumah ninggal ke bangkai indai iya nya kediri enda ga ati iya kempang serta berani. Sali lalu mutus ka hati diri berandau nengali, enda mulai kediri ngapa lalu bemalam ngibun bangkai indai iya nya ba langkau kediri. Nganti hari tawas pagi siti baru iya ka mulai kediri ke rumah nesau madah ka penusah sida ngagai orang maioh..

Hari pan nyau majak petang sepetang laban ke nyau salah kelala. Sekali tak enda mukai mukai deh tak datai orang ke enda di kelala iya tiga iko ngagai langkau alai Sali ke ngibun bangkai indai iya nya. Sida tiga ke datai nya lalu enda chamang chamang tama ke dalam langkau enda nganti diri ti diasaoh Sali tama. Sida pan lalu nudok kediri semak bangkai Indai Sali ke gali. Gamal tubuh sida tu besai maggang serta gemu.

Sekali deh bisi siko ari sida tiga nya lalu meremi kediri, lalu enda kakang ensium idong bangkai Indai Sali ke benong garing garing gali ba tengah tengah langkau nya. Udah ke disium orang nya dia deh idong Indai Sali lalu tingkil. Sereta meda utai tak nyelai nyadi baka nya dia Sali lalu berasai takut bendar ati.

Iya lalu nadai ati dua tiga tang lalu ngemansut kediri ari lubang penyenguk ke enda jauh ari alai iya duduk dia. Sali ke ngerari kediri nya lalu belanda beguai guai mulai kediri ke rumah. Seninjik bendar ga leboh iya ke rari nya bulan terang bendar serta bisi ke tenggau iya ba rantu jalai. Kira ka setengah malam udah iya bejalai , iya pan nyau datai ba rumah panjai sida empu. Sali lalu beguai guai niki ka rumah serta megau semua sida ke bisi ba rumah malam nya madah ke indai iya udah parai ngenyit laban kena pansa utai ba perut lalu bangkai iya agi bedau tinggal ba langkau umai sida.

Orang bukai lalu enda engkeretik serta tak abis ati ninga cherita Sali ti madah ke penusah seduai indai iya leboh ti mantun ba umai siang tadi. Apai Sali lalu beguai guai angkat lalu tama ke bilik mai ati ti naka iya penusah udah ti ninga berita madah ke bini iya udah parai ngenyit. Iya lalu nyabak duie duie di bilik din laban ti sayau ke bini iya. Nyadi munyi tu ko leka sabak Apai Sali;

“Sayau meh nuan Indai Duat, Indai Duat, nyau parai ninggal ke kami. Enda berasai ga nyawa nuan nadai agi di dinga, seput nuan padam lalu enda ngeleda,” pia ko iya

Apai Sali pan lalu nuggong ke sida serumah. Udah meh semua sida bela datai magang betuggong ba ruai iya, iya lalu nesau mai sida serumah ngabas bangkai bini iya ke udah parai lalu tinggal kediri ba umai sida. Ninga munyi nya sida serumah tak nadai engkeretik siko ngumbai diri ka enggau iya. Angkat pan enda meh sida serumah nya, anang agi ke ka enggau iya ngabas tauka ngambi bangkai Indai Sali nya.

Iya meh hari nyau udah tekerebak tawas dia semina Sali enggau apai iya aja ke ka nurun ngagai umai sida ngabas bangkai indai iya ke udah parai lemai kemari. Leboh seduai iya datai ba umai sida, dia seduai lalu beguai guai niki ke langkau. Tama seduai iya dalam langkau sida, seduai iya lalu tekenyit serta irau ati meda bangkai Indai Sali nya tak nadai dia. Gaya utai dalam langkau nya nyau teberunsai, tikai ke alai bangkai Indai Sali nya gali pan nyau abis di empa antu. Nyadi antu ke makai bangkai Indai Sali nya tadi iya nya Antu Gerasi Papa. Nyadi Antu Gerasai Papa tu endang semampai di sebut orang belama ka bendar makai bangkai mensia.

Apai Sali lalu naka iya pemedis ati. Iya lalu mai Sali ngiga Antu Gerasi Papa ke udah makai bangkai Indai Sali nya. Seduai iya lalu nitih ka bekau tapa kaki Antu Gerasi Papa nya ke udah ninggal ke langkau sida nya tadi. Nyau kepuas seduai iya ke udah bejalai nya tadi, dia deh seduai iya bisi tepeda ke kedai orang ba sebelah tisi jalai. Orang ke bisi ayan ba sebelah kedai nya pan nadai ga di kelala siko. Semua barang ke dijual orang ba kedai nya tak di kemisi ke magang dia.

Dia orang ke beempu kedai nya lalu nanya seduai iya.
“Eh, kawan Iban mari meli barang saya. Barang saya banyak bagus. Mana kita dua mahu pergi kawan ?” pia ko China nya tadi.

Sali seduai apai iya laban ke bengat pedis bendar ati lalu enda nyaut seleka mukut, tauka malas seleka beras. Seduai iya lalu berumban rumban deka betemu enggau Antu Gerasi Papa ke udah makai Indai Sali nya tadi. Datai seduai iya ba ujong pasar nya dia seduai iya meda rumah siti nadai utai ngemesai mesai nya. Apai Sali lalu nanya ngagai orang.

“Sapa orang dia ba rumah ngemesai tu ?” pia ko iya.
“Tuan kami ke diau dia. Sida iya baru udah pulai ngasu, lalu bulih babi indu siko,” pia ko timbal saut orang nya ngagai seduai iya.

Sali seduai Apai iya lalu enda chamang chamang niki rumah orang nya. Tama seduai iya ke dalam rumah nya lalu tepeda ke orang lelaki tiga iko ti benong duduk di ruai. Perut lelaki tiga iko nya nyau gentong magang serta tubuh sida pan sama bela besai. Kebuah perut sida tiga nya tadi gentong magang laban ke udah kenyang makai bangkai Indai Sali. Serta sida meda Apai Sali, sida lalu ngangau ke iya.

“Dudok aya Apai Sali,” ko orang nya nudok ka seduai Sali.
“Kami tiga enda ulih enggau seduai berandau, laban kami tiga tu agi buntau enda tindok baru pulai ngasu malam tadi. Kami tiga bulih babi indu siko gemu serta besai bendar,” pia ko antu nya nganu seduai.

Apai Sali nyau kekirik munyi ngeli iya di ketup ka pa pemedis ati ninga jako bala antu nya munyi nya. Iya lalu bejako. “Kita tiga tu ke makai bangkai bini aku malam tadi,” ko iya.

Apai Sali lalu mumpong pala antu nya ke pengabis besai sekali. Udah nya baru iya mumpong pala antu ti nangkan ka nya pemesai. Baru ka mupong pala antu siko da agi tudah Apai Sali, alai seduai menyanak nyepi diri tak nyau kitang kitang ba atas puchok kara. Rumah antu nya tadi tak lalu bebali nyadi pun kara ke ba tisi umai sida Apai Sali. Nyadi pala antu ke udah di pumpong nya tadi lalu bebali nyadi pala nyumboh tunggal, ukai pala antu nya agi. Kedai China ke di peda seduai iya nya mega lalu bebali nyadi buah senggang, lalu kain ke di jual China nya lalu bebali nyadi gari tekalong. Rumah kedai mega bebali nyadi munggu siti.

Udah nya seduai lalu pulai mai pala nyumboh dua igi nya. Nya baru Sali seduai apai iya ingat ke menua nya sigi mali dipumai, sigi endang tanah mali. Enda milih sapa sapa orang ke bumai dia lalu sida sebilik mesti bisi ka parai.

Nyadi nyentok ke seharitu agi meh nyumboh tunggal nya mali diri nyadi antu gerasi papa, lalu suah mali diri nyadi antu buau. Baka nya mega, suah bendar pun enggau buah senggang nemu mali diri nyadi sabut.

SEBATIN

Nyadi kelia apin Iban rembus ari Batang Kapuas, Indonesia ngalih nagai menua Batang Ai, Lubok Antu nyadi menua Sarawak tu endang amat sigi udah dulu diuan bansa bukai baka bansa Beketan, Punan, Seru, Beliun, Rajang enggau Segalang diau ngidup kediri.
Nyadi bansa ke dulu agi betemu enggau aki ini kitai bansa Iban leboh sida ke agi matau menua Batang Ai nya bansa Punan enggau bansa Beketan. Lalu bansa dua bengkah tu sigi enda ngidup kediri bumai betahun baka kitai Iban tang sida iya ngidup kediri ngena chara ngasu beburu, nyumpit, berikan enggau meringga pantu ke pemakai sida besari sari.
Lalu baka tu ko penatai bansa sida nya nitih ko cherita tuai ke disebut dalam tusut. Nyadi sekali bisi tuai siko ke benama Sebatin. Iya tu datai ari tasik besai China Selatan lalu sangkai ba julut Tanjong Datu di Sarawak (Kuching). Ngara pasal penatai iya, leka main bisi madah ka “Sebatin ke bemain ai pasang” reti nya iya datai ari tasik China Selatan dibai ai pasang.
Sebatin tu beranak ka Derom ke datai ari segum gigi gumbang. Kebuah iya diberi nama nya, laban iya datai enggau apai iya Sebatin ari tasik China Selatan ke lalu tepawah kena alun ke gelombang. Ari nama seduai mapai iya nya, kitai lalu nemu nama seduai iya nya orang ke datai tepawah ari tasik, sekali ka laban ngiga menua tauka endang tepawah dibai hari kudi laban nadai ga orang ke bisi penemu nyemetak ba pasal tu.
Udah mati Sebatin seduai anak iya Derom, dia anak Derom ke benama Sebungkok enggau Senaun mindah ari menua nya lalu diau di Nanga Rajang, Jerijih. Senaun tu lalu nurun ke bansa Rajang. Senaun beranak ka Tugau lalu nurun ke bansa Melanau.
Nyadi bansa sida tu landik bendar ngukir. Empa pemendar sida ke ngukir, alah datai ke tiang rumah sida empu pan diukir sida magang. Keba laban nya, alai gela nama Sebungkok disebut dalam jako tuai, “Sebungkok ketok tunjok penebok tiang dibalang.”
Nyadi Sebungkok bebini ngambi Lemina. Leboh seduai iya melah pinang mentua iya minta derian pala nyengenda ari Sebungkok. Seduai iya lalu beranak ke Dayang Ilam. Dayang Ilam lalu belaki diambi Semalanjat ke berumah di Urat Dandi Nentang. Nyadi leboh anak tuai seduai iya agi biak, hari siti iya bemain ba pendai sida di Nanga Rajang lalu mati lemas. Nya alai laban penusah nya, nya kebuah gela Dayang Ilam ko pengingat tuai,”Dayang Ilam nyabak nyedan pechah bungkan jebul pemandang,” reti nya iya balat bendar tebunsa tusah ati nyabak ka pemarai anak tuai ke pemadu dikesayau ke iya.
Nyadi menyadi Dayang Ilam ke benama Jugo, berumah tinggi tiang nya beranak ka Entinggi ke bejulok Keti Aur Tulang, nya ke lalu nyadi ketuai bansa Beketan lalu diau di tuchong Bukit Saban, tinggi kediri nadai nenjang dalam Batang Paku, Saribas. Dayang Ilam seduai Semalanjat beranak baru ke Kerebu bejulok Pematu Jala Jarang. Iya bebini ngambi Dayang Umah, dara manah ditatah bangkang, datai ari Pinang Mirah Menyala Takang.
Seduai iya beranak ke Umar bejulok Kapar Bubu Batang. Umar bebini ngambi Dayang Kuyan lalu beranak ka Umbar ke berumah ba ujong Tanjong Pagar dalam menua Batang Ai, Lubok Antu. Umbar lalu bebini ngambi Dayang Laing lunchik juring geman pejerantang lalu beranak ka Medan ke berumah di Meruan Sengkarong Langkang, sungai mit pati Batang Ai, Lubok Antu enda jauh ari ili menua Engkelili.
Nyadi Medan bebini ngambi Nantai lalu beranak ka Entalang Bujang. Entalang Bujang tu parai dibunoh bansa Kantu ke benama Jalang. Udah parai Entalang Bujang, nya baru seduai iya beranak ka Tamoh, Ranchak enggau Judi, ke sama di umbong, ke tanda sida iya nya anak orang kaya raja.
Meda Entalang Bujang udah mati kena bunoh Jalang, nya alai Medan lalu ngasoh ulun iya ke benama Lunsur bebalas ambi ke munoh Jalang. “Enti nuan tebunoh ka Jalang, nuan lalu diperaja jadi ke menantu aku jadi enggau Tamoh,” pia ko iya.
Ninga jako tuan iya Medan munyi nya, Lunsur lalu beperansang ngipa Jalang. Nyau kepuas iya udah ngipa Jalang, nya baru Jalang ulih dibunoh iya. Udah Lunsur bedengah Jalang iya lalu jadi enggau Tamoh nitih ka semaia mentua iya Medan.
Nyadi Lunsur seduai Tamoh enda bengat lama bendar panjai begulai sejalai melaki bini. Seduai iya sarak, lalu Tamoh belaki baru diambi Usik lalu seduai iya beranak ka Simpu. Simpu belaki ngambi Pantau lalu beranak ka Ulas, dikumbai Indu Badas Bepantak Subang. Iya beranak ka Meringgai ke bebini ngambi Randai indu pandai Batang Skrang. Nyadi Randai tu indu ke pegari bendar nama laban iya bengat landik ngikat , landik ngebat. Ba rambau nya indu di Batang Skrang nadai pandai agi ari iya ba pengawa indu.
Datai sida peturun Sebungkok tu di Batang Ai, sida lalu betampil enggau peturun orang bukai ke pindah bedarat kia ka ari Batang Katungau enggau Merakai ari Kalimantan Barat, Indonesia ke datai ngili ka Kumpang enggau Undup. Jalai bejait ka tampil sida nya ulih magang sidi orang ke endang tukang tusut.
Nyadi sama serambau enggau Sebatin tadi, bisi tuai siko ke benama Merom Panggai ke berumah panjai di tisau langit. Reti jako nya madah ka iya datai ari menua jauh, laban iya kenu ko kenang dalam cherita tuai datai ari tanah Mekah, pangkalan Jeddah. Merom Panggai beranak ke Merom Panggah ke berumah nampong bukit. Merom Panggah beranak ka Abang Musa ke pindah ka Pulau Jawa bedagang ka pinang seleka berega ka ulun dua sama berambau mansang.
Abang Musa beranak ka Pateh Simpong ke tau ajih, tau nyimpong lumpong tekalong rengong rengong nyadi sengkilong tedong kumbang. Angkat iya ari nya pindah ngagai Pulau Magista. Ari nya iya pindah baru lalu diau di Pulau Semakau, ari nya iya angkat baru lalu diau di Munggu Merudu seberai Nanga Brunei. Dia baru iya beranak ka Pateh Rejap. Nyau besai Pateh Rejap nya baru iya nguji mupu ke menua Bintulu, tang enda nyadi laban iya bisi utai nanggul deka dibunoh orang tauka bisi ketegal bukai ke enda disadang iya.
Nyadi Pateh Rejap beranak ka Menteri Rendah ke dulu matak pindah mungkal nengri Mukah. Menteri Rendah beranak ka Pateh Gurang. Pateh Gurang lalu beranak ka Pateh Iri. Nyadi Pateh Iri beranak ka Pateh Teliang ke bebini ngambi Dayang Simba. Pateh Teliang seduai Dayang Simba nya beranak ka Pateh Ambau. Pateh Ambau lalu bebini ngambi Remias. Seduai iya mungkal diau di Pangkalan Tabau peling lanting Tawang bedagang. Nyadi pangkalan tu ari ulu Lubok Antu enggau ari ili Wong Mutan ke nyadi pengerembus bansa Tawang ari Danau nyin agi kelia mansang bedagang ka Batang Ai.
Nyadi pangkat ke dikumbai Pateh nya digaga perintah Majapahit kelia maia menua tu apin kena pegai perintah Belanda, Brunei tauka English. Iya ukai gelar diberi Merom Brunei.
Nambah ke nama semua orang ke kena sebut diatas nya maioh mega tuai bukai ke datai ari Kalimantan Timor bedarat ka Barat lalu diau ngalih kitu, baka sida Ratih ka meretih Langgong Kumpang enggau Jenua ke berimba Langgong Kanyandang. Seduai tu mega sekeda ari nama tuai ke disebut dalam tusut enggau rintai nama tuai dalam pengap kitai Iban ke ditemu dulu mungkal menua. Nyadi pechah peturun sida mudah bendar ditemu sida ke nemu serta landik betusut.
Sama serambau enggau sida tu kelia bisi siko tuai ke bengat beberita bendar lalu nama iya Beji. Nyadi Beji tu diau di Nanga Kayung enda jauh ari Ketapang semak enggau menua Suka Dana dalam menua Kalimantan Barat, Indonesia. Beji tu ko cherita tuai ke besai bendar ati. Iya deka ngiga serta deka betemu enggau Petara Langit. Jalai iya niki ke langit kin iya nya ari puchok enchepong purang sekayu. Lalu pemesai kayu enchepong nya sehari bejit bejelangkit, lalu pemesai batang kayu enchepong nya sehari pukang melit. Ari puchok enchepong purang tu iya ngerakit ka tangga tebelian betampong tampong keatas kin ka, lalu bediri degi degi ka langit. Nyau ka lama tangga nya pan nyau tinggi setinggi dirakit iya, enchepong nya lalu tumbang laban enda tetimbang ka pemerat tangga tebelian nya.
Tangga tebelian pan runtoh lalu beselundang luntang laboh ke baroh ngagai tanah naban ka Beji ke lalu ngasoh iya mati. Empa peninggi tangga udah digaga iya, batang teras ke laboh tu nyau ninggang maioh bengkah menua dibaroh tu ke agi temu datai ka kemaia tu hari lalu dikumbai kitai bansa Iban tangga Beji. Nya alai laban iya ke ngereja pengawa nyelai baka nya, nama iya lalu kena kenang ba leka tusut. Iya disebut “Beji nangga hari patah titi enchepong purang.”
Nyadi Beji beranak ka Bujang Lembau Rajin ke bejulok Terusu Jemu Ambun Midang. Bujang Lembau Rajin beranak ka Perisi ke mutus berani baka besi enda semaia makai tulang. Perisi beranak ka Jamit Tuai, pengerintai bala nyerang. Jamit Tuai tu tau serang lalu iya nemu bendar rintai burong kayau. Iya beranak ka Sampar biak pematak bala mansang. Sampar tu pan tau mega serang, tang leboh apai iya agi idup, iya agi nyadi ka manok sabong ngambu dulu ngelaban munsoh ka bala sida apai iya.
Sampar lalu beranak ka Gadoh peningkoh ban mekang. Iya tu pan tau serang lalu nadai kala pungkang perau pengayau kena ngulu ka anembiak iya ngayau. Gadoh beranak ka Mai dikumbai Apai Rekaya ke bebini ngambi Jelawai lalu beranak ka Patinggi Gurang ke bebini ngambi Pudai. Ba tuboh Patinggi Gurang sida iya agi diau di Nanga Kayung dalam menua Kalimantan Barat. Patinggi Gurang beranak ka Patinggi Ngadan ke pindah ka menua Saribas lalu parai ditumbak ka mungkal Pendam Batu Api di Bangai enda jauh ari menua Betong.
Nyadi menyadi indu Mai nya benama Sendi ke belaki ngambi Gelungan. Iya jadi enggau Gelungan, leboh siko nya agi diau di Bukit Balau, Ulu Undup. Ari nya sida pindah ngili menua Undup lalu berumah ba Wong Empangu. Ari Wong Empangu sida iya pindah baru ngili ka Batang Ai lalu berumah ba Bukit Balau ili enda jauh ari ili menua Simanggang (Sri Aman). Nyadi laban Gelungan seduai Sendi dua kali udah berumah ba bukit ke sama nama, nya alai semua anembiak seduai ngumbai diri bansa Balau, taja mega sida sama sebansa enggau Iban bukai dalam menua Sarawak tu.
Nyau ka lama sida udah diau ba Bukit Balau dia Gelungan lalu matak bala anembiak iya sekeda pindah lalu mubok menua Balu Sebuyau tebing kanan mudik Batang Ai. Semua anembiak iya ke pindah kia lalu ngubah nama sida iya baru lalu ngelar diri bansa Sebuyau ensepi diri diau di menua Balu Sebuyau. Ari menua Balu Sebuyau Gelungan lalu mai sekeda bala anembiak iya pindah baru ngagai menua Sadong. Iya empu parai di Sadong lalu ditumbak ka anembiak iya mungkal pendam di ulu Sungai Bulu enda jauh ari menua Lubok Pelandok.
Udah parai Gelungan anembiak iya pechah baru, lalu bisi pindah ka menua Meredang Gayam, di Kuching lalu bisi mega nya pindah ke menua Meredang Lumut enggau bisi nya lalu pindah ka menua Samarahan enggau bisi mega nya lalu diau mendam di menua Sadong. Sekeda sida terus pindah ka menua Lundu lalu beranak betelesak din datai ke seharitu. Taja sida udah beserara ari pangan diri datai ke kemaia haritu, laban ingat ka penatai diri empu ari Sebuyau, sida agi ngumbai diri empu bansa Sebuyau magang.
Nyadi udah parai Gelungan dia Sendi lalu bemimpi diasoh Kumang belaki napat ke lelaki siko ke benama Guang di menua Skrang. Pia mega di menua Nanga Enteban dalam menua Skrang, Guang pan bisi mega bemimpi dipadah ka Kumang iya deka bebini ditapat ka indu benama Sendi ari menua Sadong. Nyadi leboh iya bemimpi tu tudah Guang benong balu ka bini iya benama Genilau.
Nyadi penurun Sendi ke ka belaki napat ka Guang nya merau dikayuh ka ulun iya lapan iko, empat iko indu lalu empat iko lelaki. Kebuah iya mai ulun, laban iya ngayan kediri pantis tiris orang kaya raja.
Nyadi leboh sida iya mudik ngulu menua Skrang, ari ili Nanga Enteban sida lalu betemu enggau lelaki dua iko ke benong nyala ikan. Sida Sendi lalu nanya ngagai seduai nya dini rumah Guang. Lelaki dua iko nya lalu madah ka rumah Guang meh ke enda jauh ari ulu alai sida ke betemu nya tadi. Sida Sendi pan lalu mupok mega bekayuh baru, lalu Guang enggau pangan iya nya pan lalu majak mega nyala ikan baru.
Pulai Guang enggau pangan iya nya tadi nyala ikan seduai iya lalu nemu sida Sendi sigi udah datai lalu benong duduk ba bilik sida Guang empu. Lemai nya leboh orang nanya ka penemuai sida, Sendi pan lalu madah ke pejalai diri deka belaki napat ka Guang. Udah Guang ninga nya, iya pan lalu madah kediri deka jadi enggau Sendi, laban iya empu endang udah bisi mimpi mega dipadah ka Kumang deka ditapat ka indu benama Sendi.
Nya alai laban seduai iya jadi sama agi balu nya alai seduai ka dikumbai “Ngemulu Antu” ke bisi kena tinggang Adat Iban ba atur belaki bebini. Nyadi ukum tunggu adat ngemulu antu pan di isi seduai. Udah seduai ngisi adat nya baru seduai iya tau jadi melaki bini. Seduai iya beranak tiga iko. Sida nya benama Tida bini Tindin, Tair laki Giam, enggau Tungkat laki Belula. Nyadi peturun sida tu, nya ke nurun ka semua Iban maioh di menua tu nyengkaum lalu betampil enggau peturun Sendi dulu ke enggau Gelungan.
Nyadi anak dulu Guang seduai Genilau nya Sambang ke bebini ngambi Simba. Seduai iya beranak ka Imbok ke belaki diambi Jenggak. Imbok seduai Jenggak beranak ka Sunggoh ke bebini ngambi Bedah. Sunggoh seduai Bedah beranak ka Sambang ke bebini ngambi Bata lalu beranak ka Pala ke belaki diambi Entingang. Pala seduai Entingang beranak ka Sang ke bebini ngambi Selaka. Sang nya tuai Iban berumpang menua Paku Ili lalu ngulu ka ai Anyut. Sang seduai Selaka beranak ka Nangku ke belaki diambi Uyut bensumbar Bedilang Besi, iya nampong Sang nyadi tuai megai menua Paku Ili lalu ngulu ka Anyut datai ka entigis.
Lepas ari semua mensia ke pindah merau enggau bedarat ari menua Kalimantan Barat, agi mega sida iya tinggal diau ngalih ari menua sepiak nyin datai ke kemaia hari tu. Nyadi sida ke pindah bedarat tu tadi lama bendar begulai enggau diri sama diri dalam menua Batang Ai enggau simpang simpang sungai ke ba sebelah nya. Nyau kelama sida udah begulai diau nya baru sida iya bela diulu ke tuai sida empu mubok menua baru disebelah menua ke dikumbai kitai diatu menua bagi kedua.
Apin bala anak Rekaya Dana Bayang enggau Rentap apai Tambong nundok di Bukit Sadok antara Ulu Layar enggau Ulu Skrang, mimit bendar mensia udah pindah ke Julau, Kanowit, Binatang(Bintangor)enggau Sarikei. Dulu mimit ari menua nya semina endor Iban ke udah pindah iya nya Batang Krian diulu ka Enchana bensumbar Letan, Panggau, Urak ke digelar Rekaya Jamban enggau Ramping ke digelar Gumbang.
Rambau tu kelia di nanga enggau di ulu Batang Rajang agi diuan bansa Kejaman, Sakapan, Lahanan, Sian, Punan, Kayan, Beketan, Lusom enggau Lugat. Di menua ili diuan Beliun, Rajang, Tanjong, Seru, Segalang enggau Kanowit. Semua sida ke diau di menua ulu rembus ba menua nya ari Batang Kayan lalu diau nguan Ulu Rajang, Balui,Enggau Baleh. Naka menua sida ngili ka Batang Rajang nya Wong Mikai enda jauh ari ulu Nanga Pila.
Nyadi bansa bukai ke diau di Batang Baram baka Kenyah enggau Kelabit dudi agi betemu enggau bansa kitai Iban. Sida iya betemu enggau bansa kitai Iban udah menua Sarawak tu kena perintah pegai Rajah Brooke. Tang Kayan ke pindah ka ulu Tubau pati menua Bintulu nya pindah kia ari Batang Rajang udah ke dialah ka perintah leboh ngayau Kayan dalam tahun 1861 ngagai tahun 1863.
Laban berebut ke menua alai diau Iban dulu agi belaya bemunsoh ngelaban bansa Seru, Beliun, Kanowit enggau Tanjong ke suah betempoh enggau bansa Iban melunggang ari Batang Rajang, tauka bansa kitai Iban endang ngayau sida baka ke diulu ka Jiram bensubar Rentap ari Paku ka Kanowit lalu diulu ka Mujah bensumbar Buah Raya ari Julau. Udah abis pengachau Iban ngelaban sida, nya baru Sekalai seduai Sawing ka munoh Tuan Fox seduai Tuan Steele di Kubau Kanowit dalam tahun 1859.

PERINTAH RAJA SARAWAK

Nyadi dalam bulan tujoh taun 1849, Linggir Mali Lebu ari menua Paku nurun ngulu ka anembiak iya ngayau ngalah ka Paloh, Igan, Sarikei enggau pemulai iya deka ngalah ka Duri di Nanga Sadong, ke udah kena kayau sida dulu suba.
Berita sida ka ngayau tu jampat bendar kena dinga Raja ari Sarawak (Kuching). Tuan Raja seduai Admiral Keppel lalu ngumpol bala deka nempoh bala Linggir di Tasik. Orang ke enggau iya nya Laut(Melayu) Sarawak enggau bansa Balau ari Lingga.
Udah alah Paloh enggau Igan, bala Linggir deka ngerumban ngalah ka Sarikei. Datai sida, orang di Sarikei sigi udah ngadang laban endang udah ninga berita ke dibai orang ke rari ari Igan.
Sida pen lalu mulai ka diri. Kira maia tengah malam, malam siti, leboh sida baru deka nyemerai meraka Nanga Krian mansang ka Sadong endor sida lalu dibedil skunyir (kapal layar) perintah. Sida ngelaban bekayoh deka ngelanggar sekunyir nya. Datai sida nyau semak-sesemak, alai sekunyir nya lalu ngansak ka sida ngena injin ke dikumbai orang tuai menya injin tau belanda.
Balat bendar bala Raja begagai ka sida malam nya. Maioh bendar perau sida karam enggau tasah di sebelah tasik. Nyadi ipar Linggir ke benama Chabu enggau orang karam perau. Iya lalu nepan ba pelepah apong balu ke mai iya berarat ka tebing nitih ke pengerarat ai pasang. Meda iya, dia kapal perintah lalu nangkap iya. Leboh orang nangkap iya, dia Chabu tu tadi sempat mega numpu Laut(Melayu) siko ke alai lalu kena ba dada ke lalu ngujong ka laut nya parai tekala nya. Bala Raja maioh bendar minta diri ka munoh iya tang Tuan Raja empu enda ngasoh. Nya alai iya lalu di idup ka perintah.

Nyadi semua perau ke tesangkai ka diri ngagai tebing lalu ditinggal ka bala Iban dia. Sida lalu ngelari ka diri neresap kampong antara menua Kalaka enggau Saribas lalu ngerembus ka diri di menua Ulu Undai ba pati Rimbas. Nyadi perau ke ulih nama ai Layar leboh malam nya semina perau Linggir Mali Lebu enggau perau enggi Abang Apong, tuai bansa Laut Spaoh. Sida lalu ngelari kediri ke ulu alah nyau datai rembus di rumah sida empu dalam menua Paku.
Tiga hari udah bekau nya bala Raja pen datai mudik ai Paku lalu belanggar enggau bala Linggir di Nanga Peka kena 4 hb. August, 1849. Leboh ke beamok tu dia bala perintah bisi parai dua iko. Seduai ke parai nya Bunsi seduai menyadi iya Tujang anak Temenggong Jugah empu ke datai ari menua Lundu, sereta enggau dua iko agi ke endang udah parai kena timbak senapang sida empu di Nanga Peka enggau di Nanga Bebuling. Nyadi bala Linggir pen pia mega parai siko, iya nya Abang Gambong, petunggal Abang Apong empu.
Sereta abis pengachau nya tadi, dia perintah menoa Sarawak lalu niri ka kubau Fort James di Nanga Skrang ke diasoh Tuan Raja dijaga Mr. Brereton. Udah tembu digaga kubau Fort James nya di Nanga Skrang, nya baru perintah menua Sarawak ngaga sebuah agi kubau di Nanga Lingga dalam tahun 1852 ke lalu diasoh Tuan Raja dijaga Tuan Allan Lee.

Kebuah perintah menoa Sarawak ngaga kubau dua buah nya laban ka dikena nagang bala bansa Iban ke datai ari menoa Skrang agi undur mantu bala bansa Iban ari menoa Saribas nyerang bansa Iban ari menoa bukai, iya kelebih agi iya nya beserang ke bansa Iban Balau enggau Iban Undop. Tang Libau Rentap chukup pedis bendar ati meda kubau dua buah nya udah digaga kena mebal Nanga Skrang. Iya lalu ngumpol bebai ke bala maioh undor ari ulu deka ngalah ka kubau Fort James. Datai iya di menua Lintang Batang dia raban sida Libau Rentap tu lalu betempoh enggau bala perintah ke diulu betuai ka Tuan Allan Lee ke datai ari Lingga kena mantu Tuan Brereton. Leboh perau sida bepansa, dia menantu Libau Rentap ke benama Layang Laki Tambong lalu enda chamang chamang numbok Tuan Allan Lee enggau suar. Tuan Allan Lee lalu rebah, alai pala iya ke lalu ulih dipupong Layang nyadi ka dengah. Nyadi sida ke belanggar tu iya nya kena 26 hb April, 1850.
Pulai ke nya dia Libau Rentap lalu ngaga ensumbar iya baru nambah ka ensumbar iya ke lama ti munyi tu :
“Rentap Tanah, Rentap Menoa, Tuan Allan Lee ke mati enda berega, Tuan Brereton tau masok ka kain, Enda te anjong ka bala iya, Rita Layang tampak terang mandang ka Ai Rupa, Abang Aing badu agi mending ka Tuan Raja, Bansa Iban Undop abis melut leka mata, Bala bansa Iban Balau nyau keregau di sebelah menua kerapa.”
Udah mati Tuan Allan Lee, nyadi menoa agi meruan mangkang kachau bebunoh sereta bemunsoh. Libau Rentap lalu nan baru ngaga kuta, lalu nguta bukit siti ba ulu Sungai Lang antara menoa Skrang enggau menoa Layar.
Nyadi bala tuai bansa Iban di menoa Saribas leboh maia tu apin bisi penyarut baru udah bekau Linggir Mali Lebu ke udah alah di menoa Beting Maro. Sida iya agi nundok ka perintah menoa Sarawak, laban Linggir Mali Lebu, Aji apai Limpa, Nanang enggau Luyoh ke baru udah betemu enggau Tuan Raja di Sarawak(Kuching) ke alai sida iya besemaia enggai agi belaban niri ka bunoh. Udah sida nya tadi bebaik, dia Rekaya Pemancha Dana Bayang pan parai dalam taun 1854 di menoa Padeh.

Agi dalam taun 1844 apin lama sida iya udah pulai ari menua Sarawak ke betemu enggau Tuan Raja endor siko tuai Iban Skrang ke benama Dandi ti bensumbar Gasing Gila bisi disangka perintah menoa Sarawak nulong mantu Libau Rentap ngelaban perintah. Nya alai laban ari pengachau tu, alai Tuan Muda seduai Abang Aing ari Nanga Skrang mudik deka nguji ngalah ka rumah Dandi Gasing Gila di menoa Tekalong dalam bulan April, 1854. Leboh ke udah ninga berita perintah deka mudik, dia Dandi gasing Gila lalu betesau ngumbai bala iya bebai sama nan ka rumah iya. Maioh bendar bala ke ditesau iya nya datai nguang ari menoa Skrang enggau ari menoa Saribas. Nyadi sida ke nguang nya nyengkaum Aji Apai Limpa seduai Linggir Mali Lebu. Nyadi leboh ke nguji ka ngalah ke rumah Dandi Gasing Gila tu perntah enda mujor ngalah ka iya.
Leboh ninga berita Linggir Mali Lebu seduai Aji apai Limpa bisi nguang mantu Dandi Gasing Gila, dia Tuan Muda pedis bendar ati. Iya lalu nganu sereta deka ngukum seduai ngena adat tajau lapan. Seduai enda setuju lalu enggai ngisi ukum nya, laban ketegal ko seduai perintah menoa Sarawak salah laban deka nguji ngalah ka rumah orang ti nadai penyalah. Pemulai tu tadi dia Aji Apai Limpa lalu marit, berengkah ngaga kayau anak nebing tasik lalu munoh sekeda Laut di Nanga Sadong.
Linggir Mali Lebu pen baka nya mega, lalu nurun ngulu ka bala anembiak iya ngalah ke bansa Beketan di Ulu Julau. Kayau Linggir tu tadi rat bendar laban sida ke pulai ngayau nya bulih pala sedaun idas. Leboh kayau Linggir tu tadi dia siko ari manok sabong iya ke benama Chulo Tarang bisi bedengah rawai lapan. Nambah ka nya maioh bendar bala anembiak iya bulih dengah sereta enggau tangkap. Rumah ke dialah ka sida iya tu enggi Apai Siba di menoa Ulu Sugai.
Pemulai Linggir ngalah ka menoa Sugai alai endor bala anembiak iya ke benama Sa ke begelar Lua lalu berunding deka pindah ari menoa Paku ke menoa Awik. Sa lalu nurun nyuong Enteri Apai Jara di Suri matau menoa Awek laban iya ninga orang madah ka menoa nya manah bendar endor pindah ngidup ka diri.
Datai seduai din enggau bala anembiak seduai, dia sida iya lalu ngengkah ka tambak burong ba pun kara di menoa Tanjong Itop, diatu pun Kara nya udah parai lalu diganti baru ditanam enggau pun Rian. Udah sida ngengkah ka tambak burong nya, dia sida lalu mulai ka diri ka menoa Suri enggau Paku. Apin lama udah pemulai seduai enggau bala anembiak seduai tu alai Lua Apai Enchana lalu parai di menoa Karangan Pinggai dalam menoa Paku, enggau Enteri Apai Jara pen sama parai ga di Suri dalam menoa Rimbas. Lua dikubor ka ba pendam Batu Anchau enda jauh ari ili Nanga Peka enggau ari ulu menoa Nanga Matop dalam pegai menoa Paku.
Nyadi udah ketegal pemarai seduai nya alai pengawa sida ke ka pindah ka menoa Awik lalu tebelega dalam timpoh tiga taun. Udah Lua nya tadi diperantu, nya baru Enchana Letan anak tuai iya matak orang bukai bebai sama enggau iya pindah ari menoa Paku ka menua Awik.

Sida iya ke pindah tu tadi iya nya merau ngili ka ai Batang Krian. Leboh luan perau sida iya baru masok ba sintak ai Nanga Awik dia sida lalu ninga munyi burong jaloh muak ka kanan. Nyadi reti burong ke baka nya nitih ko kenang orang ke tuai iya nya, sida deka bulih bendar utai, lalu bala anak lelaki deka pegari nama tampak rita, tang siti penusah ke tau nuntong sida iya nya sida iya ke lelaki enda tau panjai umor, nyadi sida ke indu baru tau gayu.
Angkat sida ari menoa nya alai sida iya pen lalu datai ba Nanga Diso, kira ke setanjung penyauh ari muak ka ulu Nanga Awik. Leboh sida iya datai dia alai endor sida iya lalu ninga munyi kijang datai muak ari kanan. Nyadi reti burong ke baka tu nunda ka penemu tuai, iya nya sama munyi burong ke dulu tadi. Iya nya sida ke lelaki deka bendar pegari nama tang enda gayu baka sida ke indu.
Letan enggau bala iya lalu berumah ba menoa Lubok Gamba. Nyadi Minggat Apai Runai ke datai dudi ari iya lalu diau ngulai Letan leboh iya berumah di Nanga Setira. Nyadi menyadi sida ke benama Mail dudi agi angkat ari menoa Paku, laban iya ke di iru orang di menoa Penum. Nyadi meda Mail tu deka pindah dia bala tuai tuai ba menoa Paku nagang iya enda ngasoh. Nyadi jarin ke endang dikena iya ngidup kediri berikan lalu ditan ka Laksamana Amir nitih ko cherita laban empa penyayau orang enggai ka iya pindah.
Datai Mial di Awik lalu tanah ke alai sida Letan ke udah berumah pen nyau sekut, nya alai iya lalu berumah nyembuah kediri semak nya di Setira. Nyau ka lama udah iya diau di menoa Awik, nya baru iya pulai baru ke menoa Paku ngambi reta iya ke bedau tinggal di menoa Penum nya tadi.
Ari Nanga Setira, sida iya angkat baru lalu berumah di menoa Tanjong Lubok Kepayang. Ari menoa tu Minggat nurun enggau Tuan Raja ngalah ka bansa Kayan ke alai iya bulih bendar pala, tangkap enggau perapasan. Tangkap Minggat ke agi ulih di ke ingat ka nama leboh nya benama Jemat. Lepas kayau nya, Jemat lalu diambi bala Kayan pulai baru.
Ari Lubok Kepayang sida Minggat lalu berumpang menoa ninggal ka Diso lalu berumah di menoa Mitas. Enchana lalu mai bala iya berumah di Rantau Menukol sama betangkup tanju enggau rumah Apai Jumput ke bensumbar Badilang Besi.
Angkat Minggat ari Mitas, iya lalu ngulu ka orang nyerang Ensiring enggau Spali. Nyadi tu keterubah iya Minggat matak serang, lalu serang iya tu bulih pala lapan puloh satu igi enda nyengkaum tangkap.
Pia mega leboh Minggat agi di Mitas, iya lalu dibai Linggir Mali Lebu ari menoa Paku minta nyerang Mualang di Ulu Bayan pati Ketunggau, Kalimantan Barat, Indonesia ngagai Tuan Raja, ka tegal anembiak Linggir di ulu ka Kedit Apai Enggang ngetah ka Ulu Sadong enggau ba Ulu Bayan kena bunoh bansa Mualang nya tadi. Nama sida ke parai kena bunoh bansa Mualang tu iya nya Sagoh Apai Basok, Manggi enggau Usin. Nyadi cherita penusah tu tau dibacha kita ba ujong cherita tu lagi.
Leboh sida ke agi diau di Mitas, dia Minggat apai Runai bisi niri ka gawai besai. Lalu iya empu mega niri ka Ranyai leboh ke begawai nya, nyadi Letan niri ka Bumbun, lalu baka nya mega Menggin niri ka Mudor Ruroh. Kebuah Menggin Apai Riah niri ka tiang ngemesai nya nama, laban ketegal iya udah bedengah bulih pala munsoh lelaki empat puloh igi nadai diselat pala orang indu. Nyadi Gawai tu rami bendar, laban maioh bendar tuai bansa Iban bukai diambi sida datai ngabang, baka Tarang Apai Dungkong, Garan Apai Uyut, Kandau Apai Limbak, Jungan Apai Chaong, Adu Apai Jingan enggau Doo Apai Chunggat.

Nyadi gawai nya lalu diserak sida iya enggau pengerami pengawa Gawai Antu. Leboh sida iya ke bungah ngintu gawai nya, nyadi Jara indai Runai lalu bungah enggau Tarang. Nyadi iya nundok ka Tarang tu ba tikai permaidani, lalu diberi iya tuak semangkok belabong ke ngenjing enda neritik di irup Tarang Apai Dungkong, empa penau enggau pengelandik sida ke tuai rambau tu menya bungah enggau pangan diri. Nyadi leboh maia timang jalong nuntong pagi, dia Tarang Apai dungkong seduai Garan lalu sama diasoh Minggat ngirup ai jalong dudok, ukai ai jalong timang baka enggi tuai tuai Iban bukai.
Lalu sama betunda udi enggau Enchana Letan mungkal menoa Awik, tuai bansa Iban menoa Paku ke benama Manggang, Unggang, Tengkuang, Mudit enggau Luna ke bensumbar Panggau sida diri menyadi lalu pindah angkat ari menoa Nanga Anyut dalam ai Paku laban deka berumpang menoa ngagai Batang Sebelak. Tang apin sida kin ka, sida dulu deka diau di menoa Gerenjang ba pati ai Krian. Leboh sida datai din, nyadi menoa Sebelah tu agi kachau bendar charut, bekau bansa Seru ke udah alah kena kayau sida Linggir Mali Lebu, sida Aji Apai Limpa enggau Ugat anak Libau Buban ke semampai suah beripa ba menoa nya. Endor bansa Seru ke balat bendar di kayau bala sida nya, iya nya di menoa Sesang, enda jauh ari menoa Kabong.
Laban pengachau tu, nya alai tuai-tuai bansa Iban bukai apin ngasoh sida iya beguai lalu pindah ka menoa Sebelak laban enggai ka sida tau bulih penusah. Ninga tagang tuai-tuai bukai dia sida nya tadi lalu mulai ka diri baru ke menoa Paku. Enda bengat lama udah sida diau di menoa Paku, sida lalu angkat pindah baru bedarat meraka menoa Rimbas lalu ngili ka ai Melupa. Nyadi leboh rambau tu bansa Seru nyau enda berapa siga agi.
Nyadi Ngadi Apai Iding lalu angkat nyereta sida tu ari menoa Samu. Leboh iya nyau datai di menoa Batang Awik dia iya lalu ngulai bala sida Minggat Apai Runai ke apin lama iga udah datai di menoa nya. Nyadi laban iya udah diau di Batang Awik enda lama, nya alai Ngadi lalu bisi bulih temuda dalam Batang Awik.
Nyadi leboh bala sida Luna Panggau diri menyadi datai di menoa Batang Sebelak dia sida lalu berumah di menoa Nanga Beratong tebing kanan mudik Batang Sebelak. Nyadi bansa Seru apin tentu deka meda sida laban agi takut enggai ke ati bansa Iban agi enda manah. Meda bansa Seru agi liar ari sida baka nya, nya alai sida lalu berunding enggau pangan diri deka bebaik enggau bansa Seru. Sida iya lalu nyua ka benda palit mata sigi alas berejang ke lalu diterima bansa Seru enggau ati lantang sereta gaga. Udah bekau sida ke bebaik tu, bansa Seru lalu deka betemu sereta bejako manah enggau sida begulai sejalai saum pemakai.
Di Nanga Beratong sida bisi nanam buah ke tanda sida udah datai di menoa baru. Ari samoa buah ke ditanam sida dia, ka dua kayu pun embawang ke agi idup datai ke sehari tu.
Leboh sida agi diau di Nanga Beratong, nyadi bansa Seru di menoa Tanjong Pilin suah bendar regau kena kayau anak bansa Iban ke datai ari menoa Batang Rimbas enggau ari menoa Batang Layar. Nyadi kayau tu di ulu ka Aji Apai Limpa enggau anak Rekaya Mangku enggau Rekaya Linggang ari Btanag Rimbas. Nyadi penusah tu balat bendar ngachau sida Panggau, laban bansa Seru bisi nyangka sida iya bisi aum juak enggau orang ke datai ngachau ari Saribas.
Ari Nanga Beratong, sida Panggau lalu pindah baru ngagai Tembawai Tinting di menoa Supok. Leboh sida muai rumah tu Manggang seduai Tengkuang nyerara diri ari sida Panggau lalu berumah ba Tembawai Pitoh, alai Tengkuang lalu digelar sida iya dia nyadi Penghulu, lalu Panggau agi tinggal berumah di menoa Supok baru alai iya ke lalu digelar nyadi Tuai.
Nyadi ba rambau maia tu kelia bansa Iban dalam menoa Ulu Batang Layar agi udu bendar kachau ngelaban perintah menoa Sarawak besaup enggau bala Libau Rentap ari Skrang ke baru udah angkat ari menoa Ulu Sungai Lang lalu ngaga kuta ba Bukit Sadok dalam taun 1856. Nya alai kena 2 June, 1857 Tuan Raja, Tuan Besar, Tuan Muda enggau Abang Aing nguji deka ngalah ka kuta Bukit Sadok ke terubah, lalu pengawa sida tu enda mujor ka ngalah ka Bukit Sadok. Orang ke nyadi malin bala Tuan Raja mudik ari Skrang leboh rambau nya benama Sandum, tuai bansa Iban Skrang Ili ke dulu udah nundok ka Perintah menoa Sarawak.
Udah bekau perintah deka nguji ngayau ngalah ka Bukit Sadok ti ke terubah nya enda mujor alah, nyadi bala bansa Iban ke nan ka Bukit Sadok nya nyau suntok bendar garam. Nyadi laban penusah tu sida lalu minta bantu kaban sida ti diau di menoa Jaloh, tebing muak ke kiba Batang Layar, ari ulu Nanga Spak ambi ke ngada ke sida iya garam ke empa. Ninga pengawa nya Tuan Muda ke diau di kubau Fort James di Nanga Skrang lalu ngasoh Bunyau Apai Bakir ari menoa Rantau Anak enggau Linggir Mali Lebu ari menoa Paku ngayau ngalah ka menoa Jaloh. Seduai iya lalu bebai bala mansang ngayau ngalah ka rumah panjai nya, lalu mujor ngalah ke menoa Jaloh, nya alai sampai ka diatu menoa nya lalu di kumbai Tembawai Jaloh Alah.
Nyadi dalam taun 1858 leboh perintah menoa Sarawak berambu ka ngaga kubau Fort Lily di menoa Betong dalam Batang Saribas, bala anembiak Linggir Mali Lebu ari menoa Paku deka nemuai ngagai Tuan Raja ka Sarawak(Kuching). Bala sida ke kin ka di ulu ka Kedit Apai Enggang. Leboh sida datai di menoa Sampun dia enda mukai mukai sida iya lalu kena timbak bala bansa Iban Balau ngena bedil. Nyadi bansa Iban Balau tu endang diasoh Tuan Raja ngipa bala Iban Saribas ke belayar di tasik ke enda terang, enggai ka sida iya munoh sebarang orang ba sebelah tebing ngapa.

Nyadi leboh maia sida iya ke betempuh di menoa Sampun nya tadi dia Adu Apai Jingan balat bendar bakal. Nyadi leka peluru ke ngemakal ka iya nya masok ari dada iya, lalu ngembol ke belakang. Iya lalu ditaban ke sida Kedit bekayuh ngagai menoa Sarawak(Kuching) beguai ka ngelari kediri ari ke dititih bala munsoh. Datai sida iya di Sarawak, nyadi iya endang agi balat bendar mutah ka darah, tang udah bekau Kedit ke muntas leka peluru ke ngembol ba belakang iya nya ngena ujong mata pedang, nya baru iya bisi benyawa agi. Iya pan semina bakal aja, enda lalu parai.
Lalu berita sida tu ke di timbak bala bansa Iban Balau di menoa Sampun nya tadi jampat bendar datai di menoa Paku di bai berita oleh bala bansa Laut(Melayu). Nyadi kenu ko berita ke di bai bansa Laut nya tadi, semua sida bala Kedit Apai Enggang abis mati magang di bunoh bansa Iban Balau. Leboh ke udah ninga berita nya, dia Majang Apai Adu di Nanga Anyut dalam Batang Paku lalu balat bendar tusah ati. Iya lalu mai Linggir Mali Lebu mupok ngagai menoa Sarawak nentu ngabas berita ke enda manah nya. Linggir Mali Lebu madah ka diri apin sempat laban leboh nya orang Paku api bisi perau besai kena sida iya bebai meraka tasik. Udah meh ninga Linggir Mali Lebu betanggoh, dia Majang Apai Adu lalu bejako, “Lebu bendar meh aku tu berisan enggau kita ke raja berani, enti kita bengat enda telimpang kediri mantu penusah aku tu.” Ninga Majang ke nyau ringat bejako munyi nya, Linggir lalu nurun mai Belawan ari menoa Samu undor ngena perau dua buah.
Leboh sida nyau datai di menoa Samudam, dia perau Linggir Mali Lebu ke undor dulu agi lalu di timbak bala bansa Iban Balau. Dia perau Linggir Mali Lebu lalu belah sereta karam semak tebing. Nyadi Linggir Mali Lebu empu pan kena timbak ba punggong ke lalu ngujong ka iya luput. Lalu rajut ke malut punggong iya nya pan selayor angus, tang kulit iya enda masok peluru. Udah meh meda Linggir Mali Lebu nya luput kena timbak bansa Iban Balau, dia ipar iya ke benama Tindin Apai Jantan seduai anak menyadi iya ke benama Jantin Apai Dubah lalu ngema naban ka iya ngelari ka diri ngagai tebing. Munsoh lalu nitih ka sida, tang Mula anak menyadi Linggir Mali Lebu empu lalu nan ka diri lalu mepat bala munsoh ke deka ngulih ka Linggir Mali Lebu.
Sida baru deka tama kampong alai Jantin pan kena pantap munsoh lalu balat bendar bakal. Lempuang iya nyau ayan. Tang leboh sida iya begau ke penusah tu alai endor sida iya ninga puchok kayu bemunyi, munyi ke kena puput ka hari jai. Leboh sida iya malik ka atas ngagai tunga munyi puchok kayu nya, dia sida iya meda sawa siko benong rindang merekoh ka puchok meranti. Leboh nya mega Linggir Mali Lebu ke benong luput nya tadi pan lalu ngeleda. Ko iya, “Aku nadai apa nama agi laban Kumang seduai Indai Abang udah datai nulong aku ditu.”
Ari nya sida iya lalu bejalai bedarat muntang ka tanjong sepiak mai naban ka Jantin ke bakal nya tadi. Nyadi perau Belawan leboh ke meda perau Linggir Mali Lebu udah karam kena timbak munsoh lalu nikal pulai enda nyadi mansang ngelaban munsoh. Tang Majang enggau sida ke bukai lalu majak mansang ngelaban munsoh. Nyadi lama bendar ga bala munsoh nya tadi belaban enggau Majang dinga Mula ke ngibun Linggir Mali Lebu, laban Majang ke bangat kebal. Nyadi samoa anembiak Linggir Mali Lebu ke parai di bunoh munsoh di menoa Samudam nya tiga belas iko.
Ari tanjong sepiak nya baru siko laut ke benama Kudus, iya nya laut ke endang pangan sida, lalu nganjong sida iya pulai ngagai menoa Paku.
Ninga berita Linggir Mali Lebu nya udah alah di menoa Samudam, dia Aji Apai Limpa seduai Lintong Moa Hari ari menoa Kanowit lalu ngumpol bala maioh deka bebai ngalah ka bala Laut(Melayu) Spaoh. Bala seduai lalu di bai seduai mansa kubau Fort Lily di Betong malam hari laban enggai ka sida Bunyau Apai Bakir enggau Tuan Watson seduai Tuan J.B. Cruickshank nemu sida bisi mansa. Leboh agi dini hari alai sida iya pan datai di menoa Spaoh lalu belalai di menoa Buling.
Angkat deh leboh tumu pagi nya dia Laut Spaoh ke bisi undor nasa, lalu nemu sida iya bisi belalai di menoa Buling. Laut nya lalu pulai beguai-guai ke Spaoh madah ka Abang Laksamana Amir seduai anak iya Abang Apong. Aji Apai Limpa lalu ngentam enggau bala iya di menoa Buling. Tusah bendar meh ati bala Laut Spaoh laban berita nya, nya alai sida lalu minta tolong Linggir Mali Lebu nagang sida Aji mansang ngayau munoh mensia ngagai menoa Laut Spaoh.
Linggir lalu undor enggau Munji Apai Nyaru ka menoa Spaoh. Datai sida iya din, seduai lalu bekayuh tama ngagai menoa Buling. Ninga kayuh seduai ke datai, dia Aji apai Limpa lalu malik. Meda Linggir Mali Lebu nyau datai iya lalu bejako, “Lalu ika,” ko Aji apai Limpa. Linggir Mali Lebu seduai Munji Apai Nyaru pen lalu bekayuh mansang ngagai genturong bala maioh ke endang udah siap besedia di tebing.
Sereta sida iya udah betemu, dia Aji Apai Limpa lalu nanya ke nama kebuah Linggir Mali Lebu tau tak datai ngagai sida iya kia. Linggir Mali Lebu lalu nusoi pejalai diri ke dipadah ka Laut Spaoh pasal sida Aji Apai Limpa ke udah datai di Buling deka mansang ngayau ngagai bala Laut Spaoh, laban bala bansa Laut nya diau kelalu semak ari rumah ke alai iya diau. Udah meh ninga jako tagang Linggir Mali Lebu nya, dia Aji Apai Limpa seduai Lintong Moa Hari lalu enda nyadi ngayau bala Laut Spaoh, tang mulai ka diri bedarat ninting antara menoa Paku enggau menoa Layaar nyentuk alah ka seduai nyau datai di Bukit Sadok. Nyadi perau sida iya lalu di tinggal ka di menoa Buling, laban mar di bai pulai baru mansa kubau Fort Lily di Betong takut ka perintah nemu penatai sida.
Angkat deh berita tu kena dinga Bunyau Apai Bakir. Iya lalu ngasoh anak iya Bakir seduai Umbol ke bensumbar Ijau Layang madah ka pengawa Aji Apai Limpa seduai Lintong Moa Hari ke deka datai ngayau nyerang bala Laut Spaoh ngagai Tuan Muda Charles Brooke di Nanga Skrang.
Ninga berita nya dia Tuan Muda lalu enda betanggoh, lalu ngumpol bala Iban Skrang Ili, bala bansa Iban Undop enggau bala bansa Iban Balau ari Lingga mai sida iya enggau ngayau ngalah ka rumah Aji Apai Limpa dalam Batang Padeh, dalam bulan April, 1858.
Udah bekau kayau Tuan Muda tu, dia Aji Apai Limpa seduai Lintong Moa Hari lalu undor baru, lalu nimbak kubau Fort Lily di Betong ari Nanga Entanak kena 14 July, 1858. Leboh ke betempuh tu sida iya balat bendar betimbak enggau bedil, nyadi kubau Fort Lily nya tadi balat bendar rusak tang enda ulih di alah ka sida iya.
Udah rusak kubau Fort Lily di Betong, Aji Apai Limpa lalu nyurut ka diri ke ulu. Tuan Muda lalu di bantu Tuan Besai James Brooke Johnson ari Sarawak(Kuching) ka betuboh ka bala Iban Sebuyau ari menoa Lundu enggau bala bansa Laut(Melayu) ari Sarawak. Sida iya lalu nitih ka tunga bala Aji Apai Limpa ke ngelari ka diri ngulu Batang Padeh, alai rumah panjai sida Aji Apai Limpa seduai Nanang ke sama kena tunu perintah Sarawak.

Udah bekau kayau tu Aji Apai Limpa lalu liar ati ka perintah Sarawak. Iya lalu mudik ke ulu ngipa pejalai bala Raja di Nanga Spak, Ulu Layar. Udah sida ke betempuh dia Aji Apai Limpa seduai Lintong Moa Hari lalu nan baru di menoa Sungai Langit, alai Aji Apai Limpa ke parai benong ngansak ka bala Raja ke betatam ba karangan di Nanga Sungai Langit dalam taun 1858.
Udah bekau bala Aji Apai Limpa nya alah laban perintah Sarawak, bala perintah lalu mudik Batang Layar ke ulu nyentok ngagai Nanga Tiga. Ari nya sida ke nurun ngayau lalu bebagi dua, sebagi mansang ngayau ka nguji ngalah ka Bukit Sadok enggau sebagi agi mansang ngayau deka ngalah ka Mujah bensumbar Buah Raya. Nyadi kebuah perintah deka ngayau ngalah ka Mujah Buah Raya, laban iya di temu perintah bisi mantu bala Libau Rentap enggau anak Rekaya Pemancha Dana Bayang ke ngelaban perintah di Ulu Batang Layar. Kedua agi, Mujah Buah Raya suah bendar ngulu ka anembiak iya ngayau ngalah ka bansa Rajang, Tanjong enggau bansa Kanowit. Leboh ba kayau tu rumah sida Mujah Buah Raya abis ditunu bala Raja, tang Libau Rentap di Bukit Sadok enda alah laban kayau bala perintah, lalu Abang Aing balat bendar bakal leboh ke ngayau tu.
Dalam taun 1858 udah Minggat Apai Runai seduai Tarang Apai Dungkong entap nyadi tuai megai anembiak di menoa Awik enggau Batang Krian, menoa nya sekali udah kena kachau dalam taun 1858 leboh Tuan Raja ngalah ka Mujah Buah Raya di menoa Julau. Orang ke dibai perintah nurun ngalah ka menoa Julau leboh nya, iya nya bansa Iban Balau, Iban Skrang Ili, Iban Layar, Iban Paku, Iban Rimbas enggau Iban Krian Ili. Nyadi orang Iban Layar ke enggau ngayau tu nya samoa orang ke diau enda jauh ngarong ka menoa Rantau Anak.
Apin perintah Sarawak angkat nurun ngayau, samoa orang ti enda ngelaban dulu diasoh iya diau ngulai Minggat Apai Runai tauka ngulai Tarang Apai Dungkong dalam sekayu Batang Krian. Enti enda baka nya enggai ka sida iya bulih penusah ngapa enti sida iya bebalut enggau bala munsoh ke ka di kayau bala perintah Sarawak.
Nyadi orang ba menoa Kabo endang enggai nundok ka perintah Sarawak. Sida iya lalu lari enggau munsoh sama nan ka Bukit Batu. Samoa sida indu anembaik, sida iya dianjong sida lari ka menoa Ulu Julau magang.
Leboh kayau tu samoa orang ke datai ari Layar, Paku, Rimbas enggau Krian Ili enggai enggau ngayau bebendar. Sida iya semina nurun ngayau ngudah ka diri ke di bai perintah laban laban enda nemu ko bedengah munoh diri sama diri ke sama datai ari menoa lama ke sama penatai. Nyadi bansa Iban Balau ke bebendar agi lalu ngalah ka rumah orang di Nanga Kabo. Rumah orang Nanga Kabo lalu alah, lalu ditunu sida ke lalu nyadi ka pendam ke agi dikena orang menoa Kabo datai kemaia hari tu.
Nyadi orang Kabo, enti sida iya enda ditulong diri semenoa ke enggau perintah ngayau ke nulong orang menoa Budu enggau orang Julau nya baru sida iya tusah besai. Tang laban orang ke tuai ngenang diri sama diri, nya alai amat nama menoa sida iya udah alah laban perintah tang sida iya nadai maioh parai leboh kayau nya.
Nyadi orang ke tuai munsoh nan ka bala perintah rambau nya benama Ranggau seduai Janting. Udah rumah Mujah Buah Raya nya alah di menoa Julau, Janting seduai Ranggau lalu naban ka anembiak seduai nya lari ka menoa bukit. Meda utai baka nya Tuan Raja lalu mai bala iya pulai laban enggai agi nitih ka munsoh ke udah jauh tepejoh lari.
Udah pulai ngayau nya, Tuan Raja lalu ngasoh Minggat Apai Runai ngalah ka sida ngena kayau bedarat. Nyadi endor munsoh ke diasoh Tuan Raja alah ka Minggat Apai Rumai tu iya nya di menoa Ulu Kanowit, Ulu Mujok lalu datai terus ka menoa Ulu Katibas, Song. Lepas ari endor nya mega sida bisi bekupan di menoa Ulu Kemalih, Ulu Bayu ngelingi Bukit Stulak pati ai Entabai, Julau.
Udah meh bekau sida ke udah dialah ka Minggat, tang meh Ranggau agi keras deka ngelaban. Nyadi endor nan baru ke dibai iya nya di Bukit Dugan, Ulu Ensiring. Apin tembu kuta sida nya digaga alai Tuan Raja lalu ngasoh Minggat Apai Runai ngayau sida nya baru lalu ngalah ka sida. Udah bekau kayau tu samoa munsoh ke nundok ka perintah lalu di asoh pulai ka menoa Ulu Entabai, lalu orang ti agi enggau Ranggau ngelaban nan baru di Bukit Dugan.
Udah nya Minggat Apai Runai ngayau baru. Leboh kayau ke dudi tu iya ngator Kandau Apai Limbak seduai Sumbang Apai Imas ari Paku ngulu ka orang dulu bedarat. Datai sida ba pangkalan di ai Ensiring, dia sida lalu bisi nemu perau. Ngena perau nya sida iya lalu ngulu ka anembiak undor ngili Ensiring alah nyau datai ka nanga. Datai sida dia, nya baru sida iya beranti, nganti Minggat Apai Runai mai bala maioh datai enggau sida. Nyadi orang ke nyadi kepala manok sabong Minggat Apai Runai leboh ke ngayau tu benama Luna ke bensumbar Panggau, tunggal berani Batang Sebelak. Nyadi kayau Minggat Apai Runai tu bulih bendar ke dikumbai bulih ngapar.
Leboh Minggat Apai Runai matak anembiak iya mulai ka diri, iya lalu mai Kandau seduai Sumbang sama pulai enggau iya ka Awik dulu, laban din baru iya magi dengah ka diberi iya ngagai siko-siko.
Datai sida di rumah, sida serumah pen lalu niri ka Gawai Enchaboh Arong. Rami bendar sida serumah nyambut pala ke ulih ngayau tu tadi. Tiga malam beturut turut orang serumah nya ngenjing enda tindok, tembu nyangkah enggau betaku ka antu pala ke baru ulih sida nya.
Udah abis pengawa Gawai Enchaboh Arong, nya baru Minggat Apai Runai ngempuru ka samoa bala manok sabong iya baum. Leboh ke baum tu dia iya lalu bejako, ko iya, “Nyadi kebuah aku ke ngempuru ka kita ke bedengah tu kitu ka laban aku tu nyau deka bedua anak utai ke ulih kitai bebala, baka dengah, tangkap enggau perapasan. Nyadi aku tu semina nusoi adat ngagai kita. Nyadi adat kayau, enti orang bisi bulih pala sigi, pala nya pulai ngagai orang ke ngiring kayau. Nyadi enti orang bisi bedengah dua nya baru sigi diambi orang ke tuai kayau, sigi ga diberi ngagai orang ke bempu dengah. Nyadi adat tangkap sebaka enggau adat dengah. Enti tangkap sida ka siko ulih dia baru tuai kayau nipak rega tangkap nya enggau utai bukai. Nyadi perapasan bukai nya bagi dua magang enggau tuai kayau, “Adat tu,” ko iya, “Endang adat tuai kitai ari menoa Batang Paku kenyau ari kelia ka ditampong kami duai Linggir Mali Lebu nurun ngayau. Nyadi Sumbang, seduai Kandau bulih pala ka sigi. Pala nya lalu di lak ke seduai iya tinggal ditu. Tang kena aku nganti nya aku meri seduai pala sigi. Pala nya ko runding aku dibai seduai pulai ngagai menoa kitai ka Paku kin ka. Datai seduai din ila pala nya lalu di asoh seduai salai Saing ke bensumbar Mata Hari, laban pala nya endang kirum aku ka kitai di Paku, awak ka sida nemu seduai bisi utai ulih nitih ka kayau aku.” Udah iya tembu bedua ka samoa dengah, tangkap enggau perapasan nya baru Minggat ngasoh orang pulai ngagai rumah diri mai rita sida ke nurun ngayau ka menoa diri empu.

Udah bekau nya endor Minggat Apai Runai nemuai ngagai Tuan Raja ka Sarawak(Kuching). Datai iya din, iya lalu nusoi berita diri ke udah pulai ngayau ngagai Tuan Raja. Ninga bala munsoh lalu enggai nundok dia Tuan Raja lalu bejako, “Nuan Minggat nurun ngayau baru, tang nuan mesti mai Linggir Mali Lebu ari menoa Paku, Chulo Tarang Apai Dungkong ari menoa Krian enggau Entering Apai Nyawai ari menoa Julau, bai sama enggau nuan ngayau.”
Leboh Minggat agi di Sarawak alai munsoh pen belaboh ga ngupas Bukit Dugan baru. Nyadi kuta ke digaga sida iya nya batu belapis lapis, lalu ari luar kuta nya dipagar sida iya ngena kapar kayu ke tegap bendar. Lalu orang ke nyadi ketuai munsoh ngaga kuta ba Bukit Dugan nya benama Ranggau seduai Janting.
Nyadi bala sida ke nurun ngayau tu dibai Minggat bedarat tang sida iya lalu nyuong Entering Apai Nyawai, iya nya siko tuai kitai Iban ari menoa Julau. Nyadi Linggir Mali Lebu ari menoa Paku lalu nesau mai bala iya ari menoa Paku enggau Rimbas, nyadi Tarang lalu mai bala orang ari menoa Krian. Ari rumah Entering, nya baru sida iya merau mudik Batang Kanowit. Datai sida di Nanga Mujok dia sida iya ngetu lalu baum baru.
Leboh ke baum tu, sida iya ngator bala sida lalu bebagi dua, sebagi ngulu ka ai Mujok lalu sebagi agi ari sida nya ngulu ka ai Ensiring. Tang orang ke diasoh nyadi ke malin sida nengah menoa iya nya bala anembiak Entering ari Julau.
Nyadi leboh kayau tu Chulo Tarang Apai Dungkong enda berapa lantang ati laban iya balat bendar kena jako kutok Linggir Mali Lebu seduai Minggat Apai Runai, laban maioh bala anembaik iya udah enggau orang nyadi munsoh. Nyadi bala sida Chulo Tarang Apai Dungkong tu ke udah nyadi munsoh iya nya Dau ari meno Dasay ke undah enggau bala munsoh nan ka kuta ba Bukit Dugan.

Nyadi Entering Apai Nyawai pan baka nya mega enda tentu lantang ati, laban semua bala munsoh ke datai ari menoa Julau enggau Kanowit ke sama besaup enggau nan ka kuta ba Bukit Dugan nya endang semoa kaban iya magang.
Udah sida iya tembu baum nya, sida lalu mudik Batang Mujok ngagai Sungai Maong. Leboh sida ke bemalam ba alai nya dia sida iya lalu dibai orang ketuai baum baru berunding ka pemitas ka dikena sida iya muntang ngayau ngalah ka Bukit Dugan.
Ko saut bala malin sida, “Batang Mujok tu agi panjai dipudik kitai, tambah mega maioh bendar wong ke mar ditengah. Pagila nya baru kitai ulih datai ba menoa Nanga Sugai. Udah kitai ngelui nya hari pen dijangka ka penumbas iya endor kitai ngenatai ka diri ba wong ke enda jauh iga ari ulu nya. Dia baru kitai bemalam baru.” Sida ke tuai pan lalu setuju nurut ka penemu bala malin nya tadi.
Pagi siti sida lalu mudik. Nyau bulih ngalih hari baru sida datai di Nanga Sugai. Datai sida dia, orang ketuai pen lalu ngasoh orang ke biak bedarat ngabas wong, meda enggai ke wong nya alai orang ngeram ka ipa. Nyadi orang ka tinggal diasoh sida ketuai ngambi kayu enggau ngambi upa kena sida nachu lemai nya. Pulai bala ke ngabas wong nya, sida lalu nusoi berita diri ke bisi meda bekau bala munsoh nyadi bendar. Ninga berita nya orang ketuai lalu mai bala sida bemalam dia.
Malam nya orang ketuai lalu mai semua sida iya baum baru. Nyadi orang ke nyadi tuai aum iya nya Linggir Mali Lebu, Minggat Apai Runai, Tarang Apai Dungkong enggau Entering Apai Nyawai. Sida lalu nanya ngagai malin sekali ka bangkong sida agi tau dibai ke ulu ngelangkah wong nya. Malin lalu nyaut madah ke enda ulih kena munyi ko sida nya tadi. Malin lalu madah ka wong nya bangat pikol bendar nya ke ngasoh perau sida iya mar bendar nengah nya. Enti semina naka perau panjai lima depa agi ga ulih di bai nengah wong nya. Malin mega madah ka Batang Mujok naka agi tau di pudik perau naka Nanga Tiga ke ulu ka. “Ni penyauh Nanga Tiga ari tu deh ?” ko sida ketuai nanya malin.
“Enda datai pudik kitai dua hari,” pia ko saut malin.
“Kati ti kitai bedarat ari tu bisi jalai kini ?” Ko Linggir seduai Minggat nanya baru.
“Bisi jalai, lalu nyamai bendar ditengah laban nadai bukit,” pia ko saut malin.
Ninga jako malin, Minggat lalu mai sida diau sehari di Nanga Sugai. Malam nya Minggat lalu nanya bagi bukit ke betampong tinting enggau Bukit Dugan ngagai bala malin. Ninga tanya Minggat nya baru malin nusoi gaya tinting bukit ngagai bala maioh.
“Nyadi Bukit Dugan tu renjan bendar ba antara menoa Ulu Mujok, Ulu Ensiring, Ulu Poi enggau Ulu Dugan pati ai Batang Katibas. Bukit tu semina endor munsoh nan ka indu anembiak, lalu barang sida udah magang dilalai ka sida di Ulu Katibas. Nyadi sida ke nan dia nya bechampor penatai, bisi nya ari Ulu Julau, Ulu Budu, Ulu Layar nambah ka orang ti diau semak nya dia.” Pia ko malin nusoi ngagai sida.
Udah abis utai tusoi bala malin nya baru Linggir bejako enggau Minggat, Tarang enggau Entering, ko iya, “Ni bagi munsoh ti deka di alah ka kitai tu Wat ?” ko iya malik ngagai Minggat. “Nyadi aku tu semina mantu pengawa seduai Apai Nyawai.”
Saut Minggat, “Nyadi nitih ka jako Tuan Raja enggau aku nadai maioh Wat, semina munsoh ke apin nundok dalam Batang Mujok tu enggau di Batang Ensiring nya ke diasoh iya bunoh kitai. Nyadi dalam ai tu ka dua buah rumah orang baik, nya enda asoh iya bunoh kitai. Tang alai bala kitai tu nuju Bukit Dugan, laban nya teda kayau dulu aku suba. Nyadi samoa munsoh ke udah rari ka Ulu Entabai enggau ka Ulu katibas enda di asoh Tuan Raja bunoh kitai. Enti kitai munoh sida nya, kitai empu ngambi penyalah ka diri,” pia ko saut Minggat.
Ninga jako Minggat, Linggir lalu ninga ka saut Entering. Ko Entering,”Diatu kitai udah masok ngagai kandang menoa munsoh. Kitai enda tau enda bejaga laban munsoh tentu bisi nginau ngemata ka kitai. Sida iya maioh tuboh datai ari Ulu Katibas, ari Ulu Ensiring nambah ka orang empu menoa Batang Mujok tu. Ba runding aku manah agi kitai anang merau tang bedarat ari tu terus ngagai menoa Simpang Tiga.
Ninga jako Entering, Minggat lalu ngator sida tuboh enam mgerambing ari seberai seberai ngenulu ka bala besai maioh.
“Ngena ator nuan nya meh kitai tu Wat, nya meh jalai kayau kitai selama,” ko Linggir nganu Minggat.
“Samoa sida ke di ator ngerambing nya anang ngema utai,” ko Linggir, “tang semina mai terabai enggau sangkoh aja. Enti bisi betemu enggau munsoh anang guai ngelaban, nganti bala besai maioh datai baru ngelaban enggai ka sida iya jelungan,” ko iya.
Nyadi Entering ngasoh Tandang ngambu dulu bala iya lalu Minggat ngasoh anak iya empu ke benama Munan, Linggir lalu ngasoh menantu iya empu ke benama Garan Lembang Batu. Pia mega Chulo Tarang lalu ngasoh menantu iya empu ke benama Kandau. Udah tembu baum nya sida iya lalu nat ka diri. Agi jauh malam pagi siti bala sida iya lalu berengkah berapi. Sida ke berapi nya lalu nyangkong ka perarau sida tengah hari nya mega.
Nyau tawas hari, alai Linggir ke tuai agi umor ka bala sida ketuai nya lalu nanya kenyap sida ke sama ketuai. Sida bukai bela madah ka buah malam diri nadai nya-nya, tak nadai utai nyemia ko sida.
“Enti munyi nya, makai meh semoa kitai laban beguai ka kitai tu ka mupok,” ko Minggat.
Udah meh tembu bala sida iya bebela alai bala anembiak ngenjing bekakisoh bebatak ka perau ka tebing. Udah samoa utai sikap magang, nya baru Minggat ngerah bala sida mupok.
Nyadi jalai sida ke ngerambing sungai nya mar bendar ditengah. Puas bendar sida nama nengah tebiang nama niki tingah batu meh pejalai sida. Sida suah bendar tetemu ka bekau munsoh ke enda nyadi ngeram ka ipa deka ngipa bala sida.
Nyau kira maia tengah hari nampun matahari baru sida datai ba tengah jalai menoa Simpang Tiga ari palan sida di Nanga Sugai nya tadi. Datai dia sida iya lalu bemalam baru.
Pagi siti sida iya lalu mupok baru ari menoa Letong Tibak bejalai ngulu ka Mujok berari-ari. Bekau munsoh seruan bisi ditemu sida berari-ari sepanjai jalai. Nyau kira tengan ngalih hari siti nya baru sida iya datai manggai ba menoa Simpang Tiga. Dia lalu nyadi ka endor sida iya diau. Ari nya sida dua belas iko lalu diasoh sida ketuai ngikup ka munsoh. Pulai sida ngikup, orang ketuai pen lalu nanya ka berita sida. Orang ke ngikup pen lalu nusoi jalai sida bebagi tiga, empat ngena jalai siti-siti, tang sama-sama nadai tetemu ka munsoh.
“Jangka kami, munsoh tentu nadai negah ngipa kitai ila, laban sida tentu udah begempuru nan di tuchong Bukit Dugan magang,” pia ko bala pengikup nya tadi.
Udah sida tembu makai lemai nya, orang ketuai lalu ngumbai bebai semoa sida iya baum baru. Endor sida baum nya ba tengah karangan. Udah sampai datai magang semoa bala sida, nya baru Minggat lalu bejako muka aum, ko iya, “Nama runding nuan Wat ni maia kitai tu ila patut angkat ari menoa tu ?” ko iya nanya Linggir.
“Aku Wat nadai beleman ka jako,” ko Linggir nyaut, “ni ko runding kita tiga Tarang enggau Entering meh.”
Nyadi ko Entering, “Enti bekal kitai maioh tu udah di adang chukop, manah kitai mupok dulu ngiga munsoh ngagai menoa Ulu Mujok enggau Ulu Ensiring.”
“Enda baka nya,” ko Minggat nyaut Entering, “Manah agi kitai angkat ari tu. Hari ti ka tiga nya baru kitai nuntong ba rumah munsoh ba tuchong Bukit Dugan.”
“Nyadi pun matak bala tu,” ko Minggat nganu Entering, “nya kitai tiga Linggir, aku enda diasoh Tuan Raja mai tuai bukai, laban kayau tu bangat bebunoh ngelaban diri semenoa. Enti tuai bukai dibai enggai ka orang bukai tentu enda nitih ka naka menoa asoh iya kayau kitai tiga,” ko Minggat.
Udah tembu jako nya, nya baru bala sida iya ngator bagi bala manok sabong ke di asoh ngambu dulu, tujoh iko ari setiap iko ketuai. Leboh maia tu Tarang enda berapa bagak laban bala anembiak iya nadai siko ka ngambu dulu ari ketegal sida sekaban udah enggau munsoh nan ka kuta di Bukit Dugan. Lalu baka nya mega bala anembiak Entering, maioh agi ke tak runggu laban kaban belayan sida maioh udah nitih ka Ranggau nyadi munsoh lalu nan ka kuta ba Bukit Dugan. Samina orang ka regas agi enggau bebendar ati iya nya bala anembiak Minggat enggau bala anembiak Linggir, laban kaban belayan sida nadai enggau nyadi munsoh.
Pagi udah orang ka ngerambing enggau ngambu dulu nyau mupok angkat, nya baru orang ketuai mupok bejalai ngulu ka bala maioh besai. Sakumbang sida iya ka bejalai maioh bendar bala munsoh bisi dipeda sida iya nginau raban sida ari jauh tang sida iya enda berani negah bala maioh besai nya. Kayu pen maioh bendar udah ditangkal, digaga sida iya ka pengerebah, tang nadai ga sida berani ngerebah kena mebal penatai bala maioh besai.
Nyau kira tengah hari nya baru sida iya nuntong ba kuta munsoh di tuchong Bukit Dugan. Manggai sida di tuchong bukit, udah sida iya niki tanah ka renjan bendar, nya baru sida iya tama ka dalam kuta, tang bala munsoh sigi nadai agi ditemu sida iya dia.
Leboh sida iya dia hari pen nyau jauh bendar udah ngalih, nya alai sida ketuai lalu mai bala maioh besai bemalam dia dalam kuta Bukit Dugan laban munsoh udah lari nadai agi diau dia. Leboh sida ke bemalam dia sida iya nadai tetemu ka beras, manok, babi enggau padi agi laban semua perengka nya udah magang di anjong bala munsoh ka menoa Ulu Katibas.
Malam nya bala maioh besai lalu berapi ba sebelah tanah, nyadi leboh asi sida benong melidih tak enda mukai mukai alai hari lalu datai kabut besai, lalu di tangkan ka ribut enggau ujan ka bangat bendar. Merinsa bendar bala sida diau dia, nya alai orang ke biak agi nyau baka terais munyi panjong sebelah belah kandang dalam kuta nya dia.
Pagi siti nya baru orang ketuai ngangau bebai baum baru. Minggat bejako di asoh Linggir madah ke kayau sida nya nadai pengujong, laban bala munsoh ke deka di alah ka udah lari lalu nadai agi nan ka kuta ba Bukit Dugan.
“Au lebu meh kayau kitai tu Wat,” ko Linggir nganu Minggat. “Enti tak aku bejako enggau Tuan Raja, nyau ga aku agi mai kitai ngansak ka munsoh ka menoa Ulu Katibas.”
“Nya nadai ko tua enggau meh Wat.” ko saut Minggat, “laban jako Tuan Raja bangat tak nyemetak enda ngasoh kitai ngansak ka munsoh ka menoa Ulu katibas,” Udah abis jako nya baru orang ketuai bebai ka bala diri pulai.
Sekumbang Minggat tau kayau, tu ke terubah iya enggau pengujong bala batak Linggir seduai iya beserak. Dulu agi ari tu, Tarang seduai iya agi ka manok sabong Linggir seduai Rekaya Pemancha Dana Bayang. Pia mega udah kayau tu Linggir seduai Minggat sama nadai kala matak bala agi enti enda ngayau nitih ka bala Tuan Raja, laban ketuai Iban bukai enda agi di asoh perintah ngayau kediri enti enda dibai Tuan Raja.
Udah mati Aji Apai Limpa laban ka negah bala Tuan Raja di Nanga Sungai Langit, dia aka iya ke benama Nanang seduai Luyoh lalu bedau diau jenoh udah bekau sida ke apin lama iga udah bebaik enggau perintah Sarawak. Enda lama udah nya Luyoh ke bedau mengkang diau di menoa ulu nyau mansang siga. Iya lalu mantu Sherip Masahor di Mukah lalu iya mai Nanang ngelaban perintah Sarawak baru. Sida iya lalu begaga ka kuta ba dilah tanah antara Batang Layar enggau Spak. Pengawa seduai tu lalu dibantu semua tuai tuai ke diau di menoa Padeh, Spak enggau Ulu Layar.
Meda Nanang seduai Luyoh angkat baru niri ka kayau bunoh ngelaban Tuan Raja, nya alai Tuan Watson lalu mai bala saldadu perintah menoa Sarawak kira bisi dua ribu iko mudik ke ulu ka ari Betong laban deka mansang nguji ngalah ka kuta Luyoh seduai Nanang. Datai bala perintah di Nanga Spak dia sida iya lalu meda kuta seduai nya amat mar bendar ditimbak, laban ari ili kiba enggau ari kanan sama lindong tanah magang. Pia mega ngelingi kuta ba ai Layar enggau ai Spak ke balat bendar lindong laban kayu ensurai, lalu ngelingi kuta nya mega ditanam ka sida iya tukak ke maioh bendar.
Nyau kepuas perintah berunding ka endor sida iya kira ka ulih nimbak kuta nya, dia Tuan Watson lalu nanam meriam sepuchuk kira delapan puloh depa penyauh ari kuta. Udah meriam nya ditanam, dia sida iya lalu nimbak nuju ngagai kuta nya. Kuta nya pan lalu runtoh, lalu munoh sereta ngemakal ka sekeda ari bala anembiak Nanang seduai Luyoh.
Nanang mimit pan nadai meh ngadang kuta nya tau bisi jalai orang ulih nimbak. Nya alai sereta iya meda bala anembaik iya bisi mati enggau bisi mega bakal dia iya lalu beguai guai niri ka setunggol kain burak, minta awak ngagai perintah ngambi ka bisi alai semua sida iya nya tadi lari mai orang ke parai enggau bakal. Peminta iya nya lalu kemaia nya diberi laban bala sida ari sapiak sapiak nadai tentu tak orang bukai, reti nya diri sama diri magang. Udah sida iya siap ninggal ka kuta, alai tengah malam nya baru perintah mupok nimbak kuta nya baru awak ka iya enda tau diguna agi. Udah meh kuta nya tadi runtuh dia pagi siti bala perintah pan lalu mulai ka diri baru ngagai menoa Rantau Anak.
Dua tiga hari udah nya, dia bisi berita datai di kubau Betong ke madah ka Nanang seduai Luyoh udah berengkah niri ka kuta ba endor nya baru. Kuta ke didiri ka seduai tu mega besai bendar sereta jauh tegap agi ari iya ke dulu agi ari tu. Udah ninga berita tu dia Tuan Watson lalu minta bantu Tuan Muda enggau bala ari menua Nanga Skrang. Tuan Muda pen lalu kemaia nya datai sereta mai bala besai maioh merau, lalu Abang Aing ke ngulu ka bala bedarat ari Skrang lalu melunggang ngili ka menua Spak pen sama angkat sehari nya mega.
Leboh iya nyau datai di Rantau Anak dia enda mukai mukai Tuan Muda lalu kena tabin, nya alai iya ngasoh Tuan Watson enggau Abang Aing ngulu ka bala maioh besai nurun ngayau. Malam leboh semua sida iya udah nuntong di Nanga Spak endor hari pan lalu kudi dalam pengelama kira sejam. Leboh hari ke kabut tu dia Nanang enggau bala iya lalu lari ari kuta. Sida iya ke ngelari ka diri tu enda ulih timbak bala saldadu perintah, laban maia nya malam petang bendar ke dikumbai orang ke tuai kelia petang enda dipeda achok bulu mata. Ke engka sida ke bisi bakal enggau mati ka siko dua aja ari ulu enggau ari ili malam nya laban sida iya ke bepantap dalam petang.
Udah pukas pengachau tu alai Nanang seduai Luyoh lalu enda agi ngelaban perintah bebunoh ditanah rata. Seduai iya enggau orang bukai ke nitih ka seduai iya lalu ngelaban perintah ba Bukit Sadok nitih ka Libau Rentap Apai Tambong. Di Bukit Sadok seduai iya lalu nguta ari baroh kuta Libau Rentap lalu pengawa seduai tu chukup bendar ngelantang ka ati Libau Rentap. Libau Rentap lalu ngelar diri dikumbai Raja Ulu, taja mega dulu suba iya endang udah nyadi kepala manok sabung Rekaya Pemancha Dana Bayang.
Pulai bala Tuan Raja ngalah ka Bukit Sadok kedua kali, bala saldadu perintah Sarawak lalu ngalah ka bansa Iban ke diau dalam menoa Kabah, Kanowit di Batang Rajang. Udah pulai nya perintah lalu berunding agi bekira deka ngalah ka Bukit Sadok baru. Nya alai kena bulan Sembilan dalam tahun 1861 bala Tuan Raja lalu ngalah ka Bukit Sadok lalu ketiga kali sida iya mai meriam besai bendar ke dikumbai sida iya Bujang Sadok kena sida iya napi ngelaban meriam Libau Rentap ke dijali anak Rekaya Pemancha Dana Bayang ke dikumbai sida iya Bujang Timpang Berang.
Leboh sida saldadu perintah ke mudik Batang Layar dia sida iya puas bendar bebatak enggau bedarat mai meriam nya tadi, sida iya semina ulih merau naka menoa Nanga Tiga. Angkat ari nya sida iya lalu mudik ai Tiput, lalu angkat ari Ulu Tiput baru sida iya ulih mai meriam nya bedarat nuju ngagai Bukit Sadok.
Leboh sida iya ke datai ba kaki Bukit Sadok, dia Tuan Besai seduai Tuan Muda lalu mai bala tuai tuai maioh baum, madah ka gaya ati perintah endang nadai deka bemunsoh enggau Nanang seduai Luyoh enti seduai iya setuju deka nundok ka perintah. Tang Libau Rentap ko seduai endang sigi enda tau enda dialah ka, ketegal laban iya udah ditemu salah munoh Tuan Allan Lee di Nanga Skrang. Anak Tuan Raja dua iko tu lalu ngasoh seruan sida niki ka Bukit Sadok nganjong jako pesan nya ngagai anak Rekaya Pemancha Dana Bayang enti sida iya setuju deka nundok ka perintah Sarawak.
Lalu orang ke diasoh bala Tuan Raja nganjong jako tu iya nya Jabu Apai Umping seduai menyadi iya ke benama Tugang Apai Utik ke endang bujang berani orang ari menoa Batang Bangat.

Datai seduai iya din dia seduai iya lalu nusoi jako ke diasoh perintah nya tadi anjong ngagai Nanang seduai Luyoh. Ninga pementas jako perintah nya tadi dia sida Nanang diri menyadi lalu berunding. Udah meh putus runding bala sida diri menyadi, nya baru sida iya nurun ngambi ka betemu enggau Tuan Besai seduai Tuan Muda ke alai sida iya ngadu ka sempekat enggau adat kena sida iya bebaik.
Dalam jako sempekat nya dia perintah lalu minta sida Nanang diri menyadi nundok ka perintah Sarawak tang lalu begadai ka empat puloh igi tajau rusa. Gadai tu ka dipulai ka baru ngagai sida enti sida iya nadai ngaga pengachau baru dalam timpoh tiga taun. Sida Nanang diri menyadi pan setuju ka jako sempekat tu, nya alai Uyu Apai Ikum lalu nyua ka benda nya ngari ka semua sida. Udah meh gadai nya disurong ka sida kena 25 September, 1861, Nanang seduai Luyoh enggau bala sida ke bukai lalu diasoh perintah Sarawak besikap rari ari kuta ke digaga sida ari baroh kuta ke digaga Libau Rentap di tuchong Bukit Sadok. Udah tembu sida Nanang tu berangkut ka reta tengkira enggau anak bini sida, nya baru Tuan Muda ngasoh bala saldadu iya ngirit meriam Bujang Sadok ka tuchong bukit laban ka kena sida iya belaban nimbak kuta Libau Rentap ke ngelar diri dikumbai Raja Ulu.
Nyadi udah meh Libau Rentap nemu lalu meda Nanang seduai Luyoh enggau bala anembiak seduai ngelari ka diri enda nitih ka aum sida iya ke dulu enggau iya dia Libau Rentap lalu ringat bendar ke alai iya lalu nunu kuta enggau dampa sida Nanang seduai Luyoh ba Bukit Sadok nya. Balat bendar jelap daun api ke makai dampa enggau kuta Nanang seduai Luyoh tu nitih ko cherita nyau ulih dipeda kira ke sebatu penyauh ari endor nya.
Pagi siti udah semoa utai siap magang disedia ka bala saldadu perintah dia sida iya lalu berengkah nimbak kuta Libau Rentap. Suah bendar sida iya bebalas betimbak, tang nyau ke lama udah nya baru kuta Libau Rentap lalu ulih ruboh. Meda utai nyau baka nya Libau Rentap lalu mai bala iya rari ninggal ka kuta enggau bala iya ke udah bakal enggau bangkai sida iya ke udah parai. Libau Rentap lalu ngelari ka diri melunggang ka Skrang, ari nya baru iya ngelari ka diri baru ngagai menoa Entabai ba pati ai Julau.
Tu meh pengujong cherita pengering sereta pengeliat ati Libau Rentap Apai Tambong ke ngelaban bala Tuan Raja perintah menoa Sarawak rambau nya kelia berengkah ari taun 1843 nyentuk ka taun 1857 lalu ditampung baru ngagai taun 1861, semadi meh iya alah udah kuta ke digaga iya ba Bukit Sadok nyau ruboh dialah ka perintah Sarawak ba alai diantara menoa Saribas enggau Skrang. Ari semoa bala tuai tuai bansa Dayak Iban ke berani ngelaban perintah Sarawak rambau nya kelia ko siko Libau Rentap tu aja meh ke enggai nundok lalu pia mega sigi enggai mansang betemu enggau orang putih ke nyadi Raja menoa Sarawak nyentuk ka iya mati tuai di menua Wak, Julau.
Tiga tahun udah ngalah ka Bukit Sadok, dia perintah Sarawak lalu ngulu ka orang ngayau baru ngalah ka bansa Kayan di Ulu Batang Rajang. Leboh kayau tu Nanang lalu tampak bendar berita berani nulong perintah ngelaban munsoh, nya alai leboh pemulai iya nya dia semua tajau rusa ke nyadi gadai sida diri menyadi ke udah besemaia nundok di Bukit Sadok enggau perintah dalam taun 1861 lalu dipulai ka perintah Sarawak baru ngagai sida nitih ka semaia dalam taun 1863.
Leboh Tuan Muda mulai ka gadai tajau rusa nya ngagai sida Nanang diri menyadi di Nanga Skrang, dia iya lalu baum mai semua bala tuai tuai Iban maioh ngaga adat, lalu enda ngasoh bansa Iban ngulit ka menoa baka selama enti bisi parai, lalu enda mega ngasoh bansa Iban bejual bebeli enti enda ngena dachin, ela, pasu, gantang enggau chupak. Tuan Muda mega madah ngagai tuai tuai Iban maioh iya nya semoa menoa nya sigi enggi Raja Sarawak, lalu tanah sigi enggi perintah magang, lalu semina babas nya baru enggi orang maioh ke bumai tau makai iya dia, ke lalu ngaga temuda bali rimba.
Sereta Bukit Sadok udah alah dia semoa bansa Iban dalam menoa Saribas Ili nyau nadai utai ngawa agi. Sida pan enda tentu agi nurun ngayau enti perintah Sarawak enda mai, tang nyau ngidup ka diri ngemeran ka pengawa ngetah awak ke bisi dijual ngagai bala bansa China ke bedagang. Lalu rega semoa utai ke dijual sida nya lalu dibeli ka sida iya ka tajau lama, bedil, lengguai, cherebon enggau maioh macham perengka temaga ke bukai baka bebendai, engkerumong enggau setawak. Kebuah alai bansa Iban beguna bendar ka perengka tu kelia laban enti leboh maia sida iya ngereja penyalah lalu sida iya kena tutop perintah, enti sida iya bisi reta ke baka tu kena sida iya betimbang ka penyalah nya ba perintah sida iya tau lepas. Lalu enti sida iya bisi ditemu tebunoh ka orang laban saru, reta nya mega tau dikena sida iya bebayar ka pati nyawa enggau ukum perintah ke bukai.

Nyadi getah ke dikereja sida iya leboh rambau tu menya nya getah putih, nyatu, rian, beringin, getah sabang, getah semalam, kubal tusu, gubi, kerik enggau getah perapat.
Keterubah orang dulu nemu ngereja pengawa ngetah tu iya nya orang ari menoa Paku nyentuk ka menoa Sadong ti diulu ka Kedit Apai Enggang. Orang ke sama ngereja pengawa ngetah rambau tu ti beberita iya nya Kelanang Apai Diak, Chupong Apai Dingun, Usin, Tumbing, Manggi enggau Sagoh Apai Basok.
Sida tu mega kala mudik ngulu menoa Skrang, tang nadai tetemu ka getah. Nya alai sida iya lalu matau melunggang ka menoa Ulu Bayan pati ai Ketunggau, Kalimantan Barat, Indonesia neresa menoa bansa Mualang. Datai sida iya din dia sida iya lalu belangkau, udah nya baru sida iya nganjong jalai, lalu Chupong diasoh sida iya nguan ngibun langkau. Leboh sida Usin, Manggi enggau Sagoh merarau ba rumah bansa Mualang dia enda mukai mukai semua sida tu lalu dibunoh bansa Mualang leboh sida iya benong makai.
Nyadi tudah Chupong ke tinggal ngibun langkau lalu dipelulong ka bansa Mualang, tang iya benasib laban agi dapat ngelari ka diri naban kediri ti bakal ka dalam babas. Datai bala sida Kelanang Apai Diak ke pulai nganjong jalai lalu nemu Chupong udah nadai agi nguan ngibun langkau nitih ka asoh sida tang darah iya balat bendar ditemu sida iya lekat ba sebelah rau ba sebelah langkau nya dia. Kedit Apai Enggang seduai Kelanang Apai Diak lalu irau bendar ati lalu mupok ngiga kini ka penunga Chupong tu tadi. Udah meh seduai iya tetemu ka Chupong nya tadi, dia Chupong lalu madah ka penusah diri ka dialah bansa Mualang dalam langkau. Sida tiga nadai nemu chara ka bebalas, nya alai sida tiga lalu mulai ka diri naban ke Chupong ke udah bakal nya tadi.
Leboh sida tiga tu tadi datai di menoa, sida tiga lalu nusoi penusah diri ngagai Linggir Mali Lebu seduai Luwi Apai Sulah iya nya tuai bansa Iban ba menoa Paku Ulu leboh nya suba. Luwi Apai Sulah lalu mai Linggir Mali Lebu baum ngulu ka sida iya ngalah ka bansa Mualang bebalas ka pemarai Sagoh Apai Basok. Linggir Mali Lebu pen deka, nya alai sida iya lalu ngaga langkau burong ba kaki menoa Lubok Bindang di Ulu Paku.
Leboh sida iya ngibun burong ditu dia sida iya bisi nyambut jako ari perintah Sarawak ke enda ngasoh sida iya nyadi ngayau ngagai menoa bansa Mualang di Kalimantan Barat, Indonesia. Ninga berita tu tadi dia semoa sida ketuai lalu tusah bendar ati. Nya alai Linggir Mali Lebu lalu berunding minta bantu Minggat Apai Runai ari menoa Awik, Saratok ambi ke sama minta nyadi enggau ngayau ngagai Tuan Raja.
Nyadi tuai tuai Iban ke dibai Linggir Mali Lebu nya nemuai betemu enggau Minggat Apai Runai, iya nya Munji Apai Nyaru, Tindin Apai Jantan, Enggu Apai Genilau, Luwi Apai Sulah, Ngindang Kumpang Pali, Gerijih Apai Landan, Juing Apai Ganggang, Sang Apai Umok, Guang Apai Duat, Kedit Apai Enggang, Doo Apai Chunggat enggau Medan seduai Runggah laban seduai tu kaban sida ke udah parai dibunoh bansa Mualang.
Datai sida iya di Saratok, sida lalu betemu enggau Minggat Apai Runai ke endang bisi undor ngalu ka Saratok. Minggat Apai Runai lalu irau bendar ati meda sida iya nya tak tuai tuai magang ke datai ka betemu enggau iya. Minggat pen lalu nanya ka pejalai sida iya enggau nama kebuah sida iya tak sampal datai ngagai iya baka nya. Sida iya lalu madah ngagai iya sida iya bisi pejalai deka nemuai ngagai iya ke ulu ka. Ninga jako sida udah munyi nya, Minggat apin ngasoh sida iya lalu, laban rumah sida iya apin sedia. “Pagila nya baru kita mudik,” ko Minggat madah ka sida. Nyadi semua sida tuai tuai Iban ari Paku tu lalu bemalam di Saratok.
Udah meh nyau pasang pagi siti, nya baru sida tuai tuai Iban ari menoa Paku nya tadi mupok mudik ka Awik. Datai sida iya di Awik lalu udah meh sida iya tembu mandi, nya baru Munan datai ari rumah ngasoh sida iya niki. Niki sida ba rumah sida Minggat nya tadi, lalu leboh ke datai di rumah, dia sida meda rumah sida Minggat Apai Runai endang udah penoh laban orang maioh nyau baka ke maia bisi begawai besai. Nyadi orang ke bisi kena padah ka Minggat Apai Runai kena iya masa penemuai Linggir Mali Lebu enggau bala iya ari Paku, iya nya tuai tuai Iban ari menoa Ulu Krian, Sebelak, Melupa enggau Sebetan.
Malam nya Minggat lalu ngempuru ka orang ngagai ruai iya. Iya lalu nanya ka penjalai enggau penemuai sida Linggir Mali Lebu ke datai ari menoa Paku. Linggir lalu nyaut, ko iya, “Kami ke nemuai ngagai nuan kitu Apai Runai, baka nya mega, ukai nemuai enggau ati ke lantang, tang datai mai moa masam sereta ati silam. Kebuah kami sebuat tu ke baka nya, laban kami sekaban bisi udah rusak besai kena parai bunoh bansa Mualang di menoa Ulu Bayan pati Ketunggau, Kalimantan Barat, Indonesia leboh bala anembaik ke diulu ka Kedit ngetah ba menoa nya. Nya alai laban penusah tu, kitai sekaban ke diau di menoa Paku udah mutus ka aum deka bebai bebalas ngayau ngagai menoa Mualang. Tang deh leboh kami sekaban benong ngibun burong ba kaki Lubok Bindang, dia kami bisi nyambut jako perintah Sarawak ke enda ngasoh kami nyadi ngayau. Laban tusah ati ketegal nya kami tu Apai Runai, laban enda nemu baka ni ko chara deka bebalas ka bala kami sekaban ke udah parai, nya alai kami ke datai kitu deka mai nuan sama enggau ninggang kami minta malas ngalah ka bansa Mualang ngagai Tuan Raja empu ka Sarawak(Kuching).”
Udah abis jako Linggir Mali Lebu, dia Minggat Apai Runai lalu nyaut munyi tu ko iya, “Tusah bendar mega aku ninga penusah ke udah nuntong bala kita sebuat, laban asai sepi aku kitai ka din pan asai kami ka ditu, tusah bala kita lalu tusah mega bala kami. Tang ka tu laban anembiak tua parai ngalih ari menoa orang sepiak nyin, asai ka mar bendar tua tau bulih peminta bebalas ngagai Tuan Raja. Enti nuan tak mai aku minta bayar pati nyawa sida ke parai nya ngagai Tuan Raja, nya baru bisi jalai tua kin ba runding penemu aku.”
Ninga jako Minggat Apai Runai tak serut munyi nya dia sida Linggir Mali Lebu lalu balat enda lantang bendar ati, tang agi keras deka mai sida iya bebalas ngayau ngagai Tuan Raja empu. Pagi siti sida Linggir Mali Lebu lalu pulai, tang datai bala sida di Nanga Kalaka dia sida iya lalu lanjur ngelayang nuju ka Sarawak(Kuching) laban deka minta ngayau ngalah ka bansa Mualang ngagai Tuan Raja. Nyadi saut Tuan Raja pan enda mega ngasoh sida iya nurun ngayau lalu ko jako Tuan Raja ngagai Linggir, “Enti anembiak tua dibunoh munsoh dalam garis antara menoa tua empu, Linggir, nya baru tua bisi jalai tau bebalas ka sida.” Ninga Tuan Raja enda ngemendar ngasoh sida iya bebalas ngayau bansa Mualang dia sida iya lalu pulai ka Paku. Apin lama udah ke pulai pengawa tu lalu dalam taun 1877 dia Linggir Mali Lebu lalu parai di menoa Paku. Udah parai Linggir Mali Lebu lalu pengawa ke nyadi tuai Iban menoa Paku Ulu lalu dipegai Garan Lembang Batu, iya nya anak menyadi enggau menantu Linggir Mali Lebu empu dalam taun 1878.